ខេត្តកំពង់ឆ្នាំង ៖ នៅលើផ្លូវបេតុងយ៉ាងស្អាតខាងត្បូងផ្សារកំពង់ត្រឡាច គេឃើញគំនរសំរាមគរដូចភ្នំចំនួន២កន្លែង ដែលត្រូវបានប្រជាពលរដ្ឋរិះគន់ថា អ្នកប្រមូលសំរាមមិនបានយកចិត្តទុកដាក់ប្រមូល បង្កឱ្យមានក្លិនស្អុយនិងកើតដង្កូវវារពេញថ្នល់បេតុងក្បែរគំនរសំរាមទាំង២កន្លែងខាងលើ ធ្វើឱ្យប៉ះពាល់ដល់អ្នកលក់ដូរ អ្នកធ្វើដំណើរតាមផ្លូវនោះ និងប៉ះពាល់ដល់ភ្ញៀវទេសចរជាតិ-អន្តរជាតិផងដែរ ។
បើតាមក្រុមអាជីវករនិងអ្នកលក់ដូរនៅក្បែរនោះនិយាយថា យូរៗម្តងទើបឃើញក្រុមកម្មកររបស់អ្នកម៉ៅភាស៊ីផ្សារមកប្រមូលសំរាមយកចេញម្ដង ។ គំនរសំរាមនេះ បានបង្កឱ្យមានក្លិនស្អុយ ឆ្អាប គួបផ្សំនឹងខែនេះជារដូវធ្លាក់ភ្លៀងសម្បូររុយផងនោះ ធ្វើឱ្យកើតមានដង្កូវវារពេញតែលើថ្នល់ ។ ពួកគាត់សំណូមពរដល់លោកអភិបាលស្រុក សូមឱ្យក្រុមហ៊ុនប្រមូលសំរាមឱ្យទាន់ពេលវេលា ព្រោះកន្លងមកទាល់តែបីបួនថ្ងៃទើបឃើញក្រុមហ៊ុនប្រមូលសំរាមចេញម្ដង ធ្វើឱ្យប៉ះពាល់ដល់សុខភាពយ៉ាងខ្លាំង ពិសេសក៏បង្កការស្ទះចរាចរណ៍ផងដែរ ។
ពាក់ព័ន្ធនឹងបញ្ហានេះ លោក ស៊ន សំអាត អភិបាលរងស្រុកកំពង់ត្រឡាច បានថ្លែងតាមទូរស័ព្ទឱ្យដឹងថា បញ្ហារឿងសំរាមវាជារឿងដដែលៗ ព្រោះធ្លាប់ធ្វើកិច្ចសន្យាជាច្រើនដងមកហើយ រវាងក្រុមហ៊ុនប្រមូលសំរាមជាមួយអាជ្ញាធរស្រុក ប៉ុន្តែក្រុមហ៊ុនប្រមូលសំរាមនៅតែមិនគោរពតាមគោលការណា៍របស់អាជ្ញាធរឡើយ ។ តាមដែលលោកទទួលបានព័ត៌មានពីអាជីវករថា ៣ទៅ៤ថៃទើបក្រុមហ៊ុនប្រមូលសំរាមចេញម្ដង ហេតុដូច្នេះហើយបង្កឱ្យសំរាមគរកាន់តែច្រើន បង្កក្លិនស្អុយនិងមានដង្កូវមែន ។
តាមគោលការណ៍របស់លោកអភិបាលខេត្តបានបញ្ជាជាថ្មី និងដាក់កំហិតថា ត្រូវឱ្យក្រុមហ៊ុនប្រមូលសំរាមប្រមូលដឹកចេញរាល់ថ្ងៃ ហើយត្រូវគោរពឱ្យបាន ហើយបើមិនដូច្នោះទេនឹងរកក្រុមហុ៊នថ្មីមកជំនួស ។ ទោះជាយ៉ាងនេះក្តី យើងរង់ចាំមើលថា តើក្រុមហ៊ុនប្រមូលសំរាមនោះ គោរពតាមគោលការណ៍ថ្មីរបស់លោកអភិបាលខេត្តដែរឬទេ ?
ចែករំលែកព័តមាននេះ