ខេត្តស្វាយរៀង ៖ ម៉ូតូមួយគ្រឿងត្រូវបានឆេះម៉ដ្ឋសល់តែគ្រោងឆ្អឹងនៅខាងមុខការ៉ាសសាំងមួយកន្លែងនៅក្រុងបាវិតផ្អើលមនុស្សគ្រប់គ្នាឈប់មើល ខណៈម្ចាស់ការ៉ាស់សាំងដុតដៃដុតជើងជួយពន្លត់ព្រោះខ្លាចរាលដាលដល់ការ៉ាសរបស់ខ្លួន និងផ្ទះអ្នកស្រុកដទៃទៀត រីឯម្ចាស់ម៉ូតូភ័យរត់គេចបាត់ស្រមោល ។ ករណីឆាបឆេះនេះនៅព្រឹកវេលាម៉ោងប្រហែល៧ព្រឹក ថ្ងៃទី១៧ ខែឧសភា ឆ្នាំ២០១៨ នៅមុខការ៉ាសសាំងមួយកន្លែងស្ថិតក្នុងភូមិបាវិតកណ្តាល ឃុំបាវិតកណ្តាល ក្រុងបាវិត ខេត្តស្វាយរៀង ។
បើតាមសម្តីម្ចាស់ការ៉ាស់សាំងបានឱ្យដឹងថា មុនពេលកើតហេតុមានបុរសម្នាក់មិនស្គាល់ឈ្មោះបានជិះម៉ូតូមួយគ្រឿងម៉ាក Click ចូលមកចាក់សាំងនៅការ៉ាស់របស់គាត់ដោយឱ្យចាក់មួយពេញ ក្រោយចាក់សាំង និងគិតលុយរួចម្ចាស់ម៉ូតូបានបញ្ឆេះម៉ូតូជិះចេញទៅតែមិនដឹងជាកើតអីស្រាប់តែម៉ូតូរបស់គាត់មានភ្លើងឆេះចេញពីខាងក្រោមកែបធ្វើឱ្យម្ចាស់ម៉ូតូភ័យស្លន់ស្លោរត់ចោលម៉ូតូបាត់ទៅ ។
ម្ចាស់ការ៉ាស់បានបន្តទៀតថា ដោយឃើញបែបនេះគាត់ក៏បានរុញម៉ូតូចេញទៅក្រៅហើយឆ្ងាយពីការ៉ាសសាំងព្រោះខ្លាចឆេះការ៉ាស់របស់គាត់ ហើយជួយពន្លត់ភ្លើងដែរឆេះឱ្យរលត់បានទាន់ពេលវេលាមិនបណ្តាលឲ្យរៀលដាល់ ។
សូមបញ្ជាក់ផងដែរថា ករណីនេះមិបណ្តាលឱ្យមានគ្រោះថ្នាក់ដល់អាយុជីវិតមនុស្សឬទ្រព្យសម្បត្តិអ្នកដទៃឡើយគឺខូចខាតតែម៉ូតូមួយគ្រឿងតែប៉ុណ្ណោះ ៕
ចែករំលែកព័តមាននេះ