ខេត្តកំពង់ឆ្នាំង ៖ មានរឿងភ្ញាក់ផ្អើលមួយបានឡើងកាលពីល្ងាចថ្ងៃទី២៨ ខែឧសភា ឆ្នាំ២០១៨ បន្ទាប់ពីលោកមេភូមិព្រះរាមរង្សី ឃុំជ្រៃបាក់ ស្រុករលាប្អៀរ បានផ្ញើរូបភាពវត្ថុបុរាណទៅឱ្យលោកស្មៀនឃុំជ្រៃបាក់ ស្រុករលាប្អៀរ ដោយអះអាងថា ព្រះចៅអធិការវត្តព្រះរាមរង្សីគាស់បានវត្ថុបុរាណ បន្ទាប់មកស្មៀនឃុំបានឆាតរូបនោះបន្តទៅឱ្យអ្នកកាសែតដឹង ហើយក៏មានការភ្ញាក់ផ្អើលនាំគ្នាទៅថតរូបភាព និងយកព័ត៌មាន ប៉ុន្តែពេលទៅជួបលោកមេភូមិគាត់និយាយថា គាត់បង្ហោះរូបនោះលេងសើចជាមួយស្មៀនឃុំទេ ។ ប៉ុន្តែអ្នកកាសែត និងលោកប្រធានមន្ទីរវប្បធម៌ និងវិចិត្រសិល្បៈខេត្តមិនជឿ ហើយក៏បានបង្ហាញរូបភាពក្នុងឆាតដេញដោលសួរព្រះចៅអធិការវត្ត ទើបព្រះចៅអធិការវត្ត ព្រមបង្ហាញវត្ថុបុរាណនោះដល់ក្រុមអ្នកកាសែត និងលោកសុខ ធួក ប្រធានមន្ទីរវប្បធម៌ខេត្ត ដើម្បីត្រួតពិនិត្យ។
នៅក្នុងរឿងនេះ ព្រះចៅអធិការវត្តព្រះរាមរង្សី ព្រះនាម នៅ ជឿន ព្រះជន្ម៧២វស្សា បានមានថេដីកាថា ជារៀងរាល់ថ្ងៃ ព្រះអង្គចេះតែស្រម៉ៃថា «បើរើសបានកំណប់មួយកំណប់មក នឹងបានលុយយកទៅធ្វើព្រះវិហារបន្ត ដែលបច្ចុប្បន្នកំពុងជំពាក់គេចំនួនជាង៧០លានរៀល» ។
បន្ទាប់មក នៅយប់ថ្ងៃទី២០ ខែឧសភា ព្រះអង្គបានសុបិន្តមានកុមារមានបុណ្យអាយុ៥ឆ្នាំ ព្រះនាម ឧត្តម
នមោ ឱ្យទៅគាស់វត្ថុបុរាណមានតម្លៃនៅក្នុងដី តែមិនដឹងថានៅទីណាទេ ដើម្បីយកមកលក់កសាងព្រះវិហារដែលកំពុងជំពាក់គេជាង៧០លានរៀល។ ពេលនោះព្រះអង្គហាក់ដូចជាដើរទៅគាស់កំណប់តែមួយអង្គឯង ហើយពេលត្រឡប់មកវិញ ពេលដឹងព្រះកាយ គឺព្រះអង្គបានឈរនៅក្នុងកុដិដោយមានកាន់វត្ថុ
បុរាណ៣គ្រឿងផងដែរ។ ថ្ងៃបន្ទាប់មក ព្រះអង្គបានរកគេមើលវត្ថុបុរាណនោះ គេថា គ្មានតម្លៃនោះទេ ពេលដឹងថា គ្មានតម្លៃ ក៏បានលាក់វត្ថុបុរាណនោះទុក ។ ប៉ុន្តែនៅរសៀលថ្ងៃទី២៨ ខែឧសភានេះ ព្រះអង្គក៏បានបង្ហាញវត្ថុបុរាណទាំងនោះ និងមានថេដីកាប្រាប់លោក ហាក់ មេភូមិព្រះរាមរង្សី ហើយក៏បែកធ្លាយរឿងនេះដល់ស្មៀនឃុំ និងបែកធ្លាយដល់អ្នកកាសែត និងលោកប្រធានមន្ទីរវប្បធម៌ខេត្តតែម្តង។
ទាក់ទងនឹងវត្ថុបូរាណនេះ ក្រោយពីលោក សុខ ធួក ប្រធានមន្ទីរវប្បធម៍ និងវិចិត្រសិល្បៈខេត្តកំពង់ឆ្នាំង រូមនឹងមន្ត្រីជំនាញបានត្រួតពិនិត្យមើលយ៉ាងយកចិត្តទុកដាក់រួចមក លោកបានឱ្យដឹងថា វត្ថុលោហៈទាំង៣គ្រឿងនេះមានរូបមាន់២គ្រឿង និងរូបឃ្លោកមានព្រះនិងលោកតាកំប៉ោងរបស់ចិន មិនមែនជាវត្ថុបុរាណរបស់ខ្មែរទេ គឺជាវត្ថុដែលគេកសាងក្នុងសម័យបច្ចុប្បន្ន នេះតាមរចនាបថសាសនាចិន ដោយនៅបាតខាងក្រោមមានអក្សរចិនជាភស្តុតាង ។ វត្ថុនេះ គេធ្វើដើម្បីលក់ ហើយអ្នកទិញយកដាក់តាំងលំអក្នុងផ្ទះតែប៉ុណ្ណោះ មិនមានតម្លៃជារបស់បុរាណឡើយ ហើយរបស់នេះទៀត មិនមានភស្តុតាងណាបង្ហាញថា បានកប់ក្នុងដីនោះដែរ ជារបស់ដែលនៅលើដី ។
លោកក៏បានសំណូមពរដល់ប្រជាលរដ្ឋនៅក្នុងមូលដ្ឋាន សូមកុំចេះតែជឿនូវជំនឿអរូបិយផ្តេសផ្តាស នាំឱ្យចាញ់ឧបាយកលគេ ដូចជាយកទឹកទៅស្រោចលើវត្ថុលោហៈនេះយកមកទទួលទានដើម្បីព្យាបាលជម្ងឺផ្សេងៗ ប្រយត្ន័ពុលរាករូសនាំឱ្យមានគ្រោះថ្នាក់ដល់ខ្លួន ព្រោះរឿងខ្លះគឺជារឿងប្រឌិតដើម្បីអោយគេជឿដើម្បីអ្វីមួយតែប៉ុណ្ណោះ ៕
ចែករំលែកព័តមាននេះ