ខេត្តកំពង់ឆ្នាំង ៖ ជនសង្ស័យម្នាក់ត្រូវបានប្រជាពលរដ្ឋចាប់បានវាយទ្រោមខ្លួន ទើបបញ្ជូនទៅអោយសមត្ថកិច្ចនគរបាល បន្ទាប់ធ្វើសកម្មភាពឆក់យកខ្សែកពីអាជីវករលក់មាសនៅផ្សារឆ្នាំង កាលពីវេលាម៉ោង១០និង៣០នាទីព្រឹកថ្ងៃទី២៤ ខែឧសភា ឆ្នាំ ២០១៨ ខណៈដែលជនដៃដល់រូបនោះបន្លំធ្វើជារកទិញខ្សែកមាស…
ខេត្តកំពង់ឆ្នាំង ៖ ជនសង្ស័យម្នាក់ត្រូវបានប្រជាពលរដ្ឋចាប់បានវាយទ្រោមខ្លួន ទើបបញ្ជូនទៅអោយសមត្ថកិច្ចនគរបាល បន្ទាប់ធ្វើសកម្មភាពឆក់យកខ្សែកពីអាជីវករលក់មាសនៅផ្សារឆ្នាំង កាលពីវេលាម៉ោង១០និង៣០នាទីព្រឹកថ្ងៃទី២៤ ខែឧសភា ឆ្នាំ ២០១៨ ខណៈដែលជនដៃដល់រូបនោះបន្លំធ្វើជារកទិញខ្សែកមាស ។
សមត្ថកិច្ចនគរបាលក្រុងកំពង់ឆ្នាំង បាននិយាយអោយដឹងថា ជនសង្ស័យខាងលើមានឈ្មោះ រ៉ន ឆាត អាយុ ៤០ ឆ្នាំ មានទីលំនៅភូមិឃ្លាំងប្រាក់ សង្កាត់ប្អេរ ក្រុងកំពង់ឆ្នាំង ចំណែកអាជីវកលក់មាសឈ្មោះយាយ មុំ ។
ប្រភពដដែលបានឲ្យដឹងថា មុនពេលកើតហេតុ ជនសង្ស័យខាងលើបានកាន់លុយក្រដាស់១០០រៀលមួយបាច់ប្រហែល១ម៉ឺនរៀល ដាក់ក្នុងថង់ផ្លាស្ទីក ពណ៌ខ្មៅចងកៅស៊ូពីក្រៅ រួចចូលទៅធ្វើជាសួររកទិញខ្សែកមាសចំនួន១តម្លឹងពីអាជីវករឈ្មោះយាយមុំ ហើយបានសុំរើសមើលម៉ូតម្តង១ខ្សែៗ។ ពេលបានខ្សែក៣ខ្សែនៅក្នុងដៃ ក៏ស្ទុះរត់គេចចេញមកក្រៅ ភ្លាមៗនោះអាជីវករម្ចាស់ខ្សែកបានស្រែកឆោឡោឡើង ទើបប្រជាពលរដ្ឋរួមទាំងអ្នករត់ម៉ូតូឌុបព្រួតគ្នាដេញចាប់បានជនសង្ស័យខាងលើ ដែលកំពុងរត់ឡើងជិះម៉ូតូរបស់ខ្លួនបំណងរត់គេច។ ក្រោយពេលចាប់បានជនសង្ស័យ ប្រជាពលរដ្ឋបានព្រួតវាយម្នាក់១ដៃ ម្នាក់១ជើង ទើបប្រគល់អោយសមត្ថកិច្ចនគរបាលជាក្រោយ។
នៅចំពោះមុខសមត្ថកិច្ចនគរបាល ជនសង្ស័យខាងលើ បានសារភាពថា ខ្លួនពិតជាបានលួចឆក់យកខ្សែកគេចំនួនបីខ្សែពិតមែន ។ ជនសង្ស័យបានសារភាពទៀតថា កាលពីថ្ងៃទី១៣ ខែឧសភាឆ្នាំ២០១៨ ខ្លួនក៏បានឆក់យកទូរស័ព្ទគេចំនួន៣គ្រឿង ដែរ ខណៈពេលសុំមើលទូរសព្ទ័ពីអាជីវករលក់ទូរសព្ទ័នៅផ្សារឆ្នាំងផងដែរ ។ ពេលឆក់បានក៏យកទៅលក់នៅផ្សារពន្លៃបានប្រាក់ចំនួន២៥០ដុល្លារ ។ប៉ុន្តែតាមម្ចាស់ទូរសព្ទ័ប្រាប់ថាទូរស័ព្ទដៃ៣គ្រឿងនោះមានតម្លៃជាងដល់៧០០ដុល្លារឯណោះ ។
បច្ចុប្បន្ន សមត្ថកិច្ចកំពុងកសាងសំណុំរឿងតាមនីតិវិធីបញ្ជូនខ្លួនជនដៃដល់ទៅតុលាការដើម្បីផ្ដន្ទាទោសទៅតាមច្បាប់៕
ចែករំលែកព័តមាននេះ