ខេត្តស្ទឹងត្រែង ៖ បុរសជនជាតិខ្មែរអ៊ិស្លាមម្នាក់បានស្លាប់ភ្លាមៗ បន្ទាប់ពីឪពុកក្មេកចាក់សម្លាប់ដោយកាំបិតចុងស្រូច ហេតុការណ៍បង្កឱ្យមានការភ្ញាក់ផ្អើលកាលពីវេលាម៉ោង៦និង៣០នាទីយប់ថ្ងៃទី១៧ ខែឧសភា ឆ្នាំ២០១៨ ស្ថិតនៅចំណុចអូររំពេ ភូមិវាលពោធិ៍ ឃុំអន្កុងភេ ស្រុកថាឡាបរិវ៉ាត់ ខេត្តស្ទឹងត្រែង។
មន្ត្រីនគរបាលប៉ុស្តិ៍រដ្ឋបាលឃុំអន្លុងភេ ស្រុកថាឡាបរិវ៉ាត់ បានឱ្យដឹងថា ជនរងគ្រោះឈ្មោះ ម៉ាត់ វណ្ណា ភេទប្រុស អាយុ២៤ឆ្នាំ ស្នាក់នៅភូមិវាលពោធិ៍ ឃុំអន្លុងភេ ស្រុកថាឡាបរិវ៉ាតិ ខេត្តស្ទឹងត្រែង បានរងរបួសរហូតដល់ស្លាប់ ក្រោយពេលឪពុកក្មេកចាក់នឹងកាំបិតចុងស្រួចជាច្រើនកាំបិត ។ រីឯជនសង្ស័យឈ្មោះកូប អែល ត្រូវជាឪពុកក្មេក បានរត់គេចខ្លួនក្រោយចាក់សម្លាប់កូនប្រសារស្លាប់នៅក្នុងផ្ទះ ។
យោងតាមប្រភពព័ត៌មានបានឱ្យដឹងថា នៅវេលាកើតហេតុខាងលើ ជនរងគ្រោះបានឈ្លោះប្រកែកជាមួយប្រពន្ធដែលជាខែ្មរអ៊ិស្លាមដូចគ្នា រហូតនាងស្រែកទ្រហោយំ គាប់ជួនឪពុកបង្កើតរបស់នាងត្រឡប់មកពីថ្វាយបង្គំព្រះវិញ បានឮសូរសំឡេងកូនស្រីយំស្រែក ក៏ចូលមើលនិងសួរនាំបង្កជាទំនាស់ពាក្យសម្តីគ្នារហូតឈានដល់ការប្រវាយប្រតប់ជាមួយដន្លងស្រី ដោយឃើញឪពុកក្មេកនិងម្តាយបង្កើតប្រវាយប្រតប់គ្នាដូច្នោះ កូនប្រសារប្រុសក៏បានចូលទៅឃាត់ ស្រាប់តែឪពុកក្មេកយកកាំបិតចុងស្រួចចាក់ទៅលើកូនប្រសាជាច្រើនកាំបិតបណ្តាលអោយស្លាប់នៅនឹងកន្លែងតែម្តង។
លោក សែម សីុថា អធិការស្រុកថាឡាបរិវ៉ាត់អោយដឹងថាជនរងគ្រោះមានស្នាមរបួសជាច្រើនកន្លែងលើដងខ្លួនបន្ទាប់ពីឪពុកក្មេកចាក់នឹងកាំបិតចុងស្រួច ដោយសារកាន់ជើងកូនស្រីខណៈឈ្លោះប្រកែកជាមួយកូនប្រសា។ បច្ចុប្បន្ន សមត្ថកិច្ចកំពុងតាមចាប់ខ្លួនជនសង្ស័យ រីឯសពជនរងគ្រោះត្រូវបានក្រុមគ្រួសារចាត់ចែងធ្វើបុណ្យតាមប្រពៃណីសាសនាអ៊ិស្លាម៕
ចែករំលែកព័តមាននេះ