រាជធានីភ្នំពេញ ៖ តារាចម្រៀងលោកសុះ ម៉ាច កាលពីពេល ថ្មីៗកន្លងបានសម្តែងក្តីបារម្ភខ្លាចបាត់បង់អាជីពសិល្បៈរបស់លោកដែលកំពុងប្រកបនាពេលសព្វថ្ងៃ ។ តើហេតុនអ្វីបានជាលោកបារម្ភបែបនេះ ? លោកសុះ…
រាជធានីភ្នំពេញ ៖ តារាចម្រៀងលោកសុះ ម៉ាច កាលពីពេល ថ្មីៗកន្លងបានសម្តែងក្តីបារម្ភខ្លាចបាត់បង់អាជីពសិល្បៈរបស់លោកដែលកំពុងប្រកបនាពេលសព្វថ្ងៃ ។ តើហេតុនអ្វីបានជាលោកបារម្ភបែបនេះ ?
លោកសុះ ម៉ាច បានប្រកាសជាសាធារណៈថា រូបលោកកំពុងតែពិចារណាចង់ចូលប្រឡូកនៅក្នុងគណបក្សនយោនបាយមួយ ដែលនឹងចូលរួមប្រកួតប្រជែងក្នុងការបោះឆ្នោតនាពេលខាងមុខ ។ បន្ទាប់ពីការប្រកាសបែបនេះមក លោកបានប្រកាសថ្មីទៀតថាលោកនឹងមិនចូលប្រឡូកក្នុងឆាកនយោបាយទេ ព្រោះខ្លាចបាត់អាជីពសិល្បៈរបស់លោក ។
គណបក្សដែលលោកសុះ ម៉ាច មានបំណងចូលរួមនោះត្រូវលោកអះអាងថា មិនមែនជាគណបក្សធំឡើយ ប៉ុន្តែគណបក្សនោះមានគោលការណ៍ច្បាស់ក្នុងការធ្វើឲ្យប្រទេសជាតិមានការរីកចម្រើន ។ បន្ទាប់ពីការប្រកាសពីការចង់ចូលរួមប្រឡូកក្នុងឆាកនយោបាយមិននបានប៉ុន្មានផង លោកសុះ ម៉ាច បានបញ្ជាក់ថា លោកនឹងមិនចូលប្រឡូកនយោបាយឡើយ ដោយសារតែខ្លាចបាត់បង់អាជីពសិល្បៈ ។
អតីតប្រធានសមាគមសិល្បករខ្មែរលោក សុះ ម៉ាច និយាយថា ក្រោយពីពិភាក្សាជាមួយក្រុមគ្រួសារ និងមិត្តភក្តិដែលជាអ្នកច្បាប់ មន្ត្រីរាជការ មិត្តសិល្បៈរួមអាជីព ព្រមទាំងបណ្តាមិត្តក្នុងសង្គម Facebookបានជួយផ្តល់ជាយោបល់ជាច្រើន ខ្លះយល់ស្របឱ្យចូលរួម មិត្តខ្លះសូមកុំឱ្យចូលរួមក្នុងឆាកនយោបាយ ។ លោកសុះ ម៉ាច បញ្ជាក់ថា «ខ្ញុំក៏បានដកឃ្លាមកគិតពីស្ថានការណ៍នយោបាយពីមុន និងឥឡូវ ជាពិសេសរឿងរ៉ាវដែលកើតមានលើអ្នកនយោបាយមួយចំនួន ធ្វើឱ្យខ្ញុំសម្រេចចិត្តមិនចូលប្រឡូកក្នុងឆាកនយោបាយឡើយសម្រាប់ពេលនេះ »។
បើតាមលោកសុះ ម៉ាច ការមិនចូលរួមក្នុងឆាកនយោបាយរបស់លោកនាពេលនេះមិនប្រាកដឡើយ ដោយសារតែលោកនឹងរង់ចាំមើល៥ឆ្នាំខាងមុខទៀត បើបរិយាកាសល្អ លោកអាចនឹងចូលប្រឡូក ។ លោកបន្ថែមថា «បើខ្ញុំប្រឡូកនយោបាយនៅពេលនេះ អាជីពសិល្ប:របស់ខ្ញុំនឹងត្រូវចប់ បើជីវិតរបស់ខ្ញុំសព្វថ្ងៃពឹងលើតែសិល្បៈ ដូច្នេះខ្ញុំមិនអាចឡើយ! ខ្ញុំសូមអរគុណចំពោះមតិយោបល់របស់លោកអ្នក »។
នាពេលកន្លងមកលោកសុះ ម៉ាច បានប្រកាសជាសាធារណៈថា បើសិនលោកចូលប្រឡូកក្នុងឆាកនយោបាយជាតំណាងរាស្ត្រ នៅក្នុងគណបក្សណាមួយ តើគាំទ្រឱ្យលោកចូលរួមទេ ។ លោកសរសេរតាមហ្វេសប៊ុកថា «ខ្ញុំចង់ចូលរួមបម្រើជាតិទៅតាមចំណេះដឹងនិងមនសិការជាតិ រួមទាំងការសិក្សាឈ្វេងយល់របស់ខ្ញុំនៅពេលដែលខ្ញុំចេញទៅបណ្តាប្រទេសធំៗនានាផងដែរ ។
ខ្ញុំតែងតែស្រមៃចង់បានប្រទេសខ្ញុំរីកចម្រើន ប្រជាពលរដ្ឋខ្មែររស់នៅប្រកបដោយសុខសន្តិភាព ស្ថិរភាពសិទ្ធិសេរីភាព ស្មើភាពគ្នា មានការងារមានប្រាក់ខែខ្ពស់អាចរស់បានស្រួលជាងសព្វថ្ងៃទៅទៀត…។ និយាយរួមក្នុងបំណងរបស់ខ្ញុំនៅពេលដែលជីវភាពគ្រួសាររបស់ខ្ញុំធូរធារ ខ្ញុំចង់ចូលរួមបម្រើជាតិដូចលោកឪពុកខ្ញុំដែរ ទោះនៅក្របខណ្ឌណាក៏ដោយ បក្សណាក៏ដោយ ឲ្យតែផ្តល់ឱកាសឱ្យខ្ញុំ ហើយនឹងស្របទៅតាមមនសិការនិងឧត្តមគតិរបស់ខ្ញុំ ។ ឥឡូវនេះមិត្តសម្លាញ់របស់ខ្ញុំបានបបួលខ្ញុំចូលរួមបក្សនយោបាយមួយដោយឱ្យឈរឈ្មោះជាតំណាងរាស្ត្រ ។ ខ្ញុំកំពុងតែពិចារណានៅពេលដែលជីវភាពរស់នៅរបស់ខ្ញុំនៅមានកម្រិតនៅឡើយ ណាមួយខ្ញុំនៅស្រឡាញ់សិល្ប:ខ្លាំងណាស់ បើប្រឡូកនយោបាយនឹងឃ្លាតឆ្ងាយពីសិល្បៈ ម្យ៉ាងវិញទៀតបរិយាកាសនយោបាយសព្វថ្ងៃហាក់ពុំទាន់មានអំណោយផលដល់រូបខ្ញុំនៅឡើយ »៕
ចែករំលែកព័តមាននេះ