ខេត្តកណ្តាល ៖ នគរបាលស្រុកស្អាងដឹកនាំដោយលោកវរសេនីយ៍ សេង សុជាតិ អធិការនគរបាលស្រុកស្អាង សហការជាមួយប៉ុស្តិ៍រដ្ឋបាលក្រាំងយ៉ូវ ដោយមានការបញ្ជាដ៏ម៉ឺងម៉ាត់ពីសំណាក់ឧត្ថមសេនីយ៍ទោ អ៊ាវ ចំរើន…
ខេត្តកណ្តាល ៖ នគរបាលស្រុកស្អាងដឹកនាំដោយលោកវរសេនីយ៍ សេង សុជាតិ អធិការនគរបាលស្រុកស្អាង សហការជាមួយប៉ុស្តិ៍រដ្ឋបាលក្រាំងយ៉ូវ ដោយមានការបញ្ជាដ៏ម៉ឺងម៉ាត់ពីសំណាក់ឧត្ថមសេនីយ៍ទោ អ៊ាវ ចំរើន ស្នងការនគរបាលខេត្តកណ្តាល បានធ្វើការឃាត់ខ្លួនជនសង្ស័យជាបន្តរបន្ទាប់ រួមនឹងថ្នាំញៀន៧៥កញ្ចប់ មានមួយកញ្ចប់ធំ និងកញ្ចប់តូច៧៤កញ្ចប់ រួមទាំងវត្ថុតាងមួយចំនួនទៀត។ ហេតុការណ៍នេះបានកើតឡើងនៅថ្ងៃ ព្រហស្បតិ៍ ០៣កើត ខែជេស្ឋ ឆ្នាំច សំរិទ្ធស័ក ព.ស ២៥៦២ ត្រូវនឹងថ្ងៃទី១៧ ខែឧសភា ឆ្នាំ២០១៨ វេលាម៉ោង៣ និង១៥នាទីរសៀល នៅចំណុចភូមិកណ្តាល ឃុំក្រាំងយ៉ូវ ស្រុកស្អាង ខេត្តកណ្តាល។ ជនសង្ស័យ ទី០១,ឈ្មោះ ហួត ហ៊ីម ភេទប្រុស អាយុ១៧ឆ្នាំ ជនជាតិខ្មែរ មុខរបររត់តុការ ទីលំនៅភូមិ អម្ពិល ឃុំក្រាំងយ៉ូវ ស្រុកស្អាង ខេត្តកណ្តាល។ (ធ្លាប់ជាប់ពន្ធនាគារខេត្តកណ្តាល រយៈពេល០១ឆ្នាំ ពីបទ ជួញដូរគ្រឿងញៀន) ទី០២,ឈ្មោះ មន គង្គា ហៅតុល ភេទប្រុស អាយុ២៤ឆ្នាំ ជនជាតិខ្មែរ មុខរបរ កសិករ ទីលំនៅភូមិកណ្តាល ឃុំក្រាំងយ៉ូវ ស្រុកស្អាង ខេត្តកណ្តាល។ (ធ្លាប់ជាប់ពន្ធនាគារខេត្តកណ្តាល រយៈពេល០១ខែកន្លះ ពីបទជួញដូរគ្រឿងញៀន)។
ទី០៣,ឈ្មោះ ស្រ៊ន ទិ ភេទប្រុស អាយុ១៧ឆ្នាំ ជនជាតិ ខ្មែរ មុខរបរកម្មករ ទីលំនៅភូមិតាពេជ ឃុំក្រាំងយ៉ូវ ស្រុកស្អាង ខេត្តកណ្តាល និងទី០៤,ឈ្មោះ សំ គុន ភេទស្រី អាយុ៤៤ឆ្នាំ ជនជាតិខ្មែរ មុខរបរកសិករ ទីលំនៅភូមិគោកអណ្តែក ឃុំស្អាងភ្នំ ស្រុកស្អាង ខេត្តកណ្តាល (គេចខ្លួន)។ លោកអធិការបញ្ជាក់ថា មុនពេលកើតហេតុដោយទទួលបានព័ត៌មាន ពីប្រជាពលរដ្ឋល្អថា មានឈ្មោះ ហួត ហ៊ីម កំពុងប្រើប្រាស់គ្រឿងញៀន(ម៉ាទឹកកក) នៅភូមិអម្ពិល ឃុំក្រាំងយ៉ូវ ស្រុកស្អាង ខេត្តកណ្តាល។ ភ្លាមនោះកម្លាំងផ្នែកប្រឆាំងបទល្មើសគ្រឿងញៀន សហការជាមួយកម្លាំងប៉ុស្តិ៍នគរបាលរដ្ឋបាលក្រាំងយ៉ូវ បាននាំខ្លួនជនសង្ស័យឈ្មោះ ហួត ហ៊ីម មកប៉ុស្តិ៍នគរបាលរដ្ឋបាលក្រាំងយ៉ូវ ដើម្បីសាកសួរ។ នៅចំពោះមុខសមត្ថកិច្ចនគរបាលឈ្មោះ ហួត ហ៊ីម បានសារភាពថា ខ្លួនបានទិញគ្រឿងញៀន(ម៉ាទឹកកក) ពីឈ្មោះ តុល នៅភូមិកណ្តាល ឃុំក្រាំងយ៉ូវ ស្រុកស្អាង ជាច្រើនដង និងទិញពីក្មេងប្រុសម្នាក់មិនស្គាល់ឈ្មោះ នៅភូមិគោកអណ្តែត ឃុំស្អាងភ្នំ ស្រុកស្អាង ដើម្បីយកមកប្រើប្រាស់(ជក់)។
នៅវេលាម៉ោង៣ និង១៥នាទីរសៀល ថ្ងៃ ខែឆ្នាំកើតហេតុខាងលើ កម្លាំងផ្នែកប្រឆាំងបទល្មើសគ្រឿងញៀន សហការជាមួយកម្លាំងប៉ុស្តិ៍នគរបាលរដ្ឋបាលក្រាំងយ៉ូវ បានធ្វើការត្រួតពិនិត្យឆែកឆេរ នៅបន្ទប់ឈ្មោះ មន គង្គា ហៅតុល នៅភូមិកណ្តាល ឃុំក្រាំងយ៉ូវ ស្រុកស្អាង បានរកឃើញម្សៅក្រាមពណ៌សថ្លា សង្ស័យជាសារធាតុញៀន(ម៉ាទឹកកក)ចំនួន៤៥កញ្ចប់ (ធំ០១កញ្ចប់ និងតូច៤៤កញ្ចប់) នៅខ្លួនឈ្មោះ មន គង្គា ហៅតុល នឹងនៅខ្លួនឈ្មោះ ស្រ៊ន ទិ ចំនួន០៥កញ្ចប់តូចទៀត រួចឃាត់ខ្លួនជនសង្ស័យ ទាំងពីរនាក់ បញ្ជូនមកប៉ុស្តិ៍នគរបាលក្រាំងយ៉ូវដើម្បីសាកសួរ។ នៅចំពោះមុខសមត្ថកិច្ចនគរបាល ឈ្មោះ មន គង្គា ហៅតុល បានសារភាពថា ខ្លួនបានទិញគ្រឿងញៀន(ម៉ាទឹកកក)ចំនួន០១កញ្ចប់ធំ តម្លៃ១៥០ដុល្លារ ពីបុរសម្នាក់មិនស្គាល់ឈ្មោះ នៅចំណុចវាលខ្សាច់ រាជធានីភ្នំពេញ ដើម្បីវេចខ្ចប់លក់បន្ដ។ នៅវេលាម៉ោង៥ល្ងាច ថ្ងៃខែឆ្នាំដដែល ដោយទទួលបានការឯកភាពពីលោក លាវ ស្រេង ព្រះរាជអាជ្ញាសាលាដំបូងខេត្តកណ្តាល អនុញ្ញាតឲ្យបន្ដធ្វើការត្រួតពិនិត្យ ឆែកឆេរផ្ទះរបស់ឈ្មោះ សំ គុន ភេទស្រី អាយុ៤៤ឆ្នាំ នៅភូមិគោកអណ្តែក ឃុំស្អាងភ្នំ បានរកឃើញម្សៅក្រាមពណ៌សថ្លា សង្ស័យជាសារធាតុញៀន(ម៉ាទឹកកក)ចំនួន២៥កញ្ចប់តូច។ ប៉ុន្តែជនសង្ស័យឈ្មោះ សំ គុន បានគេចខ្លួនបាត់មុនសមត្ថកិច្ចទៅដល់៕
https://youtu.be/s-lNDDXwQGI
ចែករំលែកព័តមាននេះ