រាជធានីភ្នំពេញ ៖ អាជ្ញាធររាជធានីភ្នំពេញបានអះអាងថា ប្រជាពលរដ្ឋមួយផ្នែកធំដែលរស់នៅក្នុងខណ្ឌមានជ័យ ខណ្ឌសែនសុខ និងខណ្ឌទួលគោក នឹងអស់ក្តីកង្វល់អំពីបញ្ហាលិចលង់ដោយជំនន់ទឹកភ្លៀងទៀតហើយ បន្ទាប់ពីប្រឡាយស្ទឹងមានជ័យបានស្ថាបនារួច ។
លោកសាំ ពិសិដ្ឋ នាយកមន្ទីរសាធារណការនិងដឹកជញ្ជូនរាជធានីភ្នំពេញបានឱ្យដឹងថា ការដ្ឋានស្ថាបនាប្រឡាយស្ទឹងមានជ័យ តំណាក់កាលទី១ជិតរួចរាល់ហើយ ពេលនេះក្រុមការងារកំពុងត្រៀមបន្តអនុវត្តន៏គម្រោងជំហានទី២បន្តទៀត ។ លោកបន្តថា ប្រឡាយស្ទឹងមានជ័យនេះមានប្រវែង១៤៩៨ម៉ែត្រ ដោយចាក់បេតុងបុកស៊ីផាយទទឹង៨ម៉ែត្រ ការសាងសង់ត្រូវ បានបែងចែកជា៤តំណាក់កាល ដោយតំណាក់កាលទី១ មានប្រវែង៣២៦ម៉ែត្រ សងខាងប្រឡាយសរុបប្រវែង៦៥២ម៉ែត្រ ហើយក្នុងតំណាក់កាលទី១នេះ ក្រុមការងារបានសម្រេចការងាររបស់ខ្លួនបាន៩៥ភាគរយ ចំណែកការចាក់ដីបំពេញដើម្បីផ្តល់កម្មសិទ្ធិជូនប្រជាពលរដ្ឋ ក្រុមការងារចាក់ដីបានជិតរួចរាល់ រីឯការងារកាយភក់ចេញពីបាតប្រឡាយគឺអនុវត្តន៏បាន១០០ភាគរយតែម្តង ។
លោកសាំ ពិសិដ្ឋ បានឲ្យដឹងទៀតថា ប្រឡាយស្ទឹងមានជ័យដែលរដ្ឋបាលរាជធានីភ្នំពេញធ្វើការអភិវឌ្ឍនេះ ឆ្លងកាត់ខណ្ឌចំនួន២នោះគឺខណ្ឌមានជ័យ និងខណ្ឌសែនសុខ ដែលមានប្រជាពលរដ្ឋរស់នៅ និងរងផលប៉ះពាល់ប្រឡាយនេះចំនួន៥៦២គ្រួសារ ហើយប្រជាពលរដ្ឋទាំងអស់នេះនឹងទទួលបានដីទំហំ៤គុណនឹង៦ម៉ែត្រជាកម្មសិទ្ធិស្របច្បាប់នៅហ្នឹងកន្លែងតែម្តង ។
លោកបន្តថា ប្រឡាយនេះត្រូវសាងសង់ឡើង ដោយបុកបេតុងស៊ីផាយដូចនៅប្រឡាយបាក់ទូកដែរ ដោយត្រូវធ្វើផ្លូវ៦ម៉ែត្រជាប្រភេទផ្លូវបេតុង រៀបចំតបណ្តាញទឹកភ្លើងអគ្គីសនីចូលផ្ទះប្រជាពលរដ្ឋ ដាក់បង្គោលភ្លើងសាធារណៈនៅលើផ្លូវនេះថែមទៀត ។ លោកនាយកមន្ទីរសាធារណការនិងដឹកជញ្ជូនរាជធានីភ្នំពេញ បានបញ្ជាក់ថា ប្រឡាយស្ទឹងមានជ័យ បានដើរតួយ៉ាងសំខាន់ ក្នុងការនាំទឹកទំលាក់ចូលទៅបឹងទំពុន ដែលតួប្រឡាយមានទំហំ៨ម៉ែត្រ ចិញ្ចើម២ម៉ែត្រ សាងសង់ផ្លូវបេតុងទទឹង៦ម៉ែត្រ ផ្លូវមុខផ្ទះ៥ម៉ែត្រ ដីនៅសល់មុខផ្ទះ១ម៉ែត្រកន្លះ និងក្រោយផ្ទះកន្លះម៉ែត្រផងដែរ ៕
ចែករំលែកព័តមាននេះ