វៀតណាមសន្យាថា នឹងផ្តល់ឱកាសបន្ថែមដល់វិនិយោគិន
ទីក្រុងហាណូយ ៖ កាលពីថ្ងៃទី២៥ ឧសភា លោកនាយករដ្ឋមន្ត្រីវៀតណាម Nguyen Xuan Phuc បាននិយាយក្នុងសន្និសីទ «Meet…
ទីក្រុងហាណូយ ៖ កាលពីថ្ងៃទី២៥ ឧសភា លោកនាយករដ្ឋមន្ត្រីវៀតណាម Nguyen Xuan Phuc បាននិយាយក្នុងសន្និសីទ «Meet…
ទីក្រុងហាណូយ ៖ កាលពីថ្ងៃទី២៥ ឧសភា លោកនាយករដ្ឋមន្ត្រីវៀតណាម Nguyen Xuan Phuc បាននិយាយក្នុងសន្និសីទ «Meet Europe 2018» នៅទីក្រុងហាណូយថា ប្រទេសវៀតណាមបានខិតខំប្រឹងប្រែងស្ថាបនារដ្ឋាភិបាលស្មោះត្រង់សម្រាប់ប្រជាពលរដ្ឋ និងអាជីវកម្មនានា ខណៈផ្តោតសំខាន់លើការអភិវឌ្ឍស្ថាប័ន បង្កើនសមត្ថភាពធ្វើអភិបាលកិច្ច និងបង្កើតឱកាសបន្ថែមដល់ក្រុមហ៊ុនទាំងអស់ រួមទាំងវិនិយោគិនមកពីអឺរ៉ុបផងដែរ ។
លោកបន្តថា ៖« ប្រទេសវៀតណាមកំពុងតែអភិវឌ្ឍន៍ទៅមុខក្នុងចំណោមបណ្តាប្រទេសនៅអាស៊ាន ហើយវៀតណាមសម្រេចបានស្តង់ដាខ្ពស់ផ្នែកបរិស្ថានអាជីវកម្ម ខណៈប្តេជ្ញាការពារលើកម្មសិទ្ធិបញ្ញា ។ វៀតណាមបានជំរុញដល់ផ្នែកបច្ចេកវិទ្យាមិនប៉ះពាល់បរិស្ថាន, សម្របនឹងបម្រែបម្រួលបរិយាកាស និងការធ្វើកំណែទម្រង់សហគ្រាសរដ្ឋ » ។
លោកបន្ថែមថា វិនិយោគិនមកពី EU គឺជាវិនិយោគិនបរទេសនាំមុខគេនៅវៀតណាម ដោយពួកគេបានវិនិយោគសរុបជិត២៥ប៊ីលានដុល្លារ និងជាអ្នកផ្តល់ជំនួយធំជាងគេដល់វៀតណាមផងដែរ ។ ការធ្វើពាណិជ្ជកម្មទ្វេភាគីបានកើនឡើង៥ដងចាប់ពីឆ្នាំ២០០៦ ដល់២០១៧ មកស្មើជាង៥០ប៊ីលានដុល្លារកាលពីឆ្នាំមុន ។
លោកបញ្ជាក់ថា វៀតណាមតែងតែផ្តល់តម្លៃខ្ពស់ដល់ការវិនិយោគរបស់ក្រុមហ៊ុនអឺរ៉ុបជាង២ពាន់ក្រុមហ៊ុននៅក្នុងប្រទេសនេះ ជាពិសេស ផ្នែកការអភិវឌ្ឍហេដ្ឋារចនាសម្ព័ន្ធ, កំពង់ផែសមុទ្រ, អាកាសយានដ្ឋាន, ការដឹកជញ្ជូនក្នុងទីក្រុង, ថាមពលអគ្គិសនី, ប្រេងនិងឧស្ម័ន, កសិកម្ម, ទេសចរណ៍ និងសុខាភិបាល ជាដើម ។
លោកបានស្នើឲ្យអ្នកដឹកនាំក្រសួង និងតាមតំបន់ទាំងអស់ដោះស្រាយការលំបាករបស់ដៃគូ និងក្រុមហ៊ុនអឺរ៉ុបនៅវៀតណាម ។ លោកបង្ហាញក្តីសង្ឃឹមថា ដៃគូអឺរ៉ុបនឹងរៀបចំការវិនិយោគ និងយុទ្ធសាស្ត្រអាជីវកម្មរយៈពេលវែងនៅប្រទេសវៀតណាម ព្រមទាំងជំរុញការតភ្ជាប់ជាមួយក្រុមហ៊ុនវៀតណាមផងដែរ ៕
ចែករំលែកព័តមាននេះ