រាជធានីភ្នំពេញ ៖ ជនសង្ស័យជាចោរឆក់កាបូប១ក្រុមមាន១០នាក់ កាលពីព្រឹកថ្ងៃទី១៩ ឧសភា ត្រូវបានសមត្តកិច្ចនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ បានធ្វើការបង្ហាញមុខ ក្រោយពីសហការបង្ក្រាបជាបន្តបន្ទាប់ ។ ជនសង្ស័យភាគច្រើនជាសិស្សបោះបង់ចោលសាលា រស់នៅប្រមូលផ្តុំគ្នាមិនចូលផ្ទះ ។ ទាក់ទិននឹងការបង្ហាញមុខជនសង្ស័យជាក្រុមឆក់ទាំង១០នាក់នេះ លោកវរសេនីយ៍ឯក ប៊ុន សត្យា នាយការិយាល័យនគរបាលព្រហ្មទណ្ឌកម្រិតស្រាលរាជធានីភ្នំពេញបានឱ្យដឹងថា ជនសង្ស័យ១ក្រុមនេះ ត្រូវបានកម្លាំងជំនាញធ្វើការឃាត់ខ្លួនជាបន្តបន្ទាប់ ចាប់ពីថ្ងៃទី១៦ ឧសភា ២០១៨ មកពាក់ពន្ធទៅអំពើឆក់កាបូបជនបរតេសចំនួន២លើក ។ លើកទី១-ពួកគេបានឆក់កាបូបដៃពណ៌ផ្កាឈូកពីជនជាតិចិន កាលពីវេលាម៉ោង០៦ និង៣០នាទីល្ងាចថ្ងៃទី១៤ ឧសភា ស្ថិតនៅចំណុចចំហៀងស្ថានទូតអូស្ត្រាលី លើផ្លូវស្ពានហង្ស សង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
ដោយឡែក ជនរងគ្រោះឈ្មោះ Deng Fengying ភេទស្រី អាយុ៤៥ឆ្នាំ ជនជាតិចិន ស្នាក់នៅផ្ទះលេខ៥៣អឺ០ ផ្លូវលេខ៦៣ សង្កាត់បឹងរាំង ខណ្ឌដូនពេញ ដោយមានការបាត់បង់សម្ភារៈ ១.លិខិតឆ្លងដែនជនជាតិចិន១ក្បាល ២.អត្តសញ្ញាណប័ណ១ ៣.កាតធនាគារ១ ៤.ប្រាក់ចិន ១១០ យ៉េន ៥.ប្រាក់ដុល្លារ ២ ០០០ ដល្លារអាមរិក ។ ករណីឆក់លើកទី២.កាលពីវេលាម៉ោង៧ និង ៣០នាទីយប់ថ្ងៃទី១៦ ឧសភា ២០១៨ ពួកគេបានធ្វើសកម្មភាពឆក់កាបូបស្ពាយពីជនជាតិចិន នៅចំណុចផ្លូវលេខ២១៤ កែងផ្លូវលេខ១៤១ សង្កាត់វាលវង់ ខណ្ឌ៧មករា ដែលជនរងគ្រោះឈ្មោះ YI YAQING ភេទស្រី អាយុ៣៧ឆ្នាំ មុខរបរជាបុគ្គលិកក្រុមហ៊ុនដឹកជញ្ជូន ស្នាក់នៅផ្ទះលេខ៥២ ផ្លូវ២៨២ សង្កាត់បឹងរាំង ខណ្ឌដូនពេញ ដោយបាត់បង់សម្ភារៈមាន ១.សៀវភៅការងារ១ក្បាល ២.លិខិតឆ្លងដែនផ្ទាល់ខ្លួន០១ ៣.ប្រាក់ដុល្លារចំនួន ២ ០០០ ដុល្លារអាមេរិក ប្រាក់ចិន ៣០០ យ៉េន និង កាតធនាគារចំនួន៧ក្បាល ។
ក្រោយពេលឃាត់ខ្លួនជនសង្ស័យសមត្តកិច្ចបានធ្វើការដកហូតមកវិញមាន៖ ១.ម៉ូតូឌ្រីមសង់១២៥ ពណ៍ខ្មៅ សេរី២០១៨ គ្មានស្លាកលេខ១គ្រឿង ២.ម៉ូតូឌ្រីមសង់១២៥ ពណ៍ខ្មៅ សេរី២០១៨ ពាក់ស្លាកលេខ ភ្នំពេញ ១.GX ៦១៣១ មួយគ្រឿង ៣.ម៉ូតូម៉ាកហុងដាប៊ីត ពណ៍សលាយក្រហម សេរី២០១៧ ពាក់ស្លាកលេខភ្នំពេញ១.GS ០៧៦៥ មួយគ្រឿង ៤.ម៉ូតូម៉ាកឌ្រីមសង់១២៥ ពណ៍ខ្មៅ សេរី២០១៨ ពាក់ស្លាកលេខ ភ្នំពេញ ១HA ៨៦២៣ មួយគ្រឿង ៥.ម៉ូតូម៉ាក SUZUKI NEX ពណ៍សលាយក្រហម សេរី២០១៨ ពាក់ស្លាកលេខភ្នំពេញ ១GZ ៨៩៦០ មួយគ្រឿង ។ ក្នុងចាប់យកវត្ថុតាងរបស់ជនរងគ្រោះទាំងពីរនាក់ ស្ទើរគ្រប់ចំនួនវិញផងដែរ បាត់បង់តែប្រាក់ទេ មិនមានសេសសល់ ។
ចែករំលែកព័តមាននេះ