ខេត្តកែប ៖ មនុស្សប្រុស-ស្រី៤នាក់បានរងរបួសធ្ងន់ និងស្រាលដោយសារគ្រោះថ្នាក់ចរាចរណ៍២ករណីក្នុងថ្ងៃតែមួយនៅក្នុងខេត្តកែប ។ ដោយករណីទី១-មានគ្រោះថ្នាក់ចរាចរណ៍រវាងរថយន្តនិងម៉ូតូបានបុកគ្នាក្នុងទិសដៅស្របគ្នាលើផ្លូវជាតិ៣៣A បានបណ្តាលឱ្យអ្នកបើកបរម៉ូតូរងរបួសធ្ងន់ ហេតុការណ៍នេះបានកើតឡើងកាលពីវេលាម៉ោង៤និង២៥នាទីល្ងាចថ្ងៃទី១៧ ខែឧសភា នៅចំណុចខាងត្បូងវិហាឥស្លាមស្បូវ ស្ថិតនៅភូមិថ្មី ។
អ្នកបើកបររថយន្តឈ្មោះ ហុង ពៅ ភេទប្រុស អាយុ៥១ឆ្នាំ មុខរបរមន្រី្តរាជការ ស្នាក់នៅបច្ចប្បន្នភូមិអ័រគីដេ សង្កាត់អូរបែកក្អម ខណ្ឌ័សែនសុខ រាជធានីភ្នំពេញ បើករថយន្តម៉ាកឡង់គ្រីស្ស័រ ស៊េរីឆ្នាំ២០០៤ ពណ៌ទឹកប្រាក់ ពាក់ស្លាកលេខ ភ្នំពេញ ២AR-៧៥៧៦ ។ ចំណែកអ្នកបើកបរម៉ូតូឈ្មោះ ហេង សុភ័ណ្ឌ ភេទប្រុស អាយុ ២១ឆ្នាំ មុខរបរកសិករ រស់នៅភូមិដំណាក់ចង្អើ សង្កាត់ព្រៃធំ ក្រុងកែប ខេត្តកែប ជិះម៉ូតូម៉ាកហុងដា C១២៥ ស៊េរីឆ្នាំ២០១០ ពណ៌ខ្មៅ ពាក់ស្លាកលេខ កែប ១A-៣២៩៤ បានរងរបួសធ្ងន់ ។
ក្រោយពេលកើតហេតុ ជនរងគ្រោះត្រូវបានរថយន្តសង្គ្រោះមន្ទីរពេទ្យបង្អែកដឹកទៅព្យាបាលនៅមន្ទីរពេទ្យខេត្តកែប ។ ចំណែករថយន្ត និងម៉ូតូត្រូវបានសមត្ថកិច្ចយកមករក្សាទុកនៅអធិការដ្ឋាននគរបាលខេត្តកែប ដើម្បីរង់ចាំការដោះស្រាយ។
ចំណែកករណីទី២-គ្រោះថ្នាក់ចរាចរណ៍រវាងម៉ូតូនឹងម៉ូតូបានបុកគ្នាក្នុងទិសដៅបញ្ច្រាសគ្នាលើផ្លូវជាតិលេខ៣៣A បណ្តាលឱ្យរងរបួសស្រាល៣នាក់ ហេតុការណ៍នេះបានកើតឡើងកាលពីវេលាម៉ោង៤និង៥នាទីល្ងាចថ្ងៃទី១៧ ខែឧសភា នៅចំណុចទល់មុខប្រេងឥន្ទៈតេឡា កែវក្រសាំង ស្ថិតក្នុងភូមិកែវក្រសាំង សង្កាត់កែប ក្រុងកែប ខេត្តកែប ។ ម៉ូតូទាំងពីរគ្រឿងខាងលើរួមមាន ម៉ូតូមួយគ្រឿងជិះគ្នាពីរនាក់ម៉ាកហ្សូមើអិច ពណ៌ក្រហម គ្មានស្លាកលេខ បើកបរដោយឈ្មោះ ប៉ុម ស្រីរដ្ឋ ភេទស្រី អាយុ១៩ឆ្នាំ មុខរបរកសិករ បច្ចុ
ប្បន្នរស់នៅភូមិរនេស ឃុំពងទឹក ស្រុកដំណាក់ចង្អើរ ខេត្តកែប បានរងរបួសស្រាល រីឯអ្នករួមដំណើរឈ្មោះប្រាក់ ហ៊ុយស្រីនាង ភេទស្រី អាយុ១៦ ឆ្នាំ មុខរបរសិស្ស រស់នៅភូមិ-ឃុំជាមួយគ្នា បានរងរបួសស្រាល។ រីឯម៉ូតូមួយគ្រឿងជិះតែម្នាក់ឯងម៉ាកហុងដា សេ១២៥ ពណ៌ខ្មៅ ស៊េរីឆ្នាំ២០១៤ ពាក់ស្លាកលេខ កែប ១A-៣៥៧៧ បើកបរដោយឈ្មោះ ឡាយ សែ ភេទស្រី អាយុ៦៥ឆ្នាំ មុខរបរកសិករ រស់នៅភូមិកែវក្រសាំង សង្កាត់កែប ក្រុងកែប ខេត្តកែប បានរងរបួសស្រាល ។
ក្រោយពេលកើតហេតុ ជនរងគ្រោះត្រូវបានក្រុមគ្រួសារដឹកបញ្ជូនទៅមន្ទីពេទ្យបង្អែកខេត្តកែប ចំណែកម៉ូតូទាំងពីរគ្រឿងត្រូវបានសមត្ថកិច្ចយកមករក្សាទុកនៅអធិការដ្ឋាននគរបាលក្រុងកែបដើម្បីរង់ចាំការដោះស្រាយ៕
ចែករំលែកព័តមាននេះ