ទីក្រុងបាងកក ៖ អ្នកចិញ្ចឹមជ្រូកក្នុងប្រទេសថៃមានគម្រោងតវ៉ាប្រឆាំង ប្រសិនបើរដ្ឋាភិបាលអនុញ្ញាតឲ្យមានការនាំចូលសាច់ជ្រូកពីសហរដ្ឋអាមេរិក ។
លោក Surachai Sutthitham ប្រធានសមាគមអ្នកចិញ្ចឹមជ្រូក បានឲ្យដឹងថា អ្នកចិញ្ចឹមជ្រូកទូទាំងប្រទេស មិនរីករាយនឹងការនាំចូលសាច់ជ្រូកពីអាមេរិកទេ ព្រោះវាអាចបង្កឲ្យការចិញ្ចឹមជ្រូកក្នុងស្រុកដួលរលំ ។ លោកថា ៖« សមាជិកសមាគមដែលទាក់ទងនឹងការចិញ្ចឹមជ្រូក និងក្រុមហ៊ុនចំនួន១៩ទៀត នឹងប្រមូលផ្តុំគ្នាអង្គុយតវ៉ាប្រឆាំងជាមួយរដ្ឋាភិបាល ប្រសិនបើអនុញ្ញាតឲ្យនាំចូលសាច់ជ្រូកពីអាមេរិក » ។
លោកបន្ថែមថា អ្នកចិញ្ចឹមជ្រូកក្នុងស្រុកបានជួបប្រទះនឹងផលប៉ះពាល់រួចទៅហើយ ដោយសារការផ្គត់ផ្គង់សាច់ជ្រូកក្នុងស្រុកលើសលប់ ។
គេព្យាករថា តម្រូវការសាច់ជ្រូកក្នុងស្រុកនៅឆ្នាំនេះ ស្មើតែ១៤លានក្បាលប៉ុណ្ណោះ ខណៈការចិញ្ចឹមស្មើដល់១៨លានក្បាល ។
លោក Surachai បានលើកឡើងពីប្រទេសវៀតណាម ដែលពួកគេជួបប្រទះនឹងការខាតបង់យ៉ាងខ្លាំងមកពីសាច់ជ្រូកតម្លៃទាប បន្ទាប់ពីរដ្ឋាភិបាលវៀតណាមបើកទីផ្សារ ។
កាលពីថ្ងៃសុក្រ ការិយាល័យតំណាងពាណិជ្ជកម្មអាមេរិកបាននិយាយក្នុងសេចក្តីប្រកាសព័ត៌មានថា ពួកគេនឹងត្រួតពិនិត្យប្រទេសថៃថា គ្រប់លក្ខខណ្ឌសម្រាប់ទទួលបានអាទិភាពពាណិជ្ជកម្មដែរឬទេ បន្ទាប់ពីមានក្រុមហ៊ុនផលិតសាច់ជ្រូកជាច្រើនលើកឡើងពីបញ្ហានេះ ។
កាលពីខែមេសាកន្លងមក ក្រុមប្រឹក្សាអ្នកផលិតសាច់ជ្រូកជាតិរបស់សហរដ្ឋអាមេរិក បានស្នើឲ្យមានការត្រួតពិនិត្យ GSP (generalised system of preferences) ដោយអះអាងថា ប្រទេសថៃមិនអនុញ្ញាតឲ្យផលិតផលអាមេរិក រួមទាំងសាច់ជ្រូក ចូលក្នុងទីផ្សាររបស់ពួកគេទេ ។
យោងតាមសហព័ន្ធនាំចេញសាច់របស់សហរដ្ឋអាមេរិក (US Meat Export Federation) បានឲ្យដឹងថា កាលពីឆ្នាំ២០១៧ ការនាំចេញសាច់ជ្រូកពីសហរដ្ឋអាមេរិកទៅកាន់ប្រទេសថៃ សរុបស្មើ៣១តោន ក្នុងតម្លៃប្រមាណ១២ម៉ឺន៨ពាន់ដុល្លារ ។
សហព័ន្ធនេះបន្តថា សាច់ជ្រូកដែលបានផ្គត់ផ្គង់នៅសហភាពអឺរ៉ុបភាគច្រើន គឺនាំចូលពីប្រទេសថៃ ៕
ចែករំលែកព័តមាននេះ