រាជធានីភ្នំពេញ ៖ ក្រោមយុទ្ធនាការដ៏ក្តៅគគុករយៈពេលពីរថ្ងៃ គឺថ្ងៃទី១៨ និងថ្ងៃទី១៩ ខែឧសភា ឆ្នាំ២០១៨ កម្លាំងសមត្ថកិច្ចនៃមន្ទីរប្រឆាំងគ្រឿងញៀនក្រសួងមហាផ្ទៃបានប្រតិបត្តិការបង្ក្រាបករណីជួញដូរគ្រឿងញៀន ដោយខុសច្បាប់នៅក្នុងរាជធានីភ្នំពេញ ដោយឃាត់ខ្លួនមនុស្ស៣នាក់ និងចាប់យកវត្ថុតាងថ្នាំបានជាង៣គីឡូក្រាម ។
លោកឧត្តមសេនីយ៍ឯក ឡឹក វណ្ណៈ នាយកមន្ទីរប្រឆាំងគ្រឿងញៀនបានបង្ហើបឲ្យដឹងថា កិច្ចប្រតិបត្តិការណ៍នោះមានការណែនាំពីសំណាក់លោកនាយឧត្តសេនីយ៍ផ្កាយ៤ ម៉ក់ ជីតូ អគ្គស្នងការរងនគរបាលជាតិ កាលពីវេលាម៉ោង១១ និង១០នាទីយប់ ថ្ងៃទី១៨ ខែឧសភា ឆ្នាំ២០១៨ នៅចំណុចផ្សារតាប៉ាង សង្កាត់ផ្សារថ្មី១ ខណ្ឌដូនពេញ រាជធានីភ្នំពេញ កម្លាំងជំនាញការិយាល័យទី៦”ក៦” របស់មន្ទីរប្រឆាំងគ្រឿងញៀន ដែលដឹកនាំដោយលោកឧត្តមសេនីយ៍ ហម គន្ធី នាយករងមន្ទីរប្រឆាំងគ្រឿងញៀនបានបើកកិច្ចប្រតិបត្តិការដែលវិធានការ បង្ក្រាបករណីជួញដូរគ្រឿងញៀនខុសច្បាប់មួយ ជាលទ្ធផលទទួលបានផងដែរ ។
ករណីទី១-នៅវេលាម៉ោង១១ និង១០នាទីយប់ ថ្ងៃទី១៨ ខែឧសភានេះ បានឃាត់ខ្លួនជនសង្ស័យម្នាក់ឈ្មោះ តេង ស៊ីថេន ភេទប្រុស អាយុ៣៨ឆ្នាំ និងចាប់យកវត្ថុតាងនូវសារធាតុញៀន ប្រភេទម៉េតំហ្វេតាមីនice ទម្ងន់៩៩,៨០ ក្រាម ។ ករណីទី២ – កាលពីវេលាម៉ោង២ និង៣០នាទី រសៀលថ្ងៃទី១៩ ខែឧសភានេះ បង្ក្រាបនៅចំណុចផ្ទះជួលជាន់ទី២ សង្កាត់វាលវង់ ខណ្ឌ៧មករា រាជធានីភ្នំពេញ បន្តឃាត់ខ្លួនជនសង្ស័យបានម្នាក់ទៀតឈ្មោះ រ៉ុង ឌីណា ភេទស្រី អាយុ២៩ ឆ្នាំ ។
ដោយចាប់យកវត្ថុតាងមានសារធាតុអិចស្តាស៊ី MDMA ទម្ងន់៧៨០,៩ ក្រាម ជាសារធាតុម៉េតំហ្វេតាមីន ICE ទម្ងន់២៣៣៤,៩៨ ក្រាម ។ សារធាតុកេតាមីន ហៅ K ទម្ងន់ ៣៩៣,៧២ ក្រាម ។ បង្ក្រាបករណីទី៣ – កាលពីវេលាម៉ោង ៣និង៣០នាទីរសៀលថ្ងៃទី១៩ ខែឧសភានេះ បង្ក្រាបនៅចំណុចច្រកឌឿងហែម ផ្ទះ១៥៨C ភូមិបឹងសាឡាង សង្កាត់ឫស្សីកែវ ខណ្ឌឫស្សី កែវ រាជធានីភ្នំពេញបានបន្តធ្វើការឃាត់ខ្លួន ជនសង្ស័យម្នាក់ទៀតឈ្មោះ សុខ រីខាន ភេទប្រុស អាយុ២៤ឆ្នាំ ចាប់យកវត្ថុតាងសារធាតុម៉េតំហ្វេតាមីន ICE ទម្ងន់១៣,៣៦ក្រាម ។
លោក ឡឹក វណ្ណៈ បន្តថា ការឃាត់ជនសង្ស័យ៣នាក់ខាងលើនេះមានស្រី្តម្នាក់ និងបុរស២នាក់ ហើយចាប់យកវត្ថុតាងមានមេតំហ្វេតាមីនICE ទម្ងន់២៤៤៨,១៤ ក្រាម, អិចស្តាស៊ី ទម្ងន់ ៧៨០,៩ ក្រាម, កេតាមីន (ហៅK) ទម្ងន់ (៣៩៣,៧២) ក្រាម ។
សរុបជារួមគ្រឿងញៀនទាំង៣ប្រភេទមានទម្ងន់ជាង៣គីឡូក្រាម (៣៦២២,៧៦) ។ មកដល់ពេលនេះសមត្ថកិច្ចបាន និងកំពុងរៀងចំកសាងសំណុំរឿងបញ្ជូនទៅសាលាដំបូងរាជធានីភ្នំពេញតាមនីតិវិធី ៕
ចែករំលែកព័តមាននេះ