ខេត្តកណ្តាល ៖ ជនជាប់ចោទឈ្មោះ មុត ម៉ុន អាយុ៣៣ឆ្នាំ បានសារភាពក្នុងសវនាការកាលពីថ្ងៃទី២២ ខែឧសភាថា ខ្លួនពិតជាបានសម្លាប់ស្ត្រីម្នាក់ ព្រោះតែគំនុំប្រាកដមែន ។ ទោះបីជាយ៉ាងណា ក្រោយពីបញ្ចប់សវនាការ លោក គឹម ម៉េង ប្រធានក្រុមប្រឹក្សាជំនុំជម្រះសាលាដំបូងខេត្ត សម្រេចលើកពេលប្រកាសសាលក្រមទៅព្រឹកថ្ងៃទី៦ ខែមិថុនាខាងមុខ ។ មន្ត្រីសាលាដំបូងបានឱ្យដឹងថា ជនឈ្មោះ មុត ម៉ុន ជាប់ចោទពីបទឃាតកម្មយោងតាមមាត្រា១៩៩នៃក្រមព្រហ្មទណ្ឌ ដែលកំណត់ផ្តន្ទាទោសដាក់ពន្ធនាគារពី១០ឆ្នាំទៅ១៥ឆ្នាំ ។
គួររំលឹកថា ករណីឃាតកម្មនេះកើតឡើងកាលពីថ្ងៃទី១១ ខែមករា នៅចំណុចគុម្ពោតព្រៃ ក្នុងភូមិគោល ឃុំទួលព្រេច ស្រុកអង្គស្នួល ។ សមត្ថកិច្ចធ្លាប់ឱ្យដឹងថា មុនពេលកើតហេតុ ជនរងគ្រោះបានទៅផ្លាស់គោឱ្យស៊ីស្មៅនៅវាលស្រែខាងជើងភូមិ ហើយឃើញជនល្មើសនិងក្មេងៗអាយុពី១៤ឆ្នាំទៅ១៥ឆ្នាំ កំពុងប្រើប្រាស់
ថ្នាំញៀននៅក្នុងគុម្ពោតព្រៃ ។ ពេលនោះជនរងគ្រោះបានស្រែកឡូឡាថាឱ្យពួកគេនិងគំរាមប្តឹងនគរបាលផងដែរ ហើយក្មេងៗក៏រត់គេចចេញអស់ទៅ ទើបជនល្មើសខឹងក៏ឈានដល់ការវាយតប់ និងយកក្រមារឹតកសម្លាប់ជនរងគ្រោះ ។ ក្រោយពីជនរងស្លាប់ ជនល្មើសក៏អូសសពយកទៅលាក់ក្នុងគម្ពោតព្រៃដែលមានចម្ងាយពីកន្លែងកើតហេតុប្រហែល៤៥ម៉ែត្រ ហើយគេចខ្លួនបាត់ ។
លុះមកដល់ថ្ងៃទី១៣ ខែមករា តាមរយៈព័ត៌មានជំនាញ និងស្រុក តាមការស៊ើបអង្កេតបង្ហាញតម្រុយថា មុខសញ្ញាបានគេចខ្លួនទៅនៅផ្ទះប្អូននៅឃុំស្វាយជ្រំ ស្រុកខ្សាច់កណ្តាល។ បន្ទាប់មក កម្លាំងជំនាញខេត្តបានតាមស្វែងរកជនល្មើស ប៉ុន្តែជននេះដឹងខ្លួនក៏រត់គេចពីទីនោះទៀត ។ ទោះជាយ៉ាងណា សមត្ថកិច្ចនគរបាលស្រុកអង្គស្នួល សហការជាមួយការិយាល័យព្រហ្មទណ្ឌកម្រិតធ្ងន់ខេត្ត និងនគរបាលស្រុកខ្សាច់កណ្តាលតាមស្រាវជ្រាវស្វែងរកចាប់ខ្លួនជនល្មើសបាន រួចនាំទៅកាន់អធិការដ្ឋាននគរបាលស្រុកអង្គស្នួល ដើម្បីបន្តនីតិវិធី ។
នៅចំពោះមុខសមត្ថកិច្ច ជនល្មើសបានឆ្លើយថា ខ្លួនបានវាយសម្លាប់ជនរងគ្រោះតែម្នាក់ឯងទេ ដោយសារកន្លងមកខ្លួនខឹងជនរងគ្រោះដើរនិយាយពេញភូមិពីរឿងខ្លួនជិះម៉ូតូបុកគេស្លាប់មិនព្រមសង ហើយខ្លួនក៏ស្អប់ជនរងគ្រោះរឿងចេះអាបធ្មប់ទៀតផង ៕
ចែករំលែកព័តមាននេះ