រាជធានីភ្នំពេញ ៖ កាលពីថ្ងៃទី១០ ឧសភា កន្លងមក គណៈប្រតិភូនៃក្រុមហ៊ុន FLC Group របស់វៀតណាម បានជួបជាមួយលោករដ្ឋមន្ត្រីក្រសួងកសិកម្មនៃព្រះរាជាណាចក្រកម្ពុជា…
រាជធានីភ្នំពេញ ៖ កាលពីថ្ងៃទី១០ ឧសភា កន្លងមក គណៈប្រតិភូនៃក្រុមហ៊ុន FLC Group របស់វៀតណាម បានជួបជាមួយលោករដ្ឋមន្ត្រីក្រសួងកសិកម្មនៃព្រះរាជាណាចក្រកម្ពុជា ក្នុងគោលបំណងចង់បោះទុនវិនិយោគលើវិស័យកសិកម្ម, ទេសចរណ៍, អាកាសចរណ៍ និងសណ្ឋាគារ ដោយបានត្រៀមទុនប្រមាណ១ពាន់លានដុល្លារគ្រោងនឹងវិនិយោគនៅឆ្នាំ២០១៩ខាងមុខ ។ ដំណឹងនេះកំពុងស្ថិតក្នុងចំណាប់អារម្មណ៍របស់ពលរដ្ឋកម្ពុជា ពិសេសអ្នកតាមដានបញ្ហាវិវត្តន៍នៃសង្គម និងបានលើកឡើងពីចំណាប់អារម្មណ៍ខុសៗគ្នាទៅតាមការយល់ឃើញរៀងៗខ្លួន ។
បើតាមនាយិកាអង្គការជំនាញខាងកសិកម្ម សេដាក យល់ឃើញថា គម្រោងវិនិយោគរបស់ក្រុមហ៊ុនវៀតណាមលើវិស័យកសិកម្មនៅកម្ពុជានេះ វាផ្តល់ផលអវិជ្ជមានច្រើនជាងវិជ្ជមាន ព្រោះកម្ពុជាក៏ជាប្រទេសកសិកម្មដែរ ។
លោកស្រី តុង ចាន់ធាង នាយិកាអង្គការនេះមានប្រសាសន៍ថា ៖« គម្រោងវិនិយោគរបស់ក្រុមហ៊ុនវៀតណាមនេះមានផលអវិជ្ជមានច្រើន ពីព្រោះប្រទេសយើងក៏ជាប្រទេសកសិកម្មចម្បងដែរ ។ ថ្មីៗនេះ យើងឃើញគម្រោងរបស់រដ្ឋាភិបាល ក៏ដូចជាវិស័យឯកជន និងអង្គការក្រៅរដ្ឋាភិបាលមួយចំនួន បាននិងកំពុងធ្វើការអភិវឌ្ឍនៅលើវិស័យកសិកម្មនេះមានច្រើនគួរសម ។ នៅពេលខាងមុខ បើមានគម្រោងធំរបស់ប្រទេសជិតខាងមកអនុវត្តលើទឹកដីកម្ពុជាទៀត វាអាចប៉ះពាល់ដល់ការប្រកួតប្រជែងផលិតផលនៅលើទីផ្សារ និងធនធានសម្រាប់ប្រើប្រាស់ ជាពិសេស បើគាត់អាចផលិតបាននូវផលិតផលល្អ ហើយមានតម្លៃថោកនោះ ធ្វើឱ្យកសិករមិនទទួលបានប្រាក់ចំណេញទេ ព្រោះកសិករយើងមានភាពទន់ខ្សោយទាំងទៅលើធនធាន និងហេដ្ឋារចនាសម្ព័ន្ធជាមូលដ្ឋានគាំទ្រដល់ការផលិតរាល់មុខដំណាំ » ។
លោកស្រីលើកឡើងថា ៖« កន្លងមក កសិករកម្ពុជាមានការយល់ដឹងពីបច្ចេកទេស និងធនធានដែលគាំទ្រដល់ការផលិត ហាក់នៅមានកម្រិត ។ ប៉ុន្តែថ្មីៗនេះ យើងឃើញមានការខិតខំជំរុញអភិវឌ្ឍន៍លើវិស័យកសិកម្មទាំងដំណាំបន្លែ និងដំណាំហូបផ្លែ តែបើយើងធៀបនឹងប្រទេសជិតខាង បច្ចេកទេសយើងនៅទាបជាងគេ ដោយសារយើងកង្វះខាតនូវកត្តាមួយចំនួន ជាពិសេស ទៅលើហេដ្ឋារចនាសម្ព័ន្ធ ធារាសាស្ត្រ អគ្គិសនី ផ្លូវថ្នល់ រួមនឹងបច្ចេកទេសក្នុងការដាំដុះ » ។
ចំណែកលោក ង៉ែត ជូ ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍ក្រុមហ៊ុន Emerging Markets Consulting បានបង្ហាញពីការយល់ឃើញស្រដៀងគ្នានេះដែរ ដោយលោកលើកឡើងថា វាហាក់មិនចំណេញអ្វីទេ ថែមទាំងធ្វើឲ្យបាត់បង់សមត្ថភាពប្រកួតប្រជែងរបស់កសិករក្នុងស្រុកទៀតផង ។
លោកថ្លែងថា ៖« បច្ចេកទេសរបស់កសិករយើងនៅទាបណាស់ បើធៀបនឹងវៀតណាម ក្រុមហ៊ុនវៀតណាមអាចមានលទ្ធភាពទទួលបានប្រាក់កម្ចី ដែលមានការប្រាក់ទាបពីធនាគារវៀតណាម ។ បន្ថែមលើការបាត់បង់សមត្ថភាពប្រកួតប្រជែង ក៏អាចធ្វើឲ្យកេរ្តិ៍ឈ្មោះផលិតផលខ្មែរមានបញ្ហាដែរ ព្រោះផលិតផលវៀតណាមប្រើសារធាតុគីមីខ្លាំងពេក និងត្រូវបានសហគមន៍អឺរ៉ុបដាក់ក្នុងបញ្ជីខ្មៅ » ។
លោក ច័ន្ទ សុផល នាយកមជ្ឈមណ្ឌលសិក្សាគោលនយោបាយ បានលើកឡើងថា ការផ្គត់ផ្គង់បន្លែរបស់វៀតណាមមកកម្ពុជាសព្វថ្ងៃ ប្រៀបដូចទុយោទឹកដ៏ធំមួយ ដែលហូរចូលពីវៀតណាម ដូច្នេះ គេ [វៀតណាម] មិនផ្ដាច់ទុយោនេះចោលទេ ។
លោក ច័ន្ទ សុផល បានសរសេរនៅក្នុងហ្វេសប៊ុកផ្ទាល់ខ្លួនរបស់លោកថា ៖« ជារួម នៅក្នុងប្រទេសកម្ពុជា តម្រូវការបរិភោគបន្លែមានរាល់ថ្ងៃ ដូចតម្រូវការបរិភោគទឹកអីចឹង ។ កន្លងមក ការផ្គត់ផ្គង់បន្លែមួយចំនួនធំ មានជាប់លាប់ជារៀងរាល់ថ្ងៃមកពីប្រទេសវៀតណាម គឺប្រៀបដូចជាទុយោទឹកធំមួយបង្ហូរចូលពីវៀតណាម មកផ្សារលក់ដុំនៅកម្ពុជា។ ការផលិតនៅកម្ពុជា នៅមានលក្ខណៈជារដូវកាល។ ជួនមានច្រើន ជួនលើសសល់ចោល ហើយជួនកាលខ្វះ មិនទាន់ធានាបាននូវបរិមាណគ្រប់គ្រាន់ និងទៀងទាត់ យកទៅជំនួសឱ្យលំហូរប្រចាំថ្ងៃមកពីវៀតណាមនៅឡើយ ។ គេមិនផ្តាច់ទុយោទឹកគេចោល ហើយមកទិញទឹកធុងម្តងម្កាលដែលមិនទៀងទាត់ទេ ។ ត្រង់នេះហើយដែលធ្វើឱ្យកសិករខ្លះស្រែកថា ខ្វះទីផ្សារ » ។
លោកបន្ដថា ៖« ដំណោះស្រាយ គឺទាល់តែមានការផលិត និងផ្គត់ផ្គង់ផលិតផលឱ្យបានទៀងទាត់សម្រាប់៣៦៥ថ្ងៃក្នុង១ឆ្នាំ ។ ការធ្វើដូច្នេះបាន ទាល់តែមានការវិនិយោគថែមទៀតប្រកបដោយបច្ចេកវិទ្យាទំនើបៗនៅតំបន់ត្រជាក់ផង និងសម្របសម្រួលទីផ្សារឱ្យបានសព្វជ្រុងជ្រោយ ។ ក្នុងន័យធៀប គឺត្រូវបង្កើតទុយោទឹកថ្មីមួយ ហើយត្រូវធានាឱ្យមានទឹកជាប់ ៣៦៥ថ្ងៃក្នុង១ឆ្នាំ » ។
បន្ទាប់ពីមានការលើកឡើងផ្សេងៗជុំវិញបញ្ហានេះ ក្រសួងកសិកម្ម រុក្ខាប្រមាញ់ និងនេសាទ បានចេញសេចក្ដីប្រកាសព័ត៌មានមួយកាលពីថ្ងៃទី១៨ ឧសភា ដោយបានបញ្ជាក់ថា អ្នកវិនិយោគវៀតណាមគ្រាន់តែបង្ហាញពីគោលបំណងនៃការបោះទុនវិនិយោគលើវិស័យកសិកម្ម ផ្នែកដំណាំស្បៀងសុវត្ថិភាពប៉ុណ្ណោះ។ គម្រោងវិនិយោគខាងលើនេះមិនទាន់ចាប់ផ្តើមនៅឡើយទេ ព្រោះភាគីអ្នកវិនិយោគមិនទាន់ធ្វើការសិក្សាបានច្បាស់លាស់ ស្តីពីផែនការលើការបោះទុនវិនិយោគនៅឡើយ ហើយប្រសិនបើគម្រោងការវិនិយោគនេះដំណើរការ ក្រុមហ៊ុននឹងសហការជាមួយកសិករដាំបន្លែ ផ្លែឈើ រួមទាំងសហគមន៍កសិកម្ម ដោយត្រូវអនុវត្តផលិតកម្មកសិកម្មតាមកិច្ចសន្យា ដើម្បីធ្វើការផលិតតាមគោលការណ៍កសិកម្មសរីរាង្គ ឬការអនុវត្តកសិកម្មល្អ (Good Agricultural Practice-GAP) សម្រាប់ផ្គត់ផ្គង់សណ្ឋាគារ កន្លែងលម្ហែកាយ ទាំងនៅកម្ពុជា និងនៅប្រទេសវៀតណាម ។ ក្រុមហ៊ុននឹងរៀបចំកសិដ្ឋានដាំដុះគំរូ ដើម្បីបង្ហាញឲ្យកសិករធ្វើការដាំដុះតាមបទដ្ឋានបច្ចេកទេសសមស្រប ពូជមានទិន្នផលខ្ពស់ ហើយក្រុមហ៊ុននឹងប្រមូលទិញមកវិញ ដើម្បីបំពេញតម្រូវការទីផ្សារតាមគោលបំណងខាងលើ ។
ក្រសួងបញ្ជាក់ថា ៖« តាមគោលការណ៍របស់រាជរដ្ឋាភិបាល ក្រុមហ៊ុនត្រូវលើកសំណើសុំការគាំទ្រពីក្រុមប្រឹក្សាអភិវឌ្ឍន៍កម្ពុជា ដោយត្រូវដាក់ឆ្លងកិច្ចប្រជុំអន្តរក្រសួងពិនិត្យ និងការវាយតម្លៃលើផលប៉ះពាល់នៃគម្រោងវិនិយោគ ព្រមទាំងត្រូវមានការសម្រេចពីរាជរដ្ឋាភិបាលផងដែរ ។ ចំពោះការលើកឡើងរបស់បណ្តាញព័ត៌មានសង្គមមួយចំនួនកន្លងមក គឺជាការវិភាគមិនទាន់គ្រប់ជ្រុងជ្រោយ និងការឈ្វេងយល់ឲ្យបានស៊ីជម្រៅពីគោលបំណងនៃការវិនិយោគនោះនៅឡើយទេ » ។
ក្រសួងកសិកម្ម រុក្ខាប្រមាញ់ និងនេសាទ សង្ឃឹមយ៉ាងមុតមាំថា សាធារណជនពិតជាបានយល់ច្បាស់អំពីអ្វីដែលក្រសួងបាននិងកំពុងធ្វើ ហើយនឹងជម្រះបាននូវការមន្ទិលសង្ស័យនានា ដែលបានលើកឡើងតាមបណ្តាញព័ត៌មានសង្គមមួយចំនួន ដោយឈរលើការវិភាគមិនបានច្បាស់លាស់ និងសូមមេត្តាជឿជាក់មកលើរាជរដ្ឋាភិបាល ក្នុងការគ្រប់គ្រងការវិនិយោគមួយនេះ ៕
ចែករំលែកព័តមាននេះ