ខេត្តក្រចេះ៖ សាឡាងដចម្លង១គ្រឿង ត្រូវបានក្រឡាប់លិចចូលទឹកនៅមាត់ច្រាំងទន្លេ ខណៈដែលរថយន្តដឹកឈើធុនធំយីឌុប២គ្រឿងបានបើកឡើងលើសាឡាង បំរុងឆ្លងទន្លេ តែទំនងខុសបច្ចេកទេស ក៏ត្រូវក្រឡាប់ទាំងរថយន្តដឹកឈើ និងសាឡាងធ្លាក់ចូលទឹកទន្លេ។ តាមសេចក្តីរាយការណ៍បានឱ្យដឹងថា ហេតុការណ៍លិចសាឡាងដែលដឹករថយន្តយីឌុបដឹកឈើធំ២គ្រឿង ក្នុងចំណោមរថយន្តដឹកឈើចំនួន៨គ្រឿងនេះបានកើតឡើងកាលពីវេលារំលងអាធ្រាតឈានចូលថ្ងៃទី២៥ ឧសភា ស្ថិតនៅត្រើយខាងលិច ក្នុងឃុំជ្រោយបន្ទាយ ស្រុកព្រែកប្រសព្វ ។
តាមប្រភពពីលោកអធិការនគរបាលស្រុកព្រែកប្រសព្វបានឲ្យដឹងថា ករណីក្រឡាប់សាឡាងដចម្លងឫស្សីចារ-ជ្រោបន្ទាយនេះ បានកើតឡើងដោយសារតែរថយន្តយីឌុបដឹកឈើចំនួន២គ្រឿងរបស់ក្រុមហ៊ុនដឹកជញ្ជូនឈើឆ្លងឆ្ពោះទៅត្រើយខាងកើត ក្នុងឃុំថ្មគ្រែ ស្រុកចិត្របុរី ខណៈរថយន្តយីឌុបដឹកឈើទី១បានបើកចូលសាឡាងរួចរាល់ រីឯរថយន្តយីឌុបដឹកឈើទី២ក៏បានបើកចូលបន្តទៀត នៅពេលរថយន្តទី២បើកចូលទៅលើសាឡាង ពេលនោះសាឡាងក៏ចាប់ផ្តើមផ្អៀងម្តងបន្តិចៗ ធ្វើឲ្យមនុស្សដែលនៅលើសាឡង់នោះ រត់លោតគេចខ្លួនចេញអស់ ភ្លាមៗនោះសាឡាងក៏ក្រឡាប់លិចតែម្តង។
លោកអធិការបញ្ជាក់ថា ហេតុការណ៍ក្រឡាប់សាឡាងដចម្លងនេះ បណ្តាលឲ្យរថយន្តយីឌុបដឹកឈើ២គ្រឿង ត្រូវសាឡាងគ្របពីលើលិចចូលក្នុងទន្លេជាប់មាត់ច្រាំង តែមិនបណ្តាលឱ្យមនុស្សណាម្នាក់រងគ្រោះថ្នាក់នោះទេ ក៏ព្រោះតែអ្នកបើកបរ និងព្រូរថយន្ត ព្រមទាំងមនុស្សផ្សេងទៀតបានលោតចុះពីលើសាឡាងដែលលិចចូលក្នុងទឹកទន្លេនោះ។ សេចក្តីរាយការណ៍បានអោយដឹងថា រថយន្តយីឌុបដឹកឈើចំនួន២គ្រឿងក្នុងចំណោម៨គ្រឿងទៀតដែលបានលិចជាមួយនឹងសាឡាងនោះ ត្រូវបានគេស្គាល់ថា ជារថយន្តរបស់ក្រុមហ៊ុនស៊ីងបាយអូថេក ប្រទេសកូរ៉េ ជាក្រុមហ៊ុនវិនិយោគមួយ មានទីតាំងស្ថិតនៅក្នុងភូមិសាស្ត្រឃុំវឌ្ឍនៈ ស្រុកសំបូរ ។
មេបញ្ជាការកងរាជអាវុធហត្ថខេត្តក្រចេះ លោក សាន្ត ប៊ុនថាន បានឲ្យដឹងថា ឈើដែលដឹកជញ្ជូនតាមរថយន្តទាំងនោះជាឈើកែច្នៃ និងមានច្បាប់ដឹកជញ្ជូនត្រឹមត្រូវ តែមិនទាន់ដឹងថា ជាឈើប្រភេទអ្វី និងមានចំនួនប៉ុន្មានមែត្រគូបនៅឡើយទេ ៕
ចែករំលែកព័តមាននេះ