ខេត្តស្វាយរៀង ៖ ប្រជាពលរដ្ឋប្រមាណជាង១០០គ្រួសារដែលរស់នៅភូមិបាវិតកណ្តាល សង្កាត់បាវិត ក្រុងបាវិត កំពុងអំពាវនាវសុំបទអន្តរាគមន៍ពីសម្តេចតេជោ ហ៊ុន សែន ឱ្យជួយដោះស្រាយនូវទុក្ខលំបាករបស់ពួកគាត់ដែលកំពុងកើតក្តីក្តៅក្រហាយចំពោះក្រុមហ៊ុនម៉ៅការផ្សារអន្តរជាតិបាវិត និងអាជ្ញាធរ ព្រមទាំងមន្ត្រីជំនាញដែលអនុញ្ញាតិឱ្យសាងសង់ផ្ទះល្វែងចូលចំណីផ្លូវរបស់រដ្ឋធ្វើឱ្យមានការពិបាកក្នុងការធ្វើដំណើរ ព្រោះតែការសាងសង់បានបន្សល់ទុកគ្រឿងសំណង់រាយប៉ាយពេញផ្លូវ ។ ការជួបជុំគ្នាដើម្បីសុំបទអន្តរាគមន៍នេះបានធ្វើឡើងនៅព្រឹកថ្ងៃទី១៨ ខែឧសភា ឆ្នាំ២០១៨ នៅចំណុចទីតាំងផ្សារអន្តរជាតិបាវិត ។
ប្រជាពលរដ្ឋរស់នៅភូមិបាវិតកណ្តាលបានរៀបរាប់ឱ្យដឹងថា ពួកគាត់ទាំងអស់គ្នាប្រមាណជាង១០០គ្រួសារនេះបាននាំគ្នាផ្តិតមេដៃដើម្បីប្តឹងក្រុមហ៊ុនម៉ៅការផ្សារអន្តរជាតិបាវិតដែលបានរំលោភយកដីចំណីផ្លូវរបស់រដ្ឋមកសាងសង់ផ្ទះល្វែងយ៉ាងរំភើយដែលការសាងសង់នេះបានចាប់ផ្តើមតាំងតែពី ខែមេសា ឆ្នាំ២០១៨ មកម្ល៉េះ ។
ពាក់ព័ន្ធនឹងករណីខាងលើ លោក គង់ ចំរើន ដែលអ្នកមើលការខុសត្រូវផ្សារអន្តរជាតិបាវិតបានឱ្យដឹងតាមទូរស័ព្ទថា ចំពោះបញ្ហាដែលប្រជាពលរដ្ឋចោទខាងផ្សារបស់លោកធ្វើចូលចំណីផ្លូវរបស់រដ្ឋ ឥឡូវលោកកំពុងធ្វើការជាមួយសុរិយោដីហើយ ព្រោះការធ្វើនេះមានប្លង់ត្រឹមត្រូវតែដោយសារមួយរយៈនេះសម្តេចអញ្ជើញមកបាវិតធ្វើឱ្យមន្ត្រីរាជការរវល់យ៉ាងខ្លាំងតែទោះបីយ៉ាងណាពួកគាត់កំពុងតែធ្វើការងារនេះជាមួយសុរិយោដីហើយ ។ លោកបានបញ្ជាក់ថា ការសាងសង់ផ្ទះល្វែងនេះវាមានការហ៊ាចេញសំយ៉ាបមួយម៉ែត្រទៅលើផ្លូវសាធារណៈមែនតែសុរិយោដីគេរវល់ទើបមិនទាន់ដោះស្រាយ ។
ចំណែកលោក សាញ់ សុខុន ចៅសង្កាត់បាវិតបានឱ្យដឹងថា ចំពោះបញ្ហាសាងសង់រំលោភផ្លូវសាធារណៈពីក្រុមហ៊ុនផ្សារអន្តរជាតិបាវិតនេះគឺខាងអាជ្ញាធរធ្លាប់បានចុះទៅណែនាំ និងហៅក្រុមជាងសំណង់ទៅសាលាក្រុងដើម្បីសាកសួរដែរ តែលទ្ធផលយ៉ាងណានោះមិនទាន់ដឹងទេ គឺខាងក្រុង និងមន្ត្រីជំនាញរបស់គេទើបដឹងរឿងនេះ ។ ចំណែក សេង សីលា អភិបាលក្រុងបាវិតមិនអាចទំនាក់ទំនងបានទេនៅរសៀលថ្ងៃទី១៨ ខែឧសភា ឆ្នាំ២១០៨ ៕
ចែករំលែកព័តមាននេះ