រាជធានីភ្នំពេញ ៖ ប្រមុខរាជរដ្ឋាភិបាលកម្ពុជាសម្តេចតេជោ ហ៊ុន សែនបានថ្លែងនៅព្រឹកថ្ងៃទី២៣ ឧសភា ឆ្នាំ២០១៨នេះថា ថ្នាក់ដឹកនាំគណបក្សប្រជាជនកម្ពុជាក៏ដូចជា រូបសម្តេចផ្ទាល់បានខិតខំខ្លាំងណាស់ក្នុងការរៀបចំពីប្រទេសមួយខ្ទេចខ្ទាំដោយរបបប្រល័យពូជសាសន៍ និងសង្គ្រាមស៊ីវិល គឺតម្រូវឲ្យសម្តេចធ្វើកិច្ចការច្រើនណាស់ ដើម្បីសុខសន្តិភាពដែលកំពុងមាននាពេលចប្ចុប្បន្ននេះ ព្រោះពីអតីតកាលនាសម័យសង្គ្រាមដែលសម្តេចត្រូវស្លៀកពាក់ឯកសណ្ឋានយោធា ដើម្បីទៅដោះស្រាយបញ្ហាទាក់ទិននឹងកងទ័ពក៏ដូច ប្រជាជនដែលរងផលប៉ះពាល់នៃការប្រយុទ្ធ ទន្ទឹមនឹងនោះក៏ត្រូវពាក់ក្រវាត់កចេញទៅក្រៅប្រទេស ដើម្បីចរចាររកសន្តិភាព ។
សម្តេចតេជោមានប្រសាសន៍ថា«បើទោះបីជាមានអង្គការសហប្រជាជាតិមកចូលរួមចំណែក ក៏ប៉ុន្តែមិនបានបញ្ចប់សង្គ្រាមនៅកម្ពុជាទេ ។ ឆ្នាំ(១៩៩៣ អ៊ុនតាក់បានចាកចេញ ហើយថែមទាំងបន្សល់ទុកនូវកម្ពុជាមួយ សូម្បីតែខេត្តកំពង់ស្ពឺ ក៏ជាខេត្តដែលមានខ្មែរក្រហមវ៉ៃគ្នានៅទីនេះ ។ អ៊ុនតាក់មិនបានចូលទៅដល់តំបន់ឱរ៉ាល់ទេ ព្រោះខ្មែរក្រហមមិនឲ្យចូលស្រេចតែខ្មែរក្រហមមិនឲ្យចូល គឺអត់ហ៊ានដែរ … ចំណែកឯនៅតំបន់ប៉ៃលិនក៏អ៊ុនតាក់មិនហ៊ានចូលដែរ ព្រោះខ្លាចលោក អ៊ី ឈាន អតតីទាហានខ្មែរក្រហមកាលពីសម័យនោះ ។
សម្តេចនាយករដ្ឋមន្ត្រី ហ៊ុន សែន មានប្រសាសន៍បន្តថា«ដូច្នេះខ្លាំងបានតែជាមួយអ្នកគោរពទេ ដល់អ្នកដែលមិនគោរពអត់ខ្លាំងទេ ។ ធ្វើអីខ្មែរក្រហម ។ ទីចុងបំផុតយើងអនុវត្តនូវនយោបាយឈ្នះ-ឈ្នះបង្រួបបង្រួមប្រទេសរបស់យើងឲ្យមានការឯកភាព» ។
ថ្លែងនៅក្នុងពិធីជួបសំណេះសំណាលជាមួយកូនក្មួយ កម្មករ កម្មការិនីសរុប១៩,៩៤៩នាក់ មកពីរោងចក្រ សហគ្រាសចំនួន១៧នៅក្នុងខេត្តកំពង់ស្ពឺ សម្តេចបានថ្លែងអំណរគុណដល់ប្រជាពលរដ្ឋ និងកម្មករ-កម្មការិនីដែល«មិនគ្រាន់តែចាត់ទុកពូជាមេដឹកនាំប្រទេសប៉ុណ្ណោះទេ តែចាត់ទុកពូដូចជា សាច់ញាតិមួយដែរ» សម្រាប់ការស្រលាញ់ និងការរាប់អាន ហើយសម្តេចក៏សង្ឃឹមថា តាមរយៈកាយវិការ និងការស្រលាញ់សម្តេច«នឹងក្លាយទៅជាការបោះឆ្នោតឲ្យគណបក្សប្រជាជន ដើម្បីពូបន្តដឹកនាំរយៈពេល១០ឆ្នាំបន្ថែមទៀត» ។ សម្តេចបានបញ្ជាក់ជាថ្មីម្តងទៀតថា«នេះមិនមែនជាយុទ្ធនាការនៃការឃោសនាបោះឆ្នោតទេ ក៏ប៉ុន្តែក្មួយៗត្រូវចងចាំឲ្យច្បាស់ ប្រទសរបស់យើងបើគ្មានសន្តិភាពទេ វាគ្មានការអភិវឌ្ឍន៍ទេ ។ ហើយអ្នកដែលឈរពាំងខ្លួនយកខ្លួនដើម្បីរក្សាសន្តិភាពប្រទេសនេះ គឺពូនេះតែម្តង គឺគណបក្សប្រជាជន» ។
សម្តេចបញ្ជាក់ប្រាប់កម្មករ-កម្មការិនីថា ទោះបីត្រូវជេរប្រទិច ដោយពួកប្រឆាំងនិងបរទេសមួយចំនួន ហើយគ្មានអ្នកណាជេរសម្តេចខ្លាំង និងសាហាវជាងពួកខ្មែរក្រហម និងប៉ុល ពតនោះទេ ។ ជាពិសេសអតីតមេដឹកនាំខ្មែរក្រហមមួយរូប គឺលោក ខៀវ សំផន ក្នុងដំណាក់កាលនៃការចរចារ គឺជេរប្រទិចសម្តេចមិនតិចជាង២០ដងទេក្នុងមួយថ្ងៃ ប៉ុន្តែទីចុងបំផុតខៀវ សំផន បាននាំប្រពន្ធកូន កូនប្រសារ និងសាច់ញាតិមកចុះចូលដល់ផ្ទះសម្តេចតែម្តង ។ សម្តេចតេជោ ហ៊ុន សែនបានបន្តថា បើនិយាយពីបារមីវិញប្រហែលជាអ្នកឯងមិនទាន់ដល់សម្តេចបានបញ្ជាក់ថា កាលពីម្សិលម្ងៃ សម្តេចបានដឹង និងបានលឺ ហើយគេនិយាយថា «ម៉េចក៏រន្ទះបាញ់ចំពោះអ្នកល្អ ។
នៅតំបន់អារ៉ែង អ្នកគ្រូពេទ្យខ្ញុំសុំផ្តាំទៅខ្ញុំស្តាប់លឺហើយក្នុងការនិយាយគ្នានោះថា ម៉េចបានរន្ទះបាញ់សម្លាប់អ្នកនៅអារ៉ែង ព្រោះនោះជាសមាជិកបក្សប្រឆាំងរន្ទះបាញ់ ។ បានខ្ញុំមើលឃើញអានឹងស្តាប់លឺអានឹង ខ្ញុំថាមកពីជេរហ៊ុន សែន ច្រើនពេកបានរន្ទះបាញ់ ។ ជួនកាលរាសីវាមិនដល់ វាអញ្ចឹងដែរណា ! ជួនកាលជេរៗហ៊ុន សែន ស្រាប់តែភ្លូកឡានងាប់បាត់ ជូនកាលរន្ទះបាញ់ទៅ ជួនកាលខ្សែភ្លើងឆក់ទៅ ជួនកាលភ្លើងឆេះផ្ទះ អញ្ចឹងទៅ។ អានឹងជួនកាល … ជេរច្រើនពេក ជួនកាលវាទៅអញ្ចឹង អំពើបាបវាត្រូវសាងឡើង» ។ ព្រោះជួនកាលបារមីរបស់មនុស្សមើលមិនឃើញ ។
សូម្បីអតីតព្រះមហាក្សត្រ សម្តេចនរោត្តម សីហនុ កាលពីឆ្នាំ១៩៩៨ ពេលចរចារនៅសៀមរាម សម្តេចតាប្រាប់សម្តេចក្រុមព្រះ និងថ្នាក់ដឹកនាំផ្សេងនាពេលនោះថា ឲ្យជឿខ្លះទៅធ្វើម៉េចបើសម្តេចហ៊ុន សែន គេឲ្យកើតមកធ្វើជានាយករដ្ឋមន្ត្រី ដូចសម្តេចតាសុខៗគេហៅឲ្យមកធ្វើស្តេច ។
អញ្ចឹងទំនាយរបស់ហ៊ុន សែន គេឲ្យកើតមកគាត់ធ្វើជានាយករដ្ឋមន្ត្រីតាំងពី ១៩៨៥ មានកម្លាំងធ្វើ១០ឆ្នាំទៀតយ៉ាងតិច ៕
ចែករំលែកព័តមាននេះ