រាជធានីភ្នំពេញ ៖ យុវជនម្នាក់បានស្លាប់ភ្លាមៗនៅកន្លែងកើតហេតុយ៉ាងអាណោចអាធម៌ និងម្នាក់ទៀតរបួសស្រាល ខណៈពេលជិះម៉ូតូឌុបគ្នា ដោយព្យាយាមជែងរថយន្តមួយគ្រឿង ហើយបើកគេចក៏ជ្រុលទៅដួលចូលក្រោមរថយន្តដឹកដែក កាលពីវេលាម៉ោង៩និង៥០នាទីយប់ ថ្ងៃទី២០ ខែឧសភា…
រាជធានីភ្នំពេញ ៖ យុវជនម្នាក់បានស្លាប់ភ្លាមៗនៅកន្លែងកើតហេតុយ៉ាងអាណោចអាធម៌ និងម្នាក់ទៀតរបួសស្រាល ខណៈពេលជិះម៉ូតូឌុបគ្នា ដោយព្យាយាមជែងរថយន្តមួយគ្រឿង ហើយបើកគេចក៏ជ្រុលទៅដួលចូលក្រោមរថយន្តដឹកដែក កាលពីវេលាម៉ោង៩និង៥០នាទីយប់ ថ្ងៃទី២០ ខែឧសភា ឆ្នាំ២០១៨ នៅមុខវត្តនន្ទមុន្នី ផ្លូវលេខ២១៧ ភូមិដំណាក់ធំ ក្នុងសង្កាត់ស្ទឹងមានជ័យ២ ខណ្ឌមានជ័យ ។
ជនរងគ្រោះដែលស្លាប់ឈ្មោះ សាញ់ ភារិទ្ធ ភេទប្រុស អាយុ១៨ឆ្នាំ មុខរបរកម្មករោងពុម្ភ ស្នាក់នៅខុនដូ សង្កាត់ទួលទំពូង ខណ្ឌចំការមន មានស្រុកកំណើត ភូមិអង្គរជ័យ ខេត្តកំពត ចំណែកម្នាក់ទៀតរងរបួសស្រាល មានឈ្មោះ ថោង សុធារដ្ឋ ភេទប្រុស អាយុ១៧ឆ្នាំ មុខរបរជាមួយគ្នា ជាអ្នកអង្គុយខាងក្រោយ រងរបួសស្រាល ។
តាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុគេបានឃើញរថយន្តម៉ាកហ៊ីយ៉ាន់ដាយ ជារថយន្តដឹកដែក ធ្វើដំណើរតាមបណ្តោយផ្លូវលេខ២១៧ ក្នុងទិសដៅពីត្បូងទៅជើង ខណៈមកដល់ចំណុចកើតហេតុ ស្រាប់តែមានរថយន្តមួយគ្រឿងទៀតមិនចាំម៉ាក និងស្លាកលេខធ្វើដំណើរស្របទិសគ្នា ហើយព្យាយាមបើកជែងរថយន្តដឹកដែក ជិតផុតទៅហើយ ក៏ស្រាប់តែមានយុវជន២នាក់ជិះម៉ូតូហុងដា ពណ៌ខ្មៅ ធ្វើដំណើរមកពីក្រោយ ហើយបានព្យាយាមបើកជែងរថយន្តទាំង២គ្រឿង តែមិនផុតក៏គេចពីរថយន្តខាងស្តាំបានដួលទៅខាងឆ្វេងដៃធ្វើឲ្យអ្នកបើកម៉ូតូចូលក្រោមរថយន្តកិនស្លាប់ភ្លាមៗនៅកន្លែងកើតហេតុ ចំណែកអ្នកអង្គុយខាងក្រោយរបួសស្រាល ។
ភ្លាមនោះអ្នកបើកបរ រថយន្តបានចុះពីរថយន្តគេចខ្លួនបាត់ ក្រោយមកសមត្ថកិច្ចមូលដ្ឋានបានចុះមកដល់ចំណុចកើតហេតុ និងទំនាក់ទំនងទៅជំនាញធ្វើការវាស់វែងយករថយន្ត និងម៉ូតូទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញរង់ចាំដោះស្រាយតាមច្បាប់ ចំណែកសពជនរងគ្រោះប្រគល់ទៅឲ្យក្រុមគ្រួសារយកទៅធ្វើបុណ្យតាមប្រពៃណីនៅស្រុកកំណើត ៕
ចែករំលែកព័តមាននេះ