ខេត្តកំពង់ឆ្នាំ ៖ ឯកឧត្តមនាយឧត្តមសេនីយ៍គន់ គីម អគ្គមេបញ្ជាការរង នាយសេនាធិការចម្រុះនៃកងយោធពលខេមរភូមិន្ទ និងជាអគ្គលេខាធិការសមាគមអតីតយុទ្ធជនកម្ពុជានៅព្រឹកថ្ងៃទី១៨ ខែឧសភា ឆ្នាំ២០១៨ បានអញ្ជើញជាអធិបតីភាពក្នុងពិធីសំណេះសំណាល និងបំពាក់មេដាយដល់អតីតយុទ្ធជនចំនួន១៥១០នាក់ ស្នាក់ការគណៈបក្សប្រជាជនស្រុកទឹកផុស ។
លោកជំទាវ កែ ច័ន្ទមុនី អ្នកតំណាងរាស្ត្រមណ្ឌលកំពង់ឆ្នាំងបានថ្លែងថា ប្រមុខរាជរដ្ឋាភិបាលមិនភ្លេចទេ នូវ មហាគុណបំណាច់របស់បងប្អូនអតីតយុទ្ធជនដែលបានលះបង់ សាច់ស្រស់ ក្នុងការប្រយុទ្ធការពារ និង ទាមទារសុខសន្តិភាពជូនប្រជាពលរដ្ឋ ។ ថ្ងៃនេះរាជរដ្ឋាភិបាលបានផ្ដល់មេដាយការពារជាតិជូនដល់បងប្អូនអតីតយុទ្ធជនជាង១ពាន់នាក់ ហើយនឹងបន្តផ្តល់បន្តទៀត ឱ្យបានដល់អតីតយុទ្ធជនទាំងអស់គ្នា ។
នៅក្នុងឱកាសនោះដែរ ឯកឧត្តមនាយឧត្តមសេនីយ៍គន់ គីម អគ្គមេបញ្ជាការរង នាយសេនាធិការ និងជាអគ្គលេខាធិការសមាគមអតីតយុទ្ធជនកម្ពុជាបានថ្លែងថា មុននេះបន្តិចខ្ញុំបានជួបលោកយាយម្នាក់បាននិយាយថា គាត់មកទីនេះ គឺដើម្បីមកទទួលមេដៃជំនួសកូនប្រុសរបស់គាត់ដែលបានស្លាប់ក្នុងសមរភូមិ ពេលកូនប្រុសគាត់ជាទាហានកងយោធពលខេមរភូមិន្ទ ។ ខ្ញុំស្រណោះណាស់នេះហើយជាទឹកចិត្តម្តាយដែលបានលះបង់ កូនជាទីស្រឡាញ់របស់ខ្លួន ដើម្បីការពារសុខសន្តិភាពជូនពលរដ្ឋ ។
ឯកឧត្តមបានបន្តថា ប្រមុខរាជរដ្ឋាភិបាលមិនភ្លេចទេ នូវវីរភាពរបស់បងប្អូនដែលបានបូជាជីវិត ដើម្បីបុព្វហេតុជាតិមាតុភូមិ ។
ឯកឧត្តមបានផ្ដាំផ្ញើដល់គ្រប់អង្គភាពមេបញ្ជាការមេបញ្ជាការរង ទាំងអស់ត្រូវយកចិត្តទុកដាក់ដល់អតីតយុត្តិជនត្រូវចងក្រងប្រវត្តិរូបរបស់ពួកគាត់ទុក ជាឯកសារទុកសម្រាប់ឲ្យកូនចៅជំនាន់ក្រោយ ជាពិសេសសិក្សានុសិស្សបានយល់អំពីការតស៊ូរបស់ពួកគាត់ ដើម្បីជាតិនឹងត្រូវចុះសុខទុក្ខរបស់គាត់ដល់មូលដ្ឋានជួឲ្យមានជីវភាពសមរម្យជួយ និងកសាងផ្ទះសម្បែងមិនត្រូវបោះបង់ចោលពួកគាត់ឡើយ ៕
ចែករំលែកព័តមាននេះ