ខេត្តកំពង់ឆ្នាំង ៖ លោកឧកញ៉ា កុយ សុវណ្ណ សមាជិកក្រុមការងារថ្នាក់កណ្តាល និងជាប្រធានក្រុមការងារចុះជួយស្រុកកំពង់ត្រឡាច និងជាប្រធានកិត្តិយសសម្ព័ន្ធយុវជនស្រឡាញ់សន្តិភាព ខេត្តកំពង់ឆ្នាំង ក្នុងឱកាសចុះសាកសួរសុខទុក្ខ និងចែកអំណោយដល់ប្រជាពលរដ្ឋខ្មែរ និងខ្មែរឥស្លាមចំនួន២៣០នាក់ បានមានប្រសាសន៍ថា សូមបងប្អូនប្រជាពលរដ្ឋអញ្ជើញទៅ បោះឆ្នោតនៅថ្ងៃទី២៩ ខែកក្កដា ខាងមុខនេះឲ្យបានគ្រប់គ្រប់គ្នា ។
ពិធីនេះបានធ្វើឡើងក្នុងពីធីបុណ្យបួសរ៉ាម៉ាដន ខ្មែរឥស្លាមកាលពីថ្ងៃទី២៣ ខែឧសភា ឆ្នាំ២០១៨ នៅភូមិអូរលយ ឃុំជើងគ្រាវ ស្រុកកំពង់ត្រឡាច ខេត្តកំពង់ឆ្នាំង ។
ឯកឧត្តមបានបន្តថា សូមបងប្អូនទាំងអស់ត្រូវនាំគ្នាបំពេញកាតព្វកិច្ចរបស់ខ្លួនជាពលរដ្ឋ ដោយត្រូវទៅចូលរួមការបោះឆ្នោតឲ្យបានគ្រប់ៗគ្នា ដើម្បីជ្រើសតំណាងរាស្ត្ររបស់គណៈបក្សណាមួយដែលយើងស្រឡាញ់ ដើម្បីដឹកនាំប្រទេសជាតិមានការអភិវឌ្ឍ និងមានសុខសន្តិភាព ។ ដោយមិនត្រូវចាញ់ល្បិចកលរបស់ក្រុមអ្នកនយោបាយអគតិ ដែលចង់បំផ្លាញការបោះឆ្នោត បំផ្លាញសុខសន្តិភាព បំផ្លាញការអភិវឌ្ឍ នាំមកនូវភ្លើងសង្គ្រាមធ្វើឲ្យប្រជាពលរដ្ឋរងទុក្ខខ្លោចផ្សារទៀតនោះឡើយ ។
លោកជំទាវ តុង ណារី ប្រធានប្រតិបត្តិសម្ព័ន្ធយុវជនស្រឡាញ់សន្តិភាពបានថ្លែងថា ក្រោមការដឹកនាំរបស់ប្រមុខរាជរដ្ឋាភិបាលប្រជាពលរដ្ឋទាំងអស់រស់នៅលើទឹកដីកម្ពុជាមានសិទ្ធិគោរពលើជំនឿសាសនារបស់ខ្លួន ដោយមិនប្រកាន់ពូជសាសនា និន្នាការនយោបាយអ្វីឡើយ ធ្វើឲ្យសាសនាទាំងអស់មានការរីកចម្រើនក្រោមដំបូលសន្តិភាព ។
ដូច្នេះប្រជាពលរដ្ឋគ្រប់រូបត្រូវនាំគ្នាទៅបោះឆ្នោត ដើម្បីការពារសន្តិភាពដែលកំពុងមាន កុំឲ្យបាត់បង់ទើបអនាគតកូនចៅរបស់យើងសំបូរសប្បាយរុងរឿង ។
ឯកឧត្តមម៉ាត់ ម៉ូត ប្រធានស្នាក់គណៈបក្សប្រជាជនកម្ពុជាខេត្តកំពង់ឆ្នាំងបានឲ្យដឹងថា ប្រជាពលរដ្ឋដែលមកទទួលអំណោយចំនួន២៣០នាក់ ក្នុងនោះក៏មានប្រជាលរដ្ឋខ្មែរចំនួន៧៥នាក់ដែរ ដែលមកពី៥ភូមិក្នុងឃុំជើងគ្រាវ ដែលក្នុងម្នាក់ៗបានទទួលខីត១កញ្ចប់ ក្នុងនោះមានក្រម៉ា មី ស្ករស ទឹកដោះគោ និងទឹកក្រូច ។
ឯកឧត្តមក៏បានសំណូមរដល់បងប្អូនប្រជាពលរដ្ឋទាំងអស់ថា ដើម្បីស្រុកភូមិយើងទទួលបានការអភិវឌ្ឍន៍ និងទទួលបានសុខសន្តិភាពដូចសព្វថ្ងៃ យើងត្រូវតែទៅបោះឆ្នោតជូនគណៈបក្សប្រជាជនកម្ពុជាឲ្យបានគ្រប់ៗគ្នា ដើម្បីគាំទ្រសម្តេច ហ៊ុន សែន ជានាយករដ្ឋមន្ត្រី និងជាប្រធានគណៈបក្សប្រជាជនកម្ពុជាដឹកនាំប្រទេសបន្តទៀត ៕
ចែករំលែកព័តមាននេះ