ខេត្តកំពង់ឆ្នាំង ៖ ការចិញ្ចឹមត្រីអណ្តែងតាមបែក្នុងទន្លេ គឺល្អប្រសើរជាងការចិញ្ចឹមក្នុងរណ្តៅក្រាលថង់ប្លាស្ទិក ព្រោះទឹកទន្លេធំ ហើយយើងមិនលំបាកផ្លាស់ប្តូរទឹកដូចក្នុងរណ្តៅថង់ប្លាស្ទិកឡើយ ។ នេះជាប្រសាសន៍របស់លោក សោម ភិរុណ នាយខណ្ឌរដ្ឋបាលជលផលខេត្ត បានអំពាវនាវដល់ប្រជានេសាទ ឲ្យផ្លាស់ប្តូរឥរិយាបថមកចិញ្ចឹមត្រីអណ្តែងតាមបច្ចេកទេសរបស់ជលផល ។
លោកបន្តថា ប្រជាពលរដ្ឋចំនួន១២គ្រួសារនៅក្នុងភូមិឆ្នុកទ្រូ ឃុំឆ្នុកទ្រូ បានទទួលការឧបត្ថម្ភជំហានដំបូងពីសហគមន៍អឺរុប ក្នុងការចិញ្ចឹមត្រីអណ្តែង ទាំងពូជត្រី ស្បៃមុង និងចំណី។ លោកថា ៖« ការចិញ្ចឹមត្រីអណ្តែងក្នុងបែត្រឹមតែរយៈពេល២ខែ គឺយើងអាចចាប់លក់ ឬបរិភោគខ្លួនឯងបាន ដែលត្រី៤ទៅ៥ក្បាល ស្មើនឹង១គីឡូក្រាម ហើយចំណេញបានពី៦០ទៅ៧០ម៉ឺនរៀល ។ បើចិញ្ចឹមបានធំល្អ យើងអាចចំណេញបានដល់ទៅ១លានរៀលឯណោះ » ។
លោកបញ្ជាក់ថា ជាធម្មតា ការចិញ្ចឹមត្រីអណ្តែងត្រឹម៤ទៅ៥ក្បាលស្មើ១គីឡូក្រាម គេចាប់លក់ហើយ មិនទុកឲ្យវាធំពេកទេ ព្រោះគេមិនសូវហ៊ានទិញបរិភោគឡើយ ។ ដូចនេះ លោកស្នើសុំប្រជាពលរដ្ឋចិញ្ចឹមត្រីអណ្តែងបន្តទៀត ដើម្បីជួយលើកស្ទួយសេដ្ឋកិច្ចក្នុងក្រុមគ្រួសារឲ្យមានជីវភាពធូរធារ ។
លោក សាំង ស៊ន មេឃុំឆ្នុកទ្រូ បានថ្លែងអំណរគុណដល់សហគមន៍អឺរ៉ុប និងមន្ត្រីជលផលខេត្ត ដែលបានជួយឧបត្ថម្ភទាំងពូជត្រី ស្បៃមុង និងចំណីដល់ប្រជាពលរដ្ឋចំនួន១២គ្រួសារនេះ ហើយលោកក៏បានស្នើសុំសហគមន៍អឺរ៉ុបមេត្តាជួយឧបត្ថម្ភជាបន្តបន្ទាប់ទៀត ។
ជាមួយគ្នានេះ លោកមេឃុំក៏បានសំណូមពរផងដែរដល់ប្រជានេសាទ សូមផ្លាស់ប្តូរពីការនេសាទខុសច្បាប់ ងាកមកចិញ្ចឹមត្រីអណ្តែងវិញ ដោយមានការបណ្តុះបណ្តាលពីមន្ត្រីជំនាញជលផល ពីរបៀបចិញ្ចឹមត្រីរយៈពេលខ្លីបានត្រីបរិភោគ និងលក់នៅទីផ្សារ ដើម្បីយកប្រាក់ជួយដល់គ្រួសារផងដែរ ។
សូមបញ្ជាក់ថា ការចិញ្ចឹមត្រីអណ្តែងក្នុងបែ ក្រៅពីឲ្យចំណីដែលទិញពីទីផ្សារហើយ អ្នកចិញ្ចឹមក៏អាចឲ្យចំណីសល់ពីផ្ទះបាយផងដែរ ដូចជា បាយ ត្រកួន និងបន្លែផ្សេងទៀត ឬអាចយកកន្ទក់ច្របាច់លាយជាមួយបាយឲ្យត្រីស៊ីក៏បាន ៕
ចែករំលែកព័តមាននេះ