ខេត្តបាត់ដំបង ៖ អ្នករត់ម៉ូតូឌុបម្នាក់ត្រូវបានសាច់ញាតិអះអាងថា ត្រូវម៉ូយស្រី្តម្នាក់ដាក់ថ្នាំសណ្ដំរួចយកម៉ូតូជិះទៅបាត់ ខណៈជូនស្រី្តនោះទៅរកជួលផ្ទះមួយកន្លែងនៅភូមិទួលតាឯក សង្កាត់ទួលតាឯង ក្រុងបាត់ដំបង ។ ទោះជាយ៉ាងណា គ្មានអ្នកណាបានដឹងថា កើតឡើងនៅម៉ោងប៉ុន្មានទេ តែម្ចាស់ផ្ទះជួលអះអាងថា បានប្រទះឃើញបុរសនេះដេកម្នាក់ឯងក្នុងបន្ទប់នៅម៉ោងជាង៣រសៀលថ្ងៃទី១៦ កុម្ភៈ ។
អ្នករត់ម៉ូតូឌុបរូបនេះឈ្មោះតូច ចេវ អាយុ៤៧ឆ្នាំ នៅភូមិរំចេក៣ សង្កាត់រតនៈ ក្រុងបាត់ដំបង ។ តាមក្មួយស្រីជនរងគ្រោះឈ្មោះណូ វណ្ណារ័ត្ន អាយុ៣២ឆ្នាំ និយាយថា ឪពុកមារបស់គាត់បានចេញរត់ម៉ូតូឌុបតាំងពីម៉ោង៨ព្រឹកនាថ្ងៃកើតហេតុនោះ ប៉ុន្តែមិនឃើញត្រឡប់មកហូបបាយផ្ទះវិញទេ ។ លុះនៅម៉ោងប្រហែល៦ល្ងាចថ្ងៃដដែលមានបុរសម្នាក់ដែលប្រាប់ថា«គាត់ជាម្ចាស់ផ្ទះជួល»បានទូរស័ព្ទមកប្រាប់ប្រពន្ធជនរងគ្រោះថា ពូចេវ បានដេកសន្លប់ម្នាក់ឯងក្នុងផ្ទះជួល ដោយមិនដឹងកើតអីទេ។ ខណៈឮដូច្នេះ គាត់និងក្រុមគ្រួសារក៏ជិះម៉ូតូទៅរកឪពុកមានៅផ្ទះជួលខាងលើឃើញដេកសន្លប់មែន ទើបភ្ញាក់ផ្អើលតែម្ដង ។ ស្ត្រីឈ្មោះណូ វណ្ណារ័ត្ន បញ្ជាក់ថា នៅក្នុងបន្ទប់ផ្ទះជួលនោះគាត់ឃើញមានបាយ២កញ្ចប់ និងកែវជ័រដាក់ទឹកអំពៅ២នៅសល់តែសម្បក និងមានមួកមនុស្សស្រីច្រកក្នុងថង់មួយផង ដែលទំនងទើបទិញពីផ្សារ ប៉ុន្តែមិនឃើញម៉ូតូរបស់ពូចេវ ដែលរត់ឌុបរាល់ថ្ងៃនោះទេ ។ ម៉ូតូនោះម៉ាកហុងដាឌ្រីម ពណ៌ខ្មៅ ស៊េរីឆ្នាំ២០១១ មិនទាន់មានស្លាកលេខទេ តែមានបង្កាន់ដៃធ្វើស្លាកលេខហើយ ។
ម្ចាស់ផ្ទះជួលឈ្មោះសិន សាម៉ុត ភេទប្រុសអាយុ៣៥ឆ្នាំ បានបំភ្លឺប្រាប់កោះសន្តិភាពនៅព្រឹកថ្ងៃទី១៧កុម្ភៈថា អ្នករត់ម៉ូតូឌុបនោះបានឌុបស្រ្តីម្នាក់វ័យប្រហែល៤០ឆ្នាំ មករកជួលផ្ទះគាត់ម្ដងហើយនៅថ្ងៃទី១៥ កុម្ភៈ ។ លុះនៅវេលាម៉ោងជាង១១ព្រឹកថ្ងៃទី១៦ កុម្ភៈ គាត់បានឌុបស្រ្តីរូបនោះមកមើលបន្ទប់ម្ដងទៀត។ អ្នករត់ឌុបនោះប្រាប់ថា គាត់សុំសោចូលបន្ទប់ និងសុំផ្ញើអីវ៉ាន់មួយចំនួនសិន ព្រោះទាល់តែនៅថ្ងៃទី២០ កុម្ភៈ ទើបមកនៅ និងធ្វើកិច្ចសន្យា ។ គ្រានោះគាត់ក៏ប្រគល់សោបន្ទប់ឲ្យតែមិនបានមកមើលទេ ព្រោះជាប់រវល់លក់ដូរនៅឯផ្សារ។ ប៉ុន្តែលោកសាម៉ុតបញ្ជាក់ថា នៅម៉ោង៣រសៀលថ្ងៃដដែលនោះ ពេលគាត់មកពីផ្សារឃើញអ្នករត់ម៉ូតូឌុបនេះ ដេកលើតុម្នាក់ឯងស្ដូកស្ដឹងចំហទ្វារ តែមិនឃើញម៉ូតូគាត់និងស្រ្តីម្នាក់នោះទេ ។ លោកថាគ្រានោះគាត់មិនហ៊ានដាស់ទេ ព្រោះស្មានថាគាត់ដេកលេងពេលថ្ងៃ លុះនៅម៉ោងជិត៦ល្ងាចឃើញនៅតែដេកមិនងើប គាត់ក៏ទៅដាស់ស្រាប់តែបុរសនេះភ្ញាក់ទាំងមមើមមាយហាក់ដូចមនុស្សស្រវឹង ។ ស្ថិតក្នុងស្ថានភាពបែបនេះ គាត់ក៏សួររកលេខទូរស័ព្ទក្រុមគ្រួសារ តែសួរច្រើនដងទើបបុរសនេះប្រាប់ទាំងរវើរវាយ ហើយគាត់ក៏ទូរស័ព្ទហៅក្រុមគ្រួសារឲ្យមកមើលនិងដឹកទៅកាន់មន្ទីរពេទ្យ ។
តាមប្រភពនានាថា ជនរងគ្រោះ និងស្រ្តីរូបនោះគឺជាមនុស្សស្គាល់គ្នា និងជាម៉ូយដែលគេតែងឃើញបុរសនេះឌុបញឹកញាប់ទៀតផង។ គេសង្ស័យថា អ្នករត់ម៉ូតូឌុបរូបនេះអាចនៅហូបចុកអ្វីជុំគ្នាជាមួយម៉ូយស្រីនោះក្នុងបន្ទប់ទើបត្រូវស្រ្តីរូបនោះមានឱកាសដាក់ថ្នាំយកម៉ូតូស្រួលៗបែបនេះ ។ រីឯក្រុមគ្រួសារជនរងគ្រោះក៏បានអះអាងដូច្នេះដែរថា លោកពូ ចេវ អាចត្រូវម៉ូយស្រី្តនោះដាក់ថ្នាំសណ្ដំក្នុងបាយ ឬក្នុងទឹកអំពៅ លុះពេលគាត់សន្លប់ម៉ូយស្រី្តម្នាក់នេះក៏យកម៉ូតូជិះទៅបាត់តែម្ដង ។
ជុំវិញបញ្ហានេះ លោកជេត វណ្ណនី ស្នងការរងខេត្តបានបញ្ជាក់នៅព្រឹកថ្ងៃទី១៧ កុម្ភៈ ថា លោកមិនទាន់ទទួលព័ត៌មាននេះពីសមត្ថកិច្ចមូលដ្ឋានទេ ប៉ុន្តែលោកថាសំណុំរឿងដាក់ថ្នាំយកម៉ូតូនេះ ជាមុខសញ្ញាចាស់ដែលកម្លាំងជំនាញកំពុងតាមប្រមាញ់ ។ លោកស្នងការរងរូបនេះបញ្ជាក់ថា បើមានរឿងដូច្នេះមែនតម្រុយនៃមុខសញ្ញាទាល់តែជនរងគ្រោះសហការជាមួយសមត្ថកិច្ចទើបអាចកំណត់បាន តែបើជនរងគ្រោះមិនហ៊ានទម្លាយការពិតទេសមត្ថកិច្ចពិបាកធ្វើការងារនេះដែរ ទោះជាយ៉ាងណាលោកបានបញ្ជាឲ្យកម្លាំងជំនាញចុះស្រាវជ្រាវហើយ ។ ប៉ុន្តែម្ចាស់ផ្ទះជួលបានបញ្ជាក់ដែរថា តាំងពីពេលកើតហេតុ រហូតមកដល់ព្រឹកថ្ងៃទី១៧ កុម្ភៈ សមត្ថកិច្ចមិនទាន់ចុះទៅសាកសួរគាត់អំពីព័ត៌មាននេះទេ ។ នេះជាមេរៀនសម្រាប់អ្នកប្រកបរបររត់ម៉ូតូឌុបមួយចំនួន ដែលចូលចិត្តឌុបម៉ូយស្រីៗគួរតែមានការប្រុងប្រយ័ត្នផង ៕
ចែករំលែកព័តមាននេះ