ខេត្តព្រៃវែង ៖ មនុស្សម្នាក់បានស្លាប់ និងម្នាក់ទៀតរបួសធ្ងន់ក្នុងគ្រោះថ្នាក់ជិះម៉ូតូមិនបានប្រុងប្រយ័ត្នធ្លាក់ចូលរណ្តៅដីជីកដាក់លូបង្ហៀរទឹកចេញពីប្រឡាយបូពាហ៍ ។ ហេតុការណ៍នេះបានកើតឡើងកាលពីវេលាម៉ោង៩យប់ថ្ងៃទី២២ ខែឧសភា ឆ្នាំ២០១៨ នៅលើផ្លូវលំ ក្នុងចំណុចភូមិពញាលៀង ឃុំអង្គររាជ្យ ស្រុកព្រះស្តេច ខេត្តព្រៃវែង ។
សមត្ថកិច្ចនៅមូលដ្ឋានបានឱ្យដឹងថា ជនរគ្រោះទាំង២នាក់រួមមានឈ្មោះសុវណ្ណ ជីវ័ន្ត ភេទប្រុស អាយុ១៣ឆ្នាំ ជាអ្នកបើកបរ រស់នៅភូមិពញាលៀង ឃុំអង្គររាជ្យ ស្រុកព្រះស្តេច ខេត្តព្រៃវែង បានរងរបួសធ្ងន់ និងឈ្មោះឡេង ដារ៉ូ ភេទប្រុស អាយុ១៨ឆ្នាំ ជាអ្នករួមដំណើរ រស់នៅភូមិស្វាយចារ ឃុំអង្គររាជ្យ ស្រុកព្រះស្តេច ខេត្តព្រៃវែង បានស្លាប់នៅនឹងកន្លែងកើតហេតុ ។
ប្រភពបានបន្តថា នៅមុនពេលកើតហេតុ ឈ្មោះសុវណ្ណ ជីវ័ន្ត បានបើកបរម៉ូតូមួយគ្រឿងម៉ាកហុងដាឌ្រីម C125 ពណ៌ខ្មៅ ពាក់ស្លាកលេខ ព្រៃវែង ១G-៤២៧០ ដោយឈ្មោះឡេង ដារ៉ូ ជាអ្នកជិះពីក្រោយ បានបើកបរម៉ូតូក្នុងទិសដៅពីត្បូងទៅជើង លុះមកដល់ចំណុចកើតហេតុខាងលើ ដោយសារមេឃងងឹត ពិបាកមើលផ្លូវ ម៉ូតូក៏បានធ្លាក់ចូលរណ្តៅដីជីកដាក់លូបង្ហៀរទឹកចេញពីប្រឡាយ បណ្តាលឱ្យឈ្មោះឡេង ដារ៉ូ ដែលជាអ្នកជិះពីក្រោយបានស្លាប់នៅកន្លែងកើតហេតុ ចំណែកអ្នកបើកបរម៉ូតូឈ្មោះសុវណ្ណ ជីវ័ន្ត បានរងរបួសធ្ងន់ ហើយជនរងគ្រោះទាំងពីរនាក់មិនបានពាក់មួកសុវត្ថិភាពនោះទេ។
ក្រោយកើតហេតុ សមត្ថកិច្ចបានចុះទៅវាស់វែង និងពិនិត្យទីតាំងកើតហេតុ រកឃើញថា គ្រោះថ្នាក់នេះកើតឡើងដោយសារអ្នកបើកបរខ្វះការប្រុងប្រយ័ត្ន ។
បច្ចុប្បន្ន សពត្រូវបានប្រគល់អោយក្រុមគ្រួសារយកទៅធ្វើបុណ្យតាមប្រពៃណី រីឯអ្នកបើកបររងរបួសធ្ងន់ត្រូវបានបញ្ជូនទៅសង្គ្រោះនៅមន្ទីរពេទ្យភ្នំពេញ ចំណែកម៉ូតូត្រូវយកមករក្សាទុកនៅប៉ុស្តិ៍អង្គររាជ្យ ៕
ចែករំលែកព័តមាននេះ