ខេត្តកណ្ដាល ៖ ផ្លូវរថភ្លើងថ្មី ឬផ្លូវបង្គោលភ្លើង (ផ្លូវកសាងក្នុងរបបប៉ុលពត) គឺជាផ្លូវលំដ៏រឹងមាំ១ខ្សែ ហើយមិនដែលហ៊ានបុគ្គលណាម្នាក់ថ្លើមធំយកធ្វើជាកម្មសិទ្ធិផ្ទាល់ខ្លួនឡើយ គឺប្រើប្រាស់ជារួម។ ប៉ុន្តែពេលនេះមានក្រុមហ៊ុនជីករណ្ដៅដីមួយឈ្មោះក្រុមហ៊ុន តាក់ជីឡៅ…
ខេត្តកណ្ដាល ៖ ផ្លូវរថភ្លើងថ្មី ឬផ្លូវបង្គោលភ្លើង (ផ្លូវកសាងក្នុងរបបប៉ុលពត) គឺជាផ្លូវលំដ៏រឹងមាំ១ខ្សែ ហើយមិនដែលហ៊ានបុគ្គលណាម្នាក់ថ្លើមធំយកធ្វើជាកម្មសិទ្ធិផ្ទាល់ខ្លួនឡើយ គឺប្រើប្រាស់ជារួម។ ប៉ុន្តែពេលនេះមានក្រុមហ៊ុនជីករណ្ដៅដីមួយឈ្មោះក្រុមហ៊ុន តាក់ជីឡៅ ដែលប្រធានក្រុមហ៊ុននេះ គឺជាអនុប្រធានក្រុមគណៈពង្រឹងឃុំឆក់ឈើនាងផង បានកំពុងប្រើអំណាចកាយបំផ្លាញផ្លូវនេះ ដឹកចេញយកអាចម៍ដីលក់យ៉ាងរលូន ក្រោមរូបភាពដាក់លូរំដោះទឹកជំនន់។ ប៉ុន្តែក្រោយពីការបើកការដ្ឋានរួចមករយៈពេល៤ថ្ងៃមកហើយមិនទាន់មានការដាក់លូនៅឡើយទេ ហើយបែរជាក្រុមហ៊ុនតាក់ជីឡៅ ដាក់គ្រឿងចក្រ កាយដីផ្លូវ និងមានរថយន្តធុនធំៗយីឌុបកង់១០ និងកង់៦ចូលទៅដឹកដីចេញលក់យកលុយយ៉ាងសប្បាយចិត្តទៅវិញ។
ប្រជាពលរដ្ឋបាននិយាយថា ផ្លូវលំនោះរឹងមាំណាស់មានប្រវែងរាប់រយគីឡូម៉ែត្រទទឹងជាង២០ម៉ែត្រ តភ្ជាប់ពីផ្លូវអូរដឹមកប់ស្រូវ ស្ថិតនៅក្នុងសង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ឆ្ពោះទៅកាន់ខេត្តព្រះសីហនុ ដោយបានឆ្លងកាត់ខេត្តកំពង់ស្ពឺផងដែរ។ ផ្លូវនេះបានកសាងឡើងក្នុងរបបកម្ពុជាប្រជាធិបតេយ្យប៉ុលពត ដែលតាមគម្រោងគឺដើម្បីសាងសង់ផ្លូវដែកដឹកទំនិញពីខេត្តព្រះសីហនុមកភ្នំពេញ ឬពីភ្នំពេញទៅកាន់ខេត្ត ព្រះសីហនុ។ ប៉ុន្តែមិនទាន់ត្រូវបានកសាងផ្លូវដែកផងរបបប៉ុលពតត្រូវរំដោះហើយក្រោយថ្ងៃ៧មករា ឆ្នាំ១៩៧៩រហូតមកពួកគាត់បានប្រើប្រាស់ដល់សព្វថ្ងៃនេះ។ ប្រភពដដែលបានបន្តទៀតថា ក្រុមហ៊ុនតាក់ជីឡៅបានដាក់គ្រឿងចក្រកាយបំផ្លាញផ្លូវយកអាចម៍ដីលក់រយៈពេល៤ថ្ងៃមកហើយនៅត្រង់ចំណុចភូមិឈូកធំ ឃុំឆក់ឈើនាង ស្រុកអង្គស្នួល ខេត្តកណ្ដាល ជាប់ព្រំប្រទល់ ភូមិអង្គបឹងចក និងភូមិអំពិល សង្កាត់កំបូល ខណ្ឌពោធិ៍សែនជ័យ រាជធានីភ្នំពេញ។
ដែលផ្លូវនោះមានកម្ពស់ជាង៣ម៉ែត្រ ឥឡូវក្រុមហ៊ុននេះកាយរាបស្មើវាលស្រែ ហើយអាចនឹងលិចទឹកនារដូវវស្សានេះ និងអាចរលំបង្គោលភ្លើងជាក់ជាមិនខានឡើយ។ ប្រជាពលរដ្ឋបានបញ្ជាក់ថា កាលពីវេលាព្រឹកថ្ងៃទី១៨ ខែឧសភា ឆ្នាំ២០១៨ កន្លងមកនេះមានការធ្វើពិធីបើកការដ្ឋានដាក់លូ កាត់ទទឹងផ្លូវខាងលើនោះ ដែលបានប្រព្រឹត្តទៅក្រោមអធិបតីភាពលោកនាយឧត្តសេនីយ៍ ស៊ូ គឹមស៊ុន ប្រធានគណៈពង្រឹងឃុំឆក់ឈើនាង និងជាអនុប្រធានគណៈពង្រឹងស្រុកអង្គស្នួល លោក នីម នីរ៉ាដេត អភិបាលស្រុកអង្គស្នួល លោកតាក់ ជីឡៅ អនុប្រធានគណៈពង្រឹងឃុំឆក់ឈើនាង និងជាឈ្មួញរណ្ដៅដីខាងលើ និងមានការចូលរួមពីសំណាក់បងប្អូនប្រជាពលរដ្ឋជាច្រើនទៀតផងដែរ។
ពេលនោះពួកគាត់បានរង់ចាំមើលស្រាប់តែក្រោយពេលបើកករដ្ឋានរួចបែរជាឃើញក្រុមហ៊ុន តាក់ជីឡៅ ដែលប្រធានក្រុមហ៊ុននេះឈ្មោះ តាក់ជីឡៅ អនុប្រធានក្រុមគណៈពង្រឹងចុះជួយឃុំឆក់ឈើនាង ដាក់គ្រឿងចក្រកាយយកដីផ្លូវលក់បែបនេះទៅវិញ មិនមែនកាយទទឹងផ្លូវដាក់លូឡើយ។ ក្រុមហ៊ុននេះបានកាយផ្ដាច់ផ្លូវយកដីលក់រាប់រយឡានព្រោះចំណុចដែលត្រូវកាយផ្ដាច់នោះមានប្រវែងជិត២០០ម៉ែត្រទៅហើយ នេះជាទង្វើអាងអំណាចគិតតែផលប្រយោជន៍ផ្ទាល់ខ្លួន និងបំផ្លាញជាតិសុទ្ធសាធ ដូច្នេះសូមលោកអភិបាលខេត្តកណ្ដាលជួយពិនិត្យមើលផង។ ទាក់ទិនទៅនឹងការបំផ្លាញផ្លូវនេះ លោកស្រីមេឃុំឆក់ឈើនាង បានឲ្យដឹងថា ក្រុមហ៊ុនតាក់ជីឡៅ គឺជាអ្នធ្វើសំណើសុំដាក់លូ និងពង្រាបផ្លូវនោះហើយឃុំ និងស្រុកសុទ្ធតែបានដឹងពីរឿងនេះ ប៉ុន្តែរឿងកាយផ្លូវលោកស្រីអត់បាន ដឹងឡើយ ពេលនេះចាំលោកស្រីប្រើគេឲ្យចុះទៅមើលសិន៕
https://youtu.be/T5Z5d_HzNEQ
ចែករំលែកព័តមាននេះ