ទីក្រុងកូឡុំបូ ៖ ក្រសួងហិរញ្ញវត្ថុរបស់ស្រីលង្កាបានព្រមានកាលពីថ្ងៃអាទិត្យថា ប្រទេសនេះអាចនឹងធ្លាក់ក្នុងវិបត្តិបំណុល ព្រោះតែគម្រោងមានតម្លៃខ្ពស់ជាច្រើនរបស់រដ្ឋាភិបាលមុន ។ រដ្ឋមន្ត្រីហិរញ្ញវត្ថុ លោក Mangala Samaraweera…
ទីក្រុងកូឡុំបូ ៖ ក្រសួងហិរញ្ញវត្ថុរបស់ស្រីលង្កាបានព្រមានកាលពីថ្ងៃអាទិត្យថា ប្រទេសនេះអាចនឹងធ្លាក់ក្នុងវិបត្តិបំណុល ព្រោះតែគម្រោងមានតម្លៃខ្ពស់ជាច្រើនរបស់រដ្ឋាភិបាលមុន ។
រដ្ឋមន្ត្រីហិរញ្ញវត្ថុ លោក Mangala Samaraweera បាននិយាយថា ប្រាក់សំណង និងការប្រាក់សរុប អាចនឹងកើនឡើងដល់២,៨៤ប៊ីលានដុល្លារនៅឆ្នាំនេះ ដែលភាគច្រើនសម្រាប់បង់គម្រោងរបស់រដ្ឋាភិបាលមុន ដែលស្ថិតក្រោមការគ្រប់គ្រងរបស់លោក Mahinda Rajapakse ។
លោក Samaraweera បាននិយាយក្នុងសេចក្តីថ្លែងការណ៍ថា ៖« វិបត្តិនេះនឹងកាន់តែធ្ងន់ធ្ងរឡើងនៅឆ្នាំក្រោយ ហើយប្រាក់សំណងនឹងកើនដល់៤,២៨ប៊ីលានដុល្លារនៅឆ្នាំ២០១៩»។
លោកបន្តថា រដ្ឋាភិបាលរបស់លោក Rajapakse បានទទួលប្រាក់កម្ចីដែលមានអត្រាការប្រាក់យ៉ាងខ្ពស់នៅឆ្នាំចុងក្រោយនៃការគ្រប់គ្រងរបស់លោក ។
លោក Rajapakse បានពឹងផ្អែកយ៉ាងខ្លាំងលើប្រទេសចិន ក្នុងការផ្តល់មូលធនសម្រាប់គម្រោងហេដ្ឋារចនាសម្ព័ន្ធធំៗរបស់លោក ប៉ុន្តែបែរជាដាក់សម្ពាធលើសេដ្ឋកិច្ចរបស់ប្រទេសនេះទៅវិញ ។
រដ្ឋាភិបាលថ្មីត្រូវបង្ខំចិត្តជួលកំពង់ផែមួយឲ្យទៅប្រទេសចិនទៀតផង ។ អាកាសយានដ្ឋានអន្តរជាតិមួយរបស់ស្រីលង្កា ក៏ជួបនឹងលទ្ធផលដូចគ្នានេះដែរ បន្ទាប់ពីរកប្រាក់ចំណូលមិនគ្រប់គ្រាន់ ។
កាលពីខែមិថុនា ឆ្នាំ២០១៦ ប្រទេសស្រីលង្កាបានទទួលកញ្ចប់សង្គ្រោះប្រមាណ១,៥ប៊ីលានដុល្លារពីមូលនិធិរូបិយវត្ថុអន្តរជាតិ (IMF)។
កាលពីដើមខែនេះ រដ្ឋាភិបាលបានបង្កើនតម្លៃប្រេងឥន្ធនៈក្នុងស្រុកយ៉ាងខ្លាំង បន្ទាប់ពី IMF បានដាក់សម្ពាធ ហើយធនាគារជាតិក៏បានកាត់បន្ថយការឧបត្ថម្ភធនធំៗផងដែរ ៕
ចែករំលែកព័តមាននេះ