រាជធានីភ្នំពេញ ៖ តារាសម្តែងវ័យក្មេងកញ្ញាប៉ុប រចនា ភ័យខ្លាចចំពោះការរិះគន់លើរូបនាង បន្ទាប់ពីរូបភាពអោបថើបស្រើបស្រាលរបស់នាងជាមួយដៃគូបានបែកធ្លាយ តាមហ្វេសប៊ុកនាពេល ថ្មីៗកន្លងមក ។ ដោយសារតែរូបភាពទាំងនោះមើលទៅបែបស្រើបស្រាល…
រាជធានីភ្នំពេញ ៖ តារាសម្តែងវ័យក្មេងកញ្ញាប៉ុប រចនា ភ័យខ្លាចចំពោះការរិះគន់លើរូបនាង បន្ទាប់ពីរូបភាពអោបថើបស្រើបស្រាលរបស់នាងជាមួយដៃគូបានបែកធ្លាយ តាមហ្វេសប៊ុកនាពេល ថ្មីៗកន្លងមក ។
ដោយសារតែរូបភាពទាំងនោះមើលទៅបែបស្រើបស្រាល ហើយវាបានបែកធ្លាយជាសាធារណៈទៅហើយនោះ កញ្ញាប៉ុប រចនា បានស្នើសុំដល់មហាជនយោគយល់កុំរិះគន់រូបនាង ។
រូបភាពស្រើបស្រាលរបស់កញ្ញាប៉ុប រចនា នោះ គឺជាឈុតសម្តែងនៅក្នុងខ្សែភាពយន្តរឿង«រនាតឯក»គ្រោងចាក់បញ្ចាំងនៅស្ថានីយទូរទស្សន៍ប៉ុស្តិ៍លេខ៥នាពេលខាងមុខ ។
តារាសម្តែងកញ្ញាប៉ុប រចនា បានបញ្ជាក់តាមហ្វេសប៊ុកថា«ព្រោះតែខ្ញុំខំសម្ដែងឱ្យអស់ពីសមត្ថភាព ព្រោះមិនចង់ឲ្យមានពាក្យរិះគន់ថារឿងខ្មែរសម្ដែងមកឆ្គង ទើបខ្ញុំខំប្រឹងសម្តែង ខំប្រឹងលះបង់ដើម្បីរឿងភាគខ្មែរយើងឲ្យមានការរីកចម្រើនទៅមុខ ។ ខ្ញុំចង់បានពាក្យសរសើរនិងមិនចង់បានពាក្យរិះគន់ដើម្បីជួយលើកស្ទួយវិស័យសិល្បៈខ្មែរឲ្យទៅមុខ ។ ឱ្យខ្ញុំសូមទោស បើសិនជាខ្ញុំសម្តែងទៅមានការលើសលស់មិនសក្តិសមជាស្ត្រីខ្មែរ ឱ្យខ្ញុំសូមទោស ទាំងនេះជាកាសមែ្តងទេ ចង់ឱ្យបងប្អូនខ្មែរទាំងអស់ជួយគាំទ្ររឿងរបស់ខ្មែរដែលសុទ្ធតែជាស្នាដៃរបស់កូនខ្មែរ និងទឹកចិត្តរបស់កូនខ្មែរយើងទាំងអស់ »។
ដោយឡែកសម្រាប់តារាប្រុសដែលសម្តែងឈុតស្រើបស្រាលជាមួយកញ្ញាប៉ុប រចនា លោករ៉ា វិរ: បាននិយាយថា ឈុតឆាកនោះ គឺប្លង់លោក និងតួស្រីនាងប៉ុប រចនា រំលេចឈុតស្រើបស្រាលជាមួយគ្នា ក្នុងរឿង «រនាតឯក» ដែលលោក និងនាង គឺជាគូស្នេហ៍មួយគូផងដែរ ក្នុងរឿងបន្ទាប់ពីតួអង្គឯកប្រុសស្រី ។
លោករ៉ា វិរៈ និយាយថា «មួយឆាកដែលបានស្ដែងឡើង កុំថាឡើយតែខ្ញុំដែលជាអ្នកសម្ដែងមានអារម្មណ៍ក្ដៅខ្លួន សូម្បីតែអ្នកថត និងក្រុមការងារក៏ពិបាកទប់អារម្មណ៍ផងដែរ ដោយសារតែក្នុងឈុតនោះបានតម្រូវឲ្យខ្ញុំថើបផ្អឹប និងញក់ញីស្ទើរសព្វសាច់របស់តួស្រី ស្របគ្នាដែលរចនា ក៏ស្រស់ស្អាតខ្លាំង ឃើញហើយចង់គ្រឺតនោះផង »។
លោករ៉ា វិរៈ ឲ្យដឹងថារឿង«រនាតឯក»ដែលលោកសម្ដែងជាតួកាច និងមានឈុតស្រើបស្រាលរាប់មិនអស់ជាមួយតារាស្រីប៉ុប រចនា នេះ គឺជារឿងមួយដែលលោកយល់ថានឹងធ្វើឲ្យលោកកាន់តែលេចធ្លោ ជាពិសេសក្នុងពេលដែលឈុតឆាកក្នុងរឿងនេះទើបតែបានទម្លាយចេញ ក៏មានការចាប់អារម្មណ៍ទៅហើយ ។
ដោយសាររូបសម្រស់ស្រស់ស្អាតរួមជាមួយនឹងសមត្ថភាពផងនោះបានធ្វើឱ្យស្រីស្អាត ប៉ុប រចនា កាន់តែមានទីផ្សារការងាររីកទូលាយជាងមុន ។ ប៉ុប រចនា ត្រូវមហាជនមួយចំនួនប្រដូចនាងថាមានទម្រង់មុខស្រដៀងទៅនឹងតារាសម្តែងថៃ Kimberly ។ ប៉ុប រចនា ចូលប្រឡូកក្នុងពិភពសិល្បៈជិតបីឆ្នាំហើយ ។ ឆ្លងកាត់ពេលវេលាប៉ុន្មានឆ្នាំនេះ ប្រជាប្រិយភាពរបស់នាងរចនា កាន់តែលូតឡើងជាលំដាប់ ៕
ចែករំលែកព័តមាននេះ