ខេត្តបន្ទាយមានជ័យ ៖ បុរសជាឪពុកគមខ្នង និងកូនស្រីដែលចាកចេញពីលំនៅដ្ឋានទៅបោះតង់រកការងារធ្វើនៅបន្ទាត់ព្រំដែនកម្ពុជា-ថៃ ស្ថិតក្នុងភូមិបន្ទាយមានរឹទ្ធ ឃុំគោករមៀត ស្រុកថ្មពួក ព្រោះតែជីវភាពក្រីក្រ នៅព្រឹកថ្ងៃទី20 ខែឧសភា ឆ្នាំ2018នេះ បានទទួលអំណោយពីសប្បុរសធម៌តាមរយៈកោះសន្តិភាព។
ហើយថវិកាដែលជូនដល់គ្រួសារក្រីក្រខាងលើចំនួន10ម៉ឺនរៀល ជារបស់លោក សេង គី ផ្ទះលក់ទាខ្វៃ ជ្រូកខ្វៃ មានទីលំនៅផ្ទះលេខ៤០ ផ្លូវជាតិលេខ១ សង្កាត់ច្បារអំពៅ រាជធានីភ្នំពេញ។
គួរបញ្ជាក់ថា បន្ទាប់ពីកាសែត និងគេហទំព័រកោះសន្តិភាពបានចេញផ្សាយពីបុរសគមខ្នង និងកូនស្រី ដោយរៀបរាប់ទាំងអួលដើម.កនាពេលកន្លងមកថា ជីវភាពគ្រួសារពួកគាត់ក្រីក្រ ។ ដោយមានការអាណិតអាសូរលោក សេង គី ក៏បានចំណាយប្រាក់ផ្ទាល់ខ្លួនតាមរយៈកោះសន្តិភាពយកទៅជូនដល់ទីតាំងស្នាក់នៅបណ្តោះអាសន្នក្បែរព្រំដែនតែម្តង ដើម្បីជាការជួយរំលែកទុក្ខ។ ក្រៅពីថវិកាខាងលើនេះ ភ្នាក់ងារកោះសន្តិភាពដែលយកអំណោយទៅជូនក៏បានជួយដល់គ្រួសារក្រីក្រមួយនេះបន្ថែម5ម៉ឺនរៀលទៀត ខណៈកាលជួបសម្ភាសន៍លើកដំបូងភ្នាក់ងារយើងក៏ជួយថវិកា3ម៉ឺនរៀលរួចម្តងទៅហើយដែរ។
គួរបញ្ជាក់ទៀតថា បុរសគមខាងលើឈ្មោះ អ៊ឺ ត្រេក អាយុ48ឆ្នាំ មានប្រពន្ធឈ្មោះ ផូ ផន អាយុ43ឆ្នាំ និងមានកូន3នាក់ ក្នុងនោះស្រីម្នាក់ ប្រុស2នាក់។ កូនស្រីច្បងឈ្មោះ អ៊ឺ ត្រប់ អាយុ22ឆ្នាំ បានបោះបង់ការសិក្សារយៈពេល6ទៅ7ឆ្នាំហើយ និងរៀនបានត្រឹមថ្នាក់ទី6ប៉ុណ្ណោះ ព្រោះតែវិបត្តិគ្រួសារក្រីក្រ ហើយម្តាយគេជាមេគ្រួសារផង ដើរតួជាមនុស្សប្រុសផង រត់ម៉ូតូឌុបដើម្បីយកប្រាក់ឲ្យប្អូនៗ2នាក់បានរៀនសូត្រ ក្រែងមានអនាគតនឹងគេ៕
ចែករំលែកព័តមាននេះ