ខេត្តព្រៃវែង ៖ បុរសម្នាក់ដែលជាឪពុកមាសាច់ថ្លៃ បានត្រូវសមត្ថកិច្ចចាប់ខ្លួនពីបទចាប់រំលោភក្មួយស្រី តាំងពីអាយុ១៣ឆ្នាំរហូតដល់១៦ឆ្នាំ ទើបបែកធ្លាយដឹងដល់ឪពុកម្តាយនាង ខណៈក្មេងស្រីចេះតែមានការភ័យខ្លាច ចំពោះពាក្យគំរាមរបស់ឪពុកមាសាច់ថ្លៃ ដែលថានឹងមានរឿងធំកើតឡើង បើសិនជាប្រាប់គេ
ឱ្យដឹងនោះ ។ រឿងរ៉ាវគួរឱ្យស្អប់ខ្ពើម និងថ្កោលទោសនេះ ទើបបានបែកធ្លាយកាលពីថ្ងៃ១៥ ឧសភា កន្លងមក ។
បើតាមនគរបាលប៉ុស្តិ៍ក្តឿងរាយការណ៍ឱ្យដឹងថា សមត្ថកិច្ចបានទទួលបណ្តឹងផ្ទាល់មាត់ពីឪពុកក្មេងស្រី ដែលបានប្តឹងជន ឈ្មោះ វ៉េង វិណៃ ភេទប្រុស អាយុ៤០ឆ្នាំ ត្រូវជាប្អូនថ្លៃ រស់នៅក្នុងឃុំជាមួយគ្នាថា បានប្រព្រឹត្តអំពើចាប់រំលោភកូនស្រីរបស់គាត់ជាច្រើនលើកច្រើនសា ប៉ុន្តែដោយសារការភ័យខ្លាចទើបកូនស្រីមិនហ៊ានប្រាប់ពួកគាត់ជាឪពុកម្តាយឱ្យដឹង ។ ប្រភពដដែលបន្តថា ប្រការដែលនាំឱ្យបែកធ្លាយរឿងដ៏លាមកនេះ ដោយសារតែឪពុកម្តាយក្មេងស្រីចេះតែសង្កេតឃើញកូនស្រីរបស់គាត់មួយរយៈនេះ ចេះតែមានសុខភាពមិនសូវល្អ ស្គមស្លេកស្លាំង និងមិនសូវហូបបាយ ។ ពេលពួកគាត់សួរនាំ កូនស្រីតែងតែកុហកថានាងមិនមានជំងឺអ្វីទេ ហើយពួកគាត់ ក៏មិនបានសួរនាំអ្វីទៀតដែរ ។ លុះមកដល់ថ្ងៃទី១២ ឧសភា វេលាម៉ោងប្រមាណ៦ល្ងាច បុរសជាឪពុកឃើញប្អូនថ្លៃរបស់ខ្លួននៅជាមួយកូនស្រីមុខបន្ទប់ទឹកក្រោយផ្ទះស្ងាត់ៗ តែពីរនាក់ ក៏ដើរទៅមើល ។
នៅពេលឃើញឪពុកក្មេងស្រីដើរសំដៅមក បុរសជាប្អូនថ្លៃក៏រត់គេចចេញទៅ នៅសល់តែក្មេងស្រីកំពុងលើកខោស្លៀកវិញ ដែលឃើញបែបនេះ ឪពុកមានការសង្ស័យ ក៏សួរនាំកូនតែកូនពុំប្រាប់អ្វីទេ ។ ដោយមិនអស់ចិត្ត នៅថ្ងៃបន្ទាប់មក ឪពុកម្តាយក៏បន្តលួងលោមសួរនាំកូនទៀត ទើបកូនប្រាប់ការពិតថា រូបនាងត្រូវឪពុកមាឈ្មោះ វិណៃ នេះចាប់រំលោភជាច្រើនលើកច្រើនសាមកហើយ ។ លើកទី១ តាំងពីនាងមានអាយុ១៣ឆ្នាំ ដែលឪពុកមានេះ តែងចាប់រំលោភនាងពេលឪពុកម្តាយមិននៅ ឬពេលស្ងាត់គ្មានអ្នកណានៅផ្ទះ តែនាងមិនដែលហ៊ានប្រាប់អ្នកណាទេ ព្រោះឪពុកមារូបនេះគំរាមថា នឹងមានរឿងធំបើសិនជាប្រាប់គេ ។
រីឯនៅថ្ងៃបែកការណ៍នេះ ពុំទាន់បានរំលោភទេ គឺគ្រាន់តែឱបថើបនិងសម្រាតខោ ស្រាប់តែឪពុកទាន់ ឪពុកមាចិត្តថោកនេះ ក៏រត់ចេញបាត់ទៅ ។ ក្រោយពេលឃាត់ខ្លួន ជនឈ្មោះ វ៉េង វីណៃ នេះសារភាពថា ខ្លួនពិតជាបានប្រព្រឹត្តអំពើដូចការចោទប្រកាន់នោះមែន ៕
ចែករំលែកព័តមាននេះ