ខេត្តកំពង់ឆ្នាំង ៖ ក្មេងប្រុសអាយុ១៤ឆ្នាំម្នាក់បានស្លាប់ ដោយសារឆក់ចរន្តភ្លើងដែលបានបង្កៃ ខណៈដែលក្មេងប្រុសនោះចូលទៅក្នុងតូបលក់ដូរ ។ ចរន្តភ្លើងដែលបានឆក់យកជីវិតក្មេងប្រុសនេះត្រូវបានគេដឹងថា ម្ចាស់តូបបានរាយខ្សែភ្លើង សម្រាប់ឆក់ជនខិលខូចដែលតែងតែលបលួចអីវ៉ាន់របស់ខ្លួន ។ ហេតុការណ៍នេះបានកើតឡើងនៅយប់ថ្ងៃទី២៦ ឧសភា ក្នុងភូមិតាំងត្បែង ឃុំធ្លកវៀន ស្រុកសាមគ្គីមានជ័យ ។
សមត្ថកិច្ចនគរបាលជំនាញដែលបានទៅពិនិត្យនិងធ្វើកោសល្យវិច័យបានឱ្យដឹងថា កុមារារងគ្រោះឈ្មោះ ហ៊ន សីហា ហៅវីន អាយុ១៤ឆ្នាំ មានទីលំនៅភូមិឃុំកើតហេតុខាងលើ ចំណែកម្ចាស់តូបលក់ដូរ ឈ្មោះ ស៊ុំ ចាន់ធីម ហៅម៉ៅ ភេទប្រុស អាយុ២៨ឆ្នាំ មានទីលំនៅភូមិឃុំជាមួយគ្នា ។ តាមការសន្និដ្ឋានរបស់សមត្ថកិច្ចនគរបាលបានឱ្យដឹងថា មុនពេលកើតហេតុ នៅម៉ោងប្រមាណជា៩យប់ កុមារារងគ្រោះជាមួយនឹងក្មេងដទៃទៀត បាននាំគ្នាត្រឡប់ពីដើរលេងវិញ ក៏បែកគ្នាអស់ទៅ ។
ពេលនោះក្មេងប្រុសរងគ្រោះក៏បានលបឡើងចូលក្នុងតូបលក់ដូររបស់ឈ្មោះ ស៊ុំ ចាន់ធីម ហៅម៉ៅ ហើយក៏បានឆក់ចរន្តភ្លើងដែលម្ចាស់តូបរាយជាអន្ទាក់នៅខាងក្នុងតូប បណ្តាលឱ្យស្លាប់តែម្តង ។ ប៉ុន្តែព្រឹកឡើង ស្រាប់តែឃើញសពក្មេងប្រុសរងគ្រោះនៅចម្ងាយពីតូបលក់ដូររបស់ឈ្មោះ ស៊ុំ ចាន់ធីម ហៅម៉ៅ ចម្ងាយជាង៥ម៉ែត្រទៅវិញ ។ ចំណុចនេះសមត្ថកិច្ចសង្ស័យថា នៅព្រឹកនោះ ពេលម្ចាស់តូបបើកទ្វារលក់ដូរប្រទះឃើញសពកុមាររងគ្រោះហើយ ក៏បានអូសចេញពីតូបយកមកដាក់នៅខាងក្រៅ ដែលមានចម្ងាយប្រមាណជា៥ម៉ែត្រពីតូបរបស់ខ្លួន ព្រោះនៅលើខ្លួនសពកុមាររងគ្រោះ មានស្លាកស្នាមអូសរលាត់ខ្នងនិងរបូតខោ ។
តាមការសារភាពរបស់ឈ្មោះ ស៊ុំ ចាន់ធីម ហៅម៉ៅ ជាម្ចាស់តូបថា គាត់បានមកសុំដីរបស់បងប្អូនធ្វើតូបលក់ដូរនេះយូរហើយ តែមិនបានដេកនៅក្នុងតូបនេះទេ គឺទៅដេកផ្ទះដែលនៅទល់មុខគ្នានឹងតូបលក់ដូរនោះ ហើយខ្លួនពិតជាបានរាយខ្សែភ្លើងជាអន្ទាក់មែន ព្រោះធ្លាប់បាត់របស់របរ និងលុយកាក់ក្នុងតូបរបស់ខ្លួនជាច្រើនលើកមកហើយ។
ម្ចាស់តូបលក់ដូរខាងលើ ត្រូវបានសមត្ថកិច្ចកសាងសំណុំរឿងបញ្ជូនមកស្នងការដ្ឋាននគរបាលខេត្ត ដើម្បីរៀបចំសំណុំរឿងបញ្ជូនទៅតុលាការបន្តនីតិវិធី ៕
ចែករំលែកព័តមាននេះ