ខេត្តព្រៃវែង ៖ ក្មេងស្រីពីរនាក់បងប្អូនបានស្លាប់បាត់បង់ជីវិតដោយការលង់ទឹក ខណៈពេលពួកគេតាមម្តាយទៅរាយមងនៅអូរតាស៊ាង ដែលនៅចម្ងាយពីភូមិប្រមាណ១៦០០ម៉ែត្រធ្វើឱ្យម្តាយ និងញាតិមិត្ត
បងប្អូនសោកស្តាយយ៉ាងក្រៃលែង ។ ហេតុការណ៍គួរឱ្យរន្ធត់នេះ បានកើតឡើងនៅថ្ងៃទី១៤ ឧសភា វេលាម៉ោង១២ និង១០នាទីត្រង់ចំណុចអូរតាស៊ាង ស្ថិតនៅភូមិពន្លៃ ឃុំបាបោង ស្រុកពាមរក៍ ។
សមត្ថកិច្ចបានឱ្យដឹងថា កុមារីរងគ្រោះឈ្មោះផន រតនា ភេទស្រី អាយុ១០ឆ្នាំ ជាសិស្ស និងម្នាក់ទៀតឈ្មោះ ផន ថាវី ភេទស្រី អាយុ៨ឆ្នាំ ជាសិស្ស ។ អ្នកទាំងពីរមានឪពុកឈ្មោះ ផេង ភា (ស្លាប់) និងម្តាយឈ្មោះ ម៉ែន យ៉ន អាយុ៤៦ឆ្នាំ មានទីលំនៅភូមិពន្លៃ ឃុំបាបោង ស្រុកពាមរក៍ ។
ប្រភពបានបន្តថា នៅមុនពេលកើតហេតុ ក្មេងស្រីទាំងពីរនាក់បានតាមម្តាយទៅរាយមងនៅចំណុចអូរតាស៊ាង ដែលមានចម្ងាយប្រហែល១៦០០ម៉ែត្រពីភូមិ ។ នៅពេលទៅដល់អូរតាស៊ាង ម្តាយរបស់ក្មេងស្រីបានចុះទៅរាយមងដូចធម្មតា រីឯក្មេងស្រីទាំងពីរបាននាំគ្នាចុះទៅលេងទឹកនិងប្រឡែងគ្នា ក៏បានបណ្តាល
ឱ្យក្មេងស្រីទាំងពីរធ្លាក់ចូលទៅកន្លែងអន្លង់ជ្រៅលង់ទឹកតែម្តង ប្រភពបានបន្តថា នៅពេលបាត់កូនៗមិនឃើញ ស្ត្រីជាម្តាយក៏បានរត់ទៅហៅក្រុមគ្រួសារ ព្រមទាំងអ្នកភូមិនាំគ្នាជួយចុះរាវរកឃើញក្មេងស្រីពីរនាក់នៅក្រោមទឹក ហើយដឹកសពតាមគោយន្តមកផ្ទះ រហូតដល់ម៉ោង១៤ និង២០នាទី ទើបរាយការណ៍ទៅសមត្ថកិច្ចមកពិនិត្យ ៕
ចែករំលែកព័តមាននេះ