ខេត្តកណ្តាល ៖ ហេតុការណ៍គ្រោះថ្នាក់គួរឲ្យអាណោចអាធ័មបំផុតមួយ បានកើតឡើងកាលពីវេលាម៉ោង៦និង៥០នាទីល្ងាចថ្ងៃទី១៩ ឧសភា នៅលើកំណាត់ផ្លូវជាតិលេខ៥ ចន្លោះគីឡូម៉ែត្រលេខ៣៦និងលេខ៣៧ ត្រង់ចំណុចភូមិអំពិលដាំទឹក ឃំុវិហារហ្លួង ស្រុកពញាឮ ។ ម៉ូតូ២គ្រឿងបានបុកគ្នា បណ្ដាលឲ្យខ្ទាតចូលក្រោមរថយន្តធុនធំ១គ្រឿង កិនស្លាប់ភ្លាមៗនៅនឹងកន្លែងកើតហេតុទាំងឪពុក និងម្ដាយព្រមទាំងកូនក្នុងផ្ទៃផង ចំណែកកូនម្នាក់ទៀតរបួសធ្ងន់ ។
លោក ដួង តេង អធិការនគបាលស្រុកពញាឮ ថ្លែងថា អ្នកដែលស្លាប់ក្នុងហេតុការណ៍គ្រោះថ្នាក់នេះ ១-ឈ្មោះ ធ្លក សុផល ភេទប្រុសអាយុ៤៦ ជាប្ដី និងជាអ្នកបើកបរម៉ូតូ ២-ឈ្មោះ ចាន់ សុខឃីម អាយុ៤២ ជាអ្នករួមដំណើរនិងជាប្រពន្ធដែលមានផ្ទៃពោះផង ។ ចំណែកកូនម្នាក់ដែលរួមដំណើរនៅមិនទាន់ស្គាល់ឈ្មោះទេរងរបួសស្រាលត្រូវបញ្ជូនទៅមន្ទីរពេទ្យគន្ធបុប្ផា ។ ក្រុមគ្រួសារដែលរងគ្រោះនេះ រស់នៅភូមិ ស្រែចិន្ដា ឃំុព្រះស្រែ ស្រុកឧដុង្គ ខេត្តកំពង់ស្ពឺ ជិះម៉ូតូស៊ុយហ្សុ៊យគីវីវ៉ា ពណ៌ខ្មៅ ពាក់ផ្លាកលេខ ភ្នំពេញ១CW-៩៣៩២ ធ្វើដំណើរក្នុងទិសដៅពីកើតទៅលិច ។ លុះទៅដល់ចំណុចខាងលើ បានជែងម៉ូតូមួយគ្រឿងទៀត ក៏ទាក់ដៃចង្កូតគ្នាបណ្តាលឲ្យដួលចូលក្រោមរថយន្តធុនធ្ងន់មួយគ្រឿងកិនស្លាប់តែម្តង ។ ចំណែកម៉ូតូមួយគ្រឿងទៀតនោះ បើកបរដោយឈ្មោះ ឈួ ឆាងឈុនភេទប្រុស អាយុ ១៧ឆ្នាំ និងអ្នករួមដំណើរ ឈ្មោះ ប៉ាន កុសល ភេទប្រុស អាយុ១៩ឆ្នាំ ។ទាំង២នាក់រស់នៅភូមិចេតិយថ្មី ឃំុវិហារហ្លួង ស្រុកពញាឮ រងរបួសស្រាល ។
លោកអធិការ ដួង តេង ឲ្យដឹងទៀតថារីឯរថយន្តម៉ាកហុីយ៉ាន់ដាយ ពណ៌ស ពាក់ផ្លាកលេខ ភ្នំពេញ ៣B-៩៣៥៤ ជាប្រភេទរថយន្តដឹកទំនិញ អ្នកបើកបរឈ្មោះ ព្រាប ធា ភេទប្រុស អាយុ៣២ឆ្នាំ រស់នៅឃុំកំពង់ត្រាច ស្រុករមាសហែកខេត្ត ស្វាយរៀង ត្រូវបានឃាត់ខ្លួន ។ លោកអធិការបញ្ជាក់ថា សពជនរងគ្រោះត្រូវបានប្រគល់ទៅឲ្យសាច់ញាតិយកទៅធ្វើបុណ្យតាមប្រពៃណី ។
អ្វីដែលគួរឱ្យរន្ធត់បំផុតនោះ គឺស្ត្រីជាប្រពន្ធដែលមានផ្ទៃពោះជិតគ្រប់ខែទៅហើយ ត្រូវដួលចូលក្រោមកង់រថយន្តកិនខ្ទេចខ្លួនធ្លាយទាំងទារកដែលនៅក្នុងផ្ទៃចេញមកក្រៅ គឺគេស្លាប់តាំងពីមិនទាន់ឃើញពន្លឺព្រះអាទិត្យ ពិតជាគួរឱ្យសង្វេគខ្លាំងណាស់ ៕
ចែករំលែកព័តមាននេះ