ខេត្តកណ្តាល ៖ ក្រុមជួញដូរគ្រឿងញៀនពីរនាក់ត្រូវបានឃាត់ខ្លួនវាយខ្នោះ ក្នុងចំណោមបក្ខពួកបីនាក់ ម្នាក់រត់រួចខ្លួន ខណៈដែលកម្លាំងអធិការនគរបាលស្រុកស្អាង ដឹកនាំដោយលោកវរសេនីយ៍ សេង សុជាតិ អធិការនគរបាលស្រុកស្អាង សហការជាមួយកម្លាំងប៉ុស្តិ៍រដ្ឋបាល ចុះបង្ក្រាបករណីជួញដូរគ្រឿងញៀន បានថ្នាំញៀន២៤កញ្ចប់ មានកញ្ចប់តូច កញ្ចប់ធំ និងវត្ថុតាងមួយចំនួនទៀត។ ហេតុការណ៍ចុះបង្ក្រាប នេះបានកើតឡើងនៅថ្ងៃច័ន្ទ ១៤កើត ខែជេស្ឋ ឆ្នាំច សំរិទ្ធស័ក ព.ស២៥៦២ ត្រូវនឹងថ្ងៃទី២៨ ខែឧសភា ឆ្នាំ២០១៨ វេលាម៉ោង២រសៀល នៅចំណុចផ្ទះរបស់ឈ្មោះ អែម ប្រុស ហៅម៉ៅ ស្ថិតក្នុងភូមិ ព្រែកតាឡៃ ឃុំព្រែកអំបិល ស្រុកស្អាង ខេត្តកណ្តាល។
លោកវរសេនីយ៍ សេង សុជាតិ អធិការនគរបាលស្រុកស្អាង បញ្ជាក់ថា ជនសង្ស័យទី០១-ឈ្មោះ អែម ប្រុស ហៅម៉ៅ ភេទប្រុស អាយុ២៥ឆ្នាំ ជនជាតិខ្មែរ មុខរបរ បើកឡាន ទីលំនៅបច្ចុប្បន្នភូមិ ព្រែកតាឡៃ ឃុំព្រែកតាឡៃ ស្រុកស្អាង ខេត្តកណ្តាល ទី០២-ឈ្មោះ មាស សុនណារ៉ាក់ ហៅភ្នំ ភេទប្រុស អាយុ២៧ឆ្នាំ ជនជាតិខ្មែរ មុខរបរកសិករ ទីលំនៅបច្ចុប្បន្នភូមិ ព្រែកតាឡៃ ឃុំព្រែកអំបិល ស្រុកស្អាង ខេត្តកណ្តាល និងទី០៣-ឈ្មោះ សាន វណ្ណី ហៅអំបិល ភេទប្រុស អាយុ២៣ឆ្នាំ ជនជាតិខ្មែរ មុខរបរមិនពិតប្រាកដ ទីលំនៅបច្ចុប្បន្នភូមិ ព្រែកតាឡៃ ឃុំព្រែកអំបិល ស្រុកស្អាង ខេត្តកណ្តាល(គេចខ្លួនបាត់)។ លោកអធិការបញ្ជាក់បន្ថែមថា នៅថ្ងៃទីខែឆ្នាំវេលាម៉ោងកើតហេតុ ក្រោយទទួលបានព័ត៌មានពីប្រជាពលរដ្ឋល្អថា មានករណីជួញដូរគ្រឿងញៀន នៅចំណុចកើតហេតុខាងលើ។ ភ្លាមនោះកម្លាំងផ្នែកប្រឆាំងបទល្មើសគ្រឿងញៀន សហការជាមួយ កម្លាំងប៉ុស្តិ៍នគរបាលព្រែកអំបិល និងក្រុមប្រឹក្សាឃុំ ,លោកមេភូមិ បានចុះដល់ចំណុចកើតហេតុ ធ្វើការត្រួតពិនិត្យឆែកឆេរបន្ទប់របស់ជនសង្ស័យឈ្មោះ អែម ប្រុស ហៅម៉ៅ បានរកឃើញម្សៅក្រាម ពណ៌សថ្លា សង្ស័យជាសារធាតុញៀន(ម៉ាទឹកកក) ចំនួន២៣កញ្ចប់ (ធំ០១កញ្ចប់ ,តូច២២កញ្ចប់) នៅក្នុងបន្ទប់ក្រោមផ្ទះ រួចឃាត់ខ្លួនជនសង្ស័យ រួមនឹងវត្ថុតាងដើម្បីសាកសួរ។
នៅចំពោះមុខសមត្ថកិច្ចនគរបាល ឈ្មោះ អែម ប្រុស ហៅម៉ៅ បានសារភាពថា ឈ្មោះ សាន វណ្ណី ហៅ អំបិល បានឲ្យគ្រឿងញៀន(ម៉ាទឹកកក) ចំនួន២៣កញ្ចប់ (ធំ០១កញ្ចប់ ,តូច២២កញ្ចប់) មកខ្លួន(អែម ប្រុស) លក់ក្នុង០១កញ្ចប់តូច ៥០,០០០៛ (ប្រាំម៉ឺនរៀល) និង០១កញ្ចប់ធំ តម្លៃ ២០០,០០០៛ (ម្ភៃម៉ឺនរៀល) លក់អស់គ្រឿងញៀន(ម៉ាទឹកកក) លុយចំណេញចែកគ្នា។ ទន្ទឹមនឹងនោះ ឈ្មោះ អែម ប្រុស ហៅម៉ៅ បានសារភាពទៀតថា ឈ្មោះ មាស សុនណារ៉ាក់ ហៅភ្នំ បានយកគ្រឿងញៀន(ម៉ាទឹកកក)ចំនួន ០១កញ្ចប់តូច ពីខ្លួន (អែម ប្រុស) ដើម្បីយកទៅលក់ឲ្យគេមិនស្គាល់ឈ្មោះ បានតម្លៃ ៥០,០០០៛ ។ បច្ចុប្បន្នជនសង្ស័យទាំងពីរនាក់ បានឃាត់ខ្លួននៅអធិការដ្ឋាននគរបាលស្រុកស្អាង ដើម្បីបន្ដអនុវត្ដតាមនីតិវីធី៕
https://youtu.be/g7CDFHQFSnM
ចែករំលែកព័តមាននេះ