ខេត្តក្រចេះ ៖ ទូកដចម្លង១គ្រឿង បានក្រឡាប់លិចនៅមាត់ច្រាំងទន្លេ ខណៈរថយន្តយីឌុបដឹកឈើ២គ្រឿង បើកឡើងលើទូកចម្លងឆ្លងទន្លេ តែទំនងខុសបច្ចេកទេស ក៏ត្រូវដាំទីងទាំងរថយន្តដឹកឈើនិងទូកចម្លងក្រឡាប់ចូលទឹកតែម្តង ។
សេចក្តីរាយការណ៍ឱ្យដឹងថា ហេតុការណ៍នេះកើតឡើងកាលពីវេលារំលងអធ្រាតឈានចូលថ្ងៃទី២៥ ខែ ឧសភា នៅត្រើយខាងលិច ក្នុងឃុំជ្រោយបន្ទាយ ស្រុកព្រែកប្រសព្វ ។ សូមបញ្ជាក់ថា រថយន្តដឹកឈើ២គ្រឿងដែលលិចចូលក្នុងទន្លេនេះ គឺនៅក្នុងចំណោមរថយន្តដឹកឈើចំនួន៨គ្រឿង ។អធិការនគរបាលស្រុកព្រែកប្រសព្វ លោកវរសេនីយ៍ឯក ចាន់ សុផល្លា បានឲ្យដឹងថា ករណីក្រឡាប់ទូកចម្លងឫស្សីចារ-ជ្រោយបន្ទាយនេះ កើតឡើងដោយសារតែរថយន្តយីឌុបដឹកឈើ២គ្រឿងរបស់ក្រុមហ៊ុន ដឹកជញ្ជូនឈើឆ្លងឆ្ពោះទៅត្រើយខាងកើត ក្នុងឃុំថ្មគ្រែ ស្រុកចិត្របុរី ។ ពេលនោះរថយន្តទី១ បានបើកចូលទូកចម្លងរួចជាស្ថាពរហើយ រីឯរថយន្តទី២ក៏បើកចូលបន្តទៀត ។ នៅពេលបើកចូលទៅ ស្រាប់តែទូកចម្លងចាប់ផ្តើមផ្អៀងបន្តិចម្តងៗ ធ្វើឲ្យមនុស្សម្នាដែលនៅលើទូកចម្លងនោះលោតគេចខ្លួនចេញអស់ ហើយភ្លាមៗនោះទូកចម្លងក៏ក្រឡាប់តែម្តង ។
លោកអធិការបញ្ជាក់ថា ហេតុការណ៍ក្រឡាប់ទូកដចម្លងនេះ បណ្តាលឲ្យរថយន្តដឹកឈើទាំង២គ្រឿងលិចចុះទៅក្នុងទន្លេជាប់មាត់ច្រាំង តែមិនមានមនុស្សណាម្នាក់រងគ្រោះថ្នាក់ទេ ព្រោះទាំងអ្នកបើកបរ ព្រូ និងអ្នកដំណើរផ្សេងទៀតបានលោតចុះពីលើទូកចម្លងចូលទឹកទន្លេ ។ សេចក្តីរាយការណ៍បានឱ្យដឹងថា រថយន្តយីឌុបដឹកឈើទាំង២គ្រឿងនេះ ស្ថិតក្នុងចំណោមរថយន្តចំនួន៨គ្រឿងដែលគេស្គាល់ថា ជារបស់ក្រុមហ៊ុនស៊ីងបាយអូថេក ប្រទេសកូរ៉េ ជាក្រុមហ៊ុនវិនិយោគមួយមានទីតាំងស្ថិតនៅក្នុងឃុំវឌ្ឍនៈ ស្រុកសំបូរ ។
មេបញ្ជាការកងរាជអាវុធហត្ថខេត្ត លោក សាន្ត ប៊ុនថាន បានឲ្យដឹងថា ឈើដែលដឹកជញ្ជូនតាមរថយន្តទាំងនោះជាឈើកែច្នៃ និងមានច្បាប់ដឹកជញ្ជូនត្រឹមត្រូវ ៕
ចែករំលែកព័តមាននេះ