រាជធានីភ្នំពេញ ៖ ក្រសួងរៀបចំដែនដីនគរូបនីយកម្ម និងសំណង់បានអះអាងថា តម្រូវការលំនៅដ្ឋានថ្មី ក្នុងរាជធានីភ្នំពេញអាចឡើងដល់៨០ម៉ឺនខ្នងបន្ថែមទៀត ដើម្បីឆ្លើយតបនឹងកំណើនប្រជាពលរដ្ឋ នៅត្រឹមឆ្នាំ២០៣០ ។ ក្នុងពិធីបើកពិព័រណ៍ស្ថាបត្យកម្មកម្ពុជា…
រាជធានីភ្នំពេញ ៖ ក្រសួងរៀបចំដែនដីនគរូបនីយកម្ម និងសំណង់បានអះអាងថា តម្រូវការលំនៅដ្ឋានថ្មី ក្នុងរាជធានីភ្នំពេញអាចឡើងដល់៨០ម៉ឺនខ្នងបន្ថែមទៀត ដើម្បីឆ្លើយតបនឹងកំណើនប្រជាពលរដ្ឋ នៅត្រឹមឆ្នាំ២០៣០ ។
ក្នុងពិធីបើកពិព័រណ៍ស្ថាបត្យកម្មកម្ពុជា និងការតុបតែងផ្ទៃក្នុងលើកទី៣ ដែលធ្វើនៅមជ្ឈមណ្ឌល ពិព័រណ៍កោះពេជ្រ កាលពីថ្ងៃទី២៤ ខែឧសភា ឆ្នាំ២០១៨ កន្លងមកនេះ លោក ភឿង សុភ័ណ្ឌ រដ្ឋលេ ខា ធិការ ក្រសួងរៀបចំដែនដីនគរូបនីយកម្ម និងសំណង់បានលើកឡើងថា ជារៀងរាល់ឆ្នាំកម្រិតជីវភាពរស់នៅរបស់ប្រជាពលរដ្ឋកម្ពុជាបានផ្លាស់ប្តូរ និងមានភាពប្រសើរឡើងយ៉ាងឆាប់រហ័ស ជាពិសេសអ្នករស់នៅក្នុងទីក្រុងធំៗដូចជា នៅរាជធានីភ្នំពេញ និងនៅតាមបណ្តាខេត្តសំខាន់ៗមួយចំនួនទៀត ។
លោកបន្តថា ក្រសួងរៀបចំដែនដីនគរូបនីយកម្ម និងសំណង់បានព្យាករណ៍ថា ចំនួនប្រជាជនរបស់កម្ពុជា នឹងកើនឡើងពី១៥ ទៅ១៩លាននាក់ នៅចន្លោះពីពេលនេះរហូតដល់ឆ្នាំ២០៣០ ហើយនៅទីក្រុងភ្នំពេញ និងនៅតាមទីប្រជុំជននឹងមានចំនួនប្រជាជនកើនឡើងពី៤ទៅ៧លាននាក់ ដែលចាំបាច់ត្រូវជំរុញឱ្យមាន តម្រូវការលំនៅដ្ឋានថ្មីប្រមាណជា៨០ម៉ឺនផ្ទះបន្ថែម ពីលើចំនួនលំនៅឋានបច្ចុប្បន្ន ។
លោកភឿង សុភ័ណ្ឌបានបញ្ជាក់ថា វិស័យសំណង់ និងអចលនទ្រព្យនៅកម្ពុជាបានដើរតួនាទីយ៉ាងសំខាន់ក្នុងការអភិវឌ្ឍសេដ្ឋកិច្ចជាតិ ខណៈដែលរបៀបរស់នៅរបស់ប្រជាជនកម្ពុជាបានផ្លាស់ប្តូរយ៉ាងឆាប់រហ័សនាពេលប៉ុន្មានឆ្នាំចុងក្រោយនេះ ។
យោងតាមរបាយការណ៍បានបង្ហាញថា កាលពីឆ្នាំ២០១៧ កន្លងមកវិស័យអចលនទ្រព្យមានការកើនឡើង គួរឱ្យកត់សម្គាល់ជាមួយនឹងគម្រោងអនុម័តចំនួន៣៤១៨គម្រោង ហើយវិស័យសំណង់បានកើនឡើង២២ភាគរយពីមួយឆ្នាំទៅមួយឆ្នាំ ដោយមានទឹកប្រាក់រហូតដល់ទៅ៦,៨ពាន់លានដុល្លារសហរដ្ឋអាមេរិក ក្នុងនោះ៨២ភាគរយជាគម្រោងលំនៅដ្ឋានផងដែរ ៕
ចែករំលែកព័តមាននេះ