ខេត្តបាត់ដំបង ៖ តាយាយចំណាស់២នាក់ប្តីប្រពន្ធបង្ខំចិត្តចាកចេញពីលំនៅដ្ឋានរកសុំទាននៅក្រុងប៉ោយប៉ែត ដើម្បីចិញ្ចឹមក្រពះ ព្រោះគ្មានទីពឹង ក្រោយពីព្រះអគ្គីឆេះផ្ទះរបស់ពួកគាត់អស់កាលពីដើមខែឧសភា ២០១៨ នៅភូមិគំនរបេង ឃុំសិរីមានជ័យ ស្រុកសំពៅលូន ខេត្តបាត់ដំបង ។
គ្រួសារខាងលើបុរសជាប្តីឈ្មោះ ទិត្យ ស៊ុន អាយុ៧៣ឆ្នាំ ប្រពន្ធឈ្មោះ ហ៊ឹម ព្រេន អាយុ៦៣ឆ្នាំ មានទីលំនៅក្នុងឃុំស្រុកដែលបានរៀបរាប់ខាងលើ ។ តាយាយចំណាស់ទាំង២នាក់បានទៅសុំលោកនៅវត្តបាលិលេយ្យ ក្នុងក្រុងប៉ោយប៉ែត ដើម្បីស្នាក់នៅបណ្តោះអាសន្ន សុំទានរកប្រាក់ចិញ្ចឹមជីវិត តែយាយជាអ្នកសុុំទានគេ ចំណែកតាវិញគ្រាន់តែជាអ្នកមើលថែយាយ ព្រោះយាយតែតែឈឺ ។
បុរសចំណាស់រូបនេះអះអាងថា គាត់ជាប្រធានអាចារ្យនៅវត្តបេង ស្ថិតក្នុងភូមិគំនរបេង ឃុំសិរីមានជ័យ ។ តាយាយកំសត់ទាំង២រៀបរាប់ទាំងទឹកភ្នែកថា ផ្ទះរបស់គាត់ទំហំ៣គុណ៤ម៉ែត្រសង់ពីឈើប្រក់សង្កសី ត្រូវបានអគ្គិភ័យឆេះអស់គ្មានសល់ និងមិនដឹងពីមូលហេតុ ខណៈគាត់រវល់ទៅព្យាបាលជំងឺនៅមន្ទីរពេទ្យធំឯខេត្តបាត់ដំបង ។ តាយាយខាងលើប្រាប់ថា មានកូនប្រុសម្នាក់ ហើយគេបែកគ្រួសារទៅនៅផ្សេង ថែមទាំងក្រីក្រទៀតមិនអាចឲ្យពួកគាត់ពឹងពាក់បាន ។ ពួកគាត់ថា ដោយសារបញ្ហាជីវភាព ម្យ៉ាងផ្ទះក៏ត្រូវភ្លើងឆេះអស់ទើបបង្ខំចិត្តនាំតាយាយទៅកាន់ក្រុងប៉ោយប៉ែត ដើម្បីដើរសុំទានរកប្រាក់ចិញ្ចឹមជីវិត ។
ដោយព្រះសង្ឃ១អង្គ ព្រោះតែអាណិតបានជួយថវិការតាយាយខាងលើមួយចំនួនដើម្បីទិញម្ហូបអាហារហូបបណ្តោះអាសន្ន ។
យ៉ាងណាក៏ដោយបុរសចំណាស់និយាយថា យាយជាអ្នកសុំទានគេ ចំណែកគាត់គ្រាន់តែជាអ្នកមើលថែយាយពេលយប់ ព្រោះប្រពន្ធគាត់តែងឈឺញឹកញាប់មិនអាចដើរចោលបាន ដោយស្នាក់នៅក្នុងវត្ត ។ ពួកគាត់ទទូចសុំសប្បុរសជនក្នុង និងក្រៅប្រទេសមេត្តាជួយផង ដើម្បីបានរស់ជាដង្ហើមចុងក្រោយ ។
ជុំវិញករណីខាងលើសមាជិកភូមិគំនរបេង លោកស្រីហ៊ឹម យ៉ាវ ប្រាប់កោះសន្តិភាពតាមទូរស័ព្ទថា គ្រួសារខាងលើត្រូវភ្លើងឆេះផ្ទះអស់កាលពីដើមខែឧសភានេះពិតប្រាកដមែន ។ ហើយថា កើតហេតុភ្លើងឆេះនោះអាជ្ញាធរឃុំ និងស្រុកបានយកអំណោយជាគ្រឿងឧបភោគបរិភោគ និងថវិការមួយចំនួនចែកជូនដែរ តែតាយាយខាងលើមិនបានទទួលទេ ព្រោះរវល់ទៅមន្ទីរពេទ្យនៅឯខេត្តបាត់ដំបង គឺកូនគាត់ និងគ្រួសារទទួលជំនួស ៕
ចែករំលែកព័តមាននេះ