ខេត្តបាត់ដំបង ៖ យ៉ាងហោចណាស់លំនៅឋានចំនួន៤ខ្នង រួមទាំងទ្រព្យសម្បត្តិមួយចំនួនផង ត្រូវបានអគ្គីភ័យឆាបឆេះអស់គ្មានសល់ កាលពីវេលាម៉ោង៩ និង១០នាទីយប់ ថ្ងៃទី២០ ឧសភា នៅចំណុចផ្សារតាឡន…
ខេត្តបាត់ដំបង ៖ យ៉ាងហោចណាស់លំនៅឋានចំនួន៤ខ្នង រួមទាំងទ្រព្យសម្បត្តិមួយចំនួនផង ត្រូវបានអគ្គីភ័យឆាបឆេះអស់គ្មានសល់ កាលពីវេលាម៉ោង៩ និង១០នាទីយប់ ថ្ងៃទី២០ ឧសភា នៅចំណុចផ្សារតាឡន ស្ថិតក្នុងភូមិត្រពាំងព្រលិត ឃុំសន្តិភាព ស្រុកសំពៅលូន ដែលគេសង្ស័យបណ្ដាលមកពីការផ្ទះកំប៉ុងហ្គាស។ មន្ត្រីពន្លត់អគ្គីភ័យបានរាយការណ៍ថា លំនៅឋានទាំង៤ខ្នងនោះធ្វើពីឈើប្រក់ស័ង្កសីដែលផ្ទះខ្លះមានទំហំ៤ម៉x៦ម៉ និងខ្លះទំហំ៥ម៉x៦ម៉ ដែលសង់ក្បែរគ្នាដូចផ្ទះល្វែង។ រីឯម្ចាស់ផ្ទះរងគ្រោះមាន ១,ឈ្មោះ ហេង ផល្លា ភេទប្រុស អាយុ៤៥ឆ្នាំ ឆេះខូចខាតទាំងស្រុង និងជាផ្ទះដើមហេតុបង្កឲ្យមានអគ្គីភ័យ។ ២-ឈ្មោះ ចាប មន ស្រី អាយុ៥៩ឆ្នាំ ឆេះជញ្ជាំងមួយចំហៀង និងទ្រព្យសម្បត្តិក្នុងផ្ទះមួយចំនួន។ ៣-ឈ្មោះ អឿន សំងាត់ ភេទប្រុស អាយុ៤២ឆ្នាំ ឆេះទាំងផ្ទះ និងសម្ភារនៅក្នុងផ្ទះអស់ទាំងស្រុង និង៤-ឈ្មោះ កែវ ហួន ភេទស្រី អាយុ៦១ឆ្នាំ ផ្ទះ និងទ្រព្យសម្បត្តិត្រូវខូចខាតទាំងស្រុង។
តាមរយៈរបាយការណ៍ដដែល លោក គឹម ប៊ុនធឿន នាយការិយាល័យបង្ការពន្លត់អគ្គិភ័យ និងសង្គ្រោះ បាននិយាយថា មានតែរថយន្តបន្លត់អគ្គិភ័យរបស់ អធិការស្រុកមួយគ្រឿងប៉ុណ្ណោះដែលបានអន្តរាគមន៍ និងអ្នកភូមិបានជួយជះទឹកពន្លត់ ដោយសារផ្លូវឆ្ងាយធ្វើឲ្យរថយន្តតាមបណ្ដាស្រុកដទៃជួបការលំបាកជួយសង្គ្រោះ។ លោកថា បើតាមសេចក្ដីរាយការណ៍ពីសមត្ថកិច្ចមូលដ្ឋាន គេនៅមិនទាន់រកឃើញមូលហេតុ នៃការបង្កឲ្យមានអគ្គិភ័យនោះទេ តែអគ្គិភ័យនោះចាប់ផ្ដើមពីផ្ទះរបស់ឈ្មោះ ហេង ផល្លា មុនគេ ហើយក៏ឆេះរាលដាលរហូតអស់៤ខ្នងតែម្ដង។ ប៉ុន្តែបើតាមប្រភពព័ត៌មានបានប្រាប់ថា អគ្គិភ័យនោះទំនងបណ្ដាលមកពីការផ្ទះកំប៉ុងហ្គាស ព្រោះគេបានឮសំឡេងផ្ទុះខ្លាំង មុនពេលមានអគ្គិភ័យកើតឡើង ហើយក៏ឃើញអណ្ដាតភ្លើងឆេះយ៉ាងសន្ធោសន្ធៅចេញពីផ្ទះឈ្មោះ ហេង ផល្លា នោះតែម្ដង។
ប្រភពដដែលបានបញ្ជាក់ថា ពេលនេះគេឃើញផ្ទះស្ទុះរត់ចេញក្រៅ ស្រែករកជំនួយ ពីអ្នកជិតខាង ទើបបង្កការភ្ញាក់ផ្អើលទាំងប្រជាពលរដ្ឋទាំងសមត្ថកិច្ចតែម្ដង។ ពេលនោះភ្លើងឆាបឆេះកាន់តែខ្លាំងឆ្លងពីផ្ទះមួយទៅផ្ទះមួយដែលនៅជាប់គ្នា រីឯម្ចាស់ផ្ទះនីមួយៗបានប្រឹងប្រែងជញ្ជួនអីវ៉ាន់ចេញពីផ្ទះ ខណៈអ្នកភូមិបានប្រឹងប្រែងដងទឹកជួយពន្លត់ ប្រណាំងនឹងរថយន្តពន្លត់អគ្គីភ័យរបស់សមត្ថកិច្ច។ ប៉ុន្តែតាមមើលទៅមានអីវ៉ាន់តិចបំផុត ដែលម្ចាស់រំដោះបានចេញក្រៅផ្ទះ ព្រោះកម្លាំងភ្លើងខ្លាំងពេក។ លោក គឹម ប៊ុនធឿន នាយការិយាល័យពន្លត់អគ្គីភ័យបានសរសេរក្នុងរបាយការណ៍ថា រថយន្តពន្លត់អគ្គីភ័យបានបាញ់ ទប់ស្កាត់មិនឲ្យឆេះឆ្លងរាលដាលដល់ផ្ទះដទៃទៀតដែលនៅក្បែរនោះ តែសំណាងល្អដែលមិនមាន គ្រោះថ្នាក់ដល់ម្ចាស់ផ្ទះ ឬអ្នកជួយសង្គ្រោះណាម្នាក់ឡើយ។ លោកបានបញ្ជាក់ថា ពេលនេះមន្ត្រីជំនាញកំពុងសួរនាំដើម្បីស្រាវជ្រាវរកអំពីមូលហេតុដែលនាំឲ្យមានអគ្គីភ័យនេះ តែមិនទាន់ដឹងអំពីទំហំនៃការខូចខាត នៃផ្ទះនីមួយៗនៅឡើយទេ៕
ចែករំលែកព័តមាននេះ