ខេត្តកំពង់ស្ពឺ ៖ ជាតិជាម្តាយរមែងមានក្តីមេត្តាចំពោះកូន តែដោយឡែកកម្មការិនីរោងចក្រម្នាក់ បែរជាបង្កើតកូនទុកចោល ដូចសត្វធាតុនៅក្នុងបន្ទប់ទឹក ហើយគេចខ្លួនបាត់ ដោយបន្សល់ទុកទារកកម្សត់នៅក្បែរចានបង្គន់យ៉ាងអាណោចអាធ័មបំផុត ។ ការប្រទះឃើញទារកនៅក្នុងបង្គន់នេះ…
ខេត្តកំពង់ស្ពឺ ៖ ជាតិជាម្តាយរមែងមានក្តីមេត្តាចំពោះកូន តែដោយឡែកកម្មការិនីរោងចក្រម្នាក់ បែរជាបង្កើតកូនទុកចោល ដូចសត្វធាតុនៅក្នុងបន្ទប់ទឹក ហើយគេចខ្លួនបាត់ ដោយបន្សល់ទុកទារកកម្សត់នៅក្បែរចានបង្គន់យ៉ាងអាណោចអាធ័មបំផុត ។ ការប្រទះឃើញទារកនៅក្នុងបង្គន់នេះ គឺក្រោយពេលកម្ម ការិនីមួយរូបផ្សេងទៀតចូលបន្ទប់ទឹកឃើញ ក៏រាយការណ៍ទៅអ្នកដឹកនាំរោងចក្រ ទើបគ្រូពេទ្យប្រចាំរោង ចក្រមកសង្គ្រោះ រួចនាំយកទារកកម្សត់នេះ តាមរថយន្តដឹកទៅសង្គ្រោះបន្ត តែមិនដឹងថាខាងរោងចក្រនាំយកទារកនេះ ទៅកាន់មន្ទីរពេទ្យណាឡើយ ។
ហេតុការណ៍នេះ កើតឡើងកាលពីរសៀលថ្ងៃទី១៩ ឧសភា នៅក្នុងរោងចក្រវីងស្ដាស៊ូ ស្ថិតតាមផ្លូវជាតិលេខ៣ ភូមិអង្គសុគន្ធា ឃុំមហាឫស្សី ស្រុកគងពិសី ។ ករណីម្តាយបង្កើតកូនចោលក្នុងបន្ទប់ទឹកហើយគេចខ្លួនបាត់នេះ ត្រូវបានមន្ត្រីពាក់ព័ន្ធព្យាយាមលាក់បាំង មិនចង់ឱ្យបែកធ្លាយព័ត៌មាននេះចេញក្រៅ
ឡើយ ។ ជាមួយនេះ ក៏មិនដឹងថា ហេតុអ្វីបានជាអស់លោកដែលជាមន្ត្រីពាក់ព័ន្ធ ក៏បានព្យាយាមបិទបាំងព័ត៌មាននេះ មិនឱ្យអ្នកសារព័ត៌មានដឹងដែរ ។
បើតាមមន្ត្រីមួយរូបនៅមន្ទីរការងារ និងបណ្តុះបណ្តាលវិជ្ជាជីវៈខេត្តបានបង្ហើបថា តាមពិតខាងមន្ទីរមិនចង់ឱ្យផ្សាយ ព្រោះខ្លាចអ្នកកុម្មង់ទិញទំនិញពីរោងចក្រនេះ ផ្អាកការបញ្ជាទិញ ។ ម្យ៉ាងទៀត ក៏ខ្លាចខាងអង្គការILO ចុះមកស៊ើបអង្កេតករណីនេះ ពីបទមិនគោរពតាមច្បាប់ការងារត្រង់ថា ស្ត្រីគ្រប់ខែឆ្លងទន្លេត្រូវបានអនុញ្ញាតឲ្យសម្រាកឱ្យបានគ្រប់គ្រាន់ មុនពេលសម្រាលកូន ។
ដោយឡែក យោងតាមរបាយការណ៍ដែលបែកធ្លាយតាមរយៈបណ្តាញទំនាក់ទំនងសង្គមបានរាយការណ៍ថា «មុនពេលមានការភ្ញាក់ផ្អើលពីករណីខាងលើ គឺខាងរោងចក្រមានកម្មវិធីចាប់រង្វាន់ផ្ដល់ជូនកម្មករដែលបម្រើការងារនៅក្នុងរោងចក្រនេះ ហើយសភាពមនុស្សច្រើនអ៊ូអរមិនអាចដឹងថា អ្នកណាជាម្តាយទារកអភ័ព្វនេះឡើយ» ។ ពេលនេះ ទាំងនគរបាលនិងសមត្ថកិច្ចពាក់ព័ន្ធ កំពុងស្វែងរកម្ដាយទារកខាងលើ ។
មានការលើកឡើងផងដែរថា បើចង់រកម្តាយទារកនេះ សួរតែខាងរដ្ឋបាលរោងចក្រទៅប្រាកដជាដឹងជាក់ជាមិនខានឡើយ ព្រោះគ្មានអ្នកក្រៅដែលមិនមែនជាអ្នកបម្រើការក្នុងរោងចក្រនេះ អាចចេញចូលក្នុងបរិ វេណរោងចក្របានឡើយ ។ មួយវិញទៀត នៅថ្ងៃនោះ កម្មករធ្វើការធម្មតា ហើយកម្មករដែលមានផ្ទៃពោះក៏ស្ថិតក្នុងស្ថិតិរបស់រោងចក្រដែរ រឿងអីរកមុខកម្មការិនីរូបនោះមិនឃើញ ។
អ្វីដែលគេមានការចាប់អារម្មណ៍នោះគឺថា តើមូលហេតុអ្វី ទើបបានជាម្តាយបង្កើតកូនហើយទុកចោលបែបនេះ បំណាច់នឹងពពោះទាំងលំបាក៩ខែ១០ថ្ងៃទៅហើយនោះ ?
តាមព័ត៌មានចុងក្រោយឲ្យដឹងថា ទារកកម្សត់ត្រូវបានក្រុមគ្រូពេទ្យប្រចាំរោងចក្របញ្ជូនទៅកាន់មណ្ឌលសុខភាពត្រាំខ្នារ ដើម្បីសង្គ្រោះបន្ទាន់ ដែលរហូតមកដល់ពេលនេះ សុខភាពរបស់គេធម្មតាមិនប៉ះពាល់ដល់អាយុជីវិតឡើយ ៕
ចែករំលែកព័តមាននេះ