ជើងថ្មីមែនក្លាយជាម្ចាស់ពាន ខណៈជើងចាស់បានត្រឹមលេខ3 មិនគួរឱ្យជឿ
- ភ្នំពេញ
រាជធានីភ្នំពេញ ៖ ការប្រកួតផ្ដាច់ព្រ័ត្រដណ្ដើមពានជើងឯកព្រឹត្តិការណ៍TV5 Knock Out Series By K-Cement នៅប៉ុស្ដិ៍លេខ៥ កាលពីថ្ងៃទី២៦…
រាជធានីភ្នំពេញ ៖ ការប្រកួតផ្ដាច់ព្រ័ត្រដណ្ដើមពានជើងឯកព្រឹត្តិការណ៍TV5 Knock Out Series By K-Cement នៅប៉ុស្ដិ៍លេខ៥ កាលពីថ្ងៃទី២៦…
រាជធានីភ្នំពេញ ៖ ការប្រកួតផ្ដាច់ព្រ័ត្រដណ្ដើមពានជើងឯកព្រឹត្តិការណ៍TV5 Knock Out Series By K-Cement នៅប៉ុស្ដិ៍លេខ៥ កាលពីថ្ងៃទី២៦ ឧសភា បានបញ្ចប់ហើយ បន្ទាប់ពីកីឡាករជើងខ្លាំង៤រូបឡើងប្រកួតគ្នា ដើម្បីស្វែងរកអ្នកឈរនៅក្នុងចំណាត់ថ្នាក់លេខ១ ដល់លេខ៤ ។ អ្វីដែលគេចាប់អារម្មណ៍ខ្លាំងក្នុងការប្រកួតលើកនេះគឺកីឡាករជើងខ្លាំងដែលមានបទពិសោធន៍ច្រើន និងធ្លាប់ល្បីឈ្មោះជាយូរមកហើយគឺយុគ យក្សផ្លែ ទទួលបានត្រឹមតែចំណាត់ថា្នក់លេខ៣ប៉ុណ្ណោះក្នុងពេលកីឡាករជើងថ្មីដែលគេមិនសូវស្គាល់ធន់ មករា បែរជាដណ្ដើមបានចំណាត់ថ្នាក់លេខ១មិនគួរឱ្យជឿ។
ការប្រកួតពេលនោះធ្វើឱ្យអ្នកទស្សនាពេញចិត្តយ៉ាងខ្លាំងជាពិសេសគូដណ្ដើមជើងឯកទទួលការគាំទ្រខ្លាំងជាងគូអន្តរជាតិទៅទៀតដោយសារកីឡាករទាំង៤រូបដែលឡើងប្រកួតបញ្ចេញស្នៀតគុនវាយគ្នាមិនដកដៃធ្វើឱ្យសង្វៀនទាំងមូលឡើងកម្ដៅមិនឈប់ឈរ ។ ការប្រកួតដណ្ដើមពានជើងឯកក្នុងប្រភេទទម្ងន់៥៧គីឡូក្រាមនោះ កីឡាករ៤រូបរួមមាន កីឡាករ សង គង់ និងកីឡាករយុគ យក្សផ្លែ ប្រកួតគ្នាដណ្ដើមយកចំណាត់ថ្នាក់លេខ៣ និងកីឡាករវ័យក្មេង ធន់ មករា ប្រកួតជាមួយកីឡាករ លន បញ្ញា ដណ្ដើមយកចំណាត់ថ្នាក់លេខ១ ឬចំណាត់ថ្នាក់ជើងឯក ។
ជាលទ្ធផលកីឡាករជើងថ្មីក្ដោបក្ដាប់បានចំណាត់ថ្នាក់លេខ១ លេខ២ និងលេខ៤ក្នុងពេលកីឡាករជើងចាស់យុគ យក្សផ្លែ បានត្រឹមតែចំណាត់ថ្នាក់លេខ៣ប៉ុណ្ណោះ ។ នៅក្នុងព្រឹត្តិការណ៍នេះ យុគ យក្សផ្លែ មិនមែនជាកីឡាករជើងចាស់តែម្នាក់ដែលទៅមិនរួចជាមួយកីឡាករជើងថ្មីនោះទេ គឺមានកីឡាករជាច្រើនទៀតសុទ្ធតែត្រូវកីឡាករក្មេងៗវាយទម្លាក់ឱ្យហាលអាវគ្មានសល់ ។ អ៊ីចឹងហើយទើបគេចាត់ទុកថា យុគ យក្សផ្លែ ជាកីឡាករជើងចាស់តែម្នាក់គត់ ដែលឡើងមកដល់វគ្គនេះហើយបានត្រឹមចំណាត់ថ្នាក់លេខ៣ប៉ុណ្ណោះ ។
ទោះបីយ៉ាងណាលទ្ធផលនេះ ក៏ត្រូវបានចាត់ទុកល្អផងដែរ បើធៀបនឹងកីឡាករជើងចាស់ផ្សេងទៀត ដែលឡើងបានត្រឹមវគ្គជម្រុះ១៦នាក់យក៨នាក់ក៏ជ្រុះបាត់អស់ ។ កីឡាករវ័យក្មេង ធន់ មករា គឺជាអ្នកដណ្ដើមបានចំណាត់ថ្នាក់លេខ១ ហើយបានក្លាយខ្លួនជាជើងឯករដូវកាលថ្មី អមដោយប្រាក់រង្វាន់រហូតដល់៤.០០០ដុល្លារ។
ព្រឹត្តិការណ៍នេះត្រូវគេដឹងថា បើកការប្រកួតបាន២រដូវកាលមកហើយ ដោយក្នុងមួយរដូវកាលប្រើពេលប្រមាណជាង៣ខែហើយកីឡាករដែលត្រូវចូលរួមប្រកួតក៏មានចំនួនរហូតដល់៣២រូបតម្រូវឱ្យចាប់គូគ្នាប្រកួតទម្លាក់ម្ដងពាក់កណ្ដាល។
ការប្រកួតបានចាប់ផ្ដើមពីការប្រកួតចាញ់ធ្លាក់ៗពី៣២នាក់មក១៦នាក់ និងបន្តពី១៦នាក់មក៨នាក់ និងពី៨នាក់យក៤នាក់ដើម្បីឱ្យអ្នកទាំង៤ឡើងប្រកួតគ្នានៅវគ្គចុងក្រោយ ។ ក្រោយប្រកួតក្នុងវគ្គពាក់កណ្ដាលផ្ដាច់ព្រ័ត្រ កីឡាករវ័យក្មេង២រូប គឺធន់ មករា និង លន បញ្ញា ក្លាយជាសមាសភាព២នាក់ឡើងប្រកួតដណ្ដើមយកតំណែងជើងឯកនៅប៉ុស្ដិ៍លេខ៥ ។ ជាលទ្ធផលកីឡាករ ធន់ មករា បានយកឈ្នះគូប្រកួតក្លាយជាម្ចាស់ពាន និងទទួលបានទឹកប្រាក់៤ពាន់ដុល្លារ ខណៈជ័យជម្នះរបស់កីឡាកររូបនេះកើតឡើងដោយសារតែការប្រើអស់បច្ចេកទេស វាយលុកមិនញញើតគូប្រកួត។
លោក សេង កដិកា អ្នករៀបចំការប្រកួតប្រចាំសង្វៀនទូរទស្សន៍ប៉ុស្តិ៍លេខ៥បានអះអាងថា ការប្រកួតដែលបានបញ្ចប់ទៅធ្វើឱ្យកីឡាករខ្លាំងៗដែលមានសមត្ថភាពលេចចេញផ្លែផ្កាគួរឱ្យកត់សម្គាល់ ។ លោកថា ការប្រកួតនៅក្នុងវគ្គនេះ កីឡាករទាំង៣២រូបសុទ្ធតែជាជើងខ្លាំងនិងល្បីឈ្មោះនៅក្នុងពិភពប្រដាល់ ក្នុងនោះក៏មានកីឡាករជើងចាស់មួយចំនួនក៏បានលេចមុខផងដែរ ប៉ុន្តែកីឡាករទាំងនោះបែរជាត្រូវជ្រុះបាត់ម្ដងម្នាក់ៗបន្ទាប់ពីការប្រកួតជម្រុះកាន់តែតម្រូវឱ្យកីឡាករថ្មីៗត្រៀមខ្លួនខ្លាំងក្លា ។
ជាក់ស្ដែងកីឡាករជើងថ្មីបានក្លាយជាអ្នកទម្លាក់កីឡាករជើងចាស់ និងក្លាយជាអ្នកកាន់ពានជើងឯកធ្វើឱ្យកីឡាករជើងចាស់ចាប់ផ្ដើមផ្អើល លែងហ៊ានមើលស្រាលកីឡាករជើងថ្មីទៀតហើយ ។ លោកថា ម្ចាស់ពានដែលទើបរកឃើញនេះ មិនសូវមានបទពិសោធន៍ឡើងប្រកួតច្រើនទេ ប៉ុន្តែបើនិយាយពីសមត្ថភាព និងការតស៊ូគឺខ្លាំងក្លា ដែលនឹងក្លាយជាធនធានកីឡាករកាន់តែប្រសើរនាពេលអនាគត៕
ចែករំលែកព័តមាននេះ