ខេត្តប៉ៃលិន ៖ ប្រជាកសិករដែលដាំបន្លែសាឡាត់កាលពីជាងកន្លះខែមុន រហូតមកដល់ពេលនេះមិនទទួលបានផលសម្រាប់យកទៅលក់ដូរនៅទីផ្សារដូចសព្វដងនោះឡើយ គឺប្រឈមនឹងការខូចខាតដោយសារតែភ្លៀងជាប់ៗ គ្នាខ្លាំងពេកពោល គឺភ្លៀងធ្លាក់ជាប់ៗគ្នាស្ទើររាល់ថ្ងៃជាងកន្លះខែមកហើយ ។ អ្វីដែលពួកគាត់ត្រូវធ្វើបន្តទៀត គឺមានដកបន្លែសាឡាត់ដែលដាំពីមុនចោល…
ខេត្តប៉ៃលិន ៖ ប្រជាកសិករដែលដាំបន្លែសាឡាត់កាលពីជាងកន្លះខែមុន រហូតមកដល់ពេលនេះមិនទទួលបានផលសម្រាប់យកទៅលក់ដូរនៅទីផ្សារដូចសព្វដងនោះឡើយ គឺប្រឈមនឹងការខូចខាតដោយសារតែភ្លៀងជាប់ៗ គ្នាខ្លាំងពេកពោល គឺភ្លៀងធ្លាក់ជាប់ៗគ្នាស្ទើររាល់ថ្ងៃជាងកន្លះខែមកហើយ ។ អ្វីដែលពួកគាត់ត្រូវធ្វើបន្តទៀត គឺមានដកបន្លែសាឡាត់ដែលដាំពីមុនចោល រួចកាប់ដីដាក់ដាំសារជាថ្មីឡើងវិញ ។
ជាក់ស្តែងមានកសិករម្នាក់ឈ្មោះ ទ្រី ភេទប្រុស រស់នៅភូមិប៉ាហ៊ីជើង សង្កាត់ប៉ៃលិន ក្រុងប៉ៃលិនបានឱ្យដឹងថា គាត់បានដាំបន្លែជាច្រើនប្រភេទដូចជា ស្ពៃចង្កឹះ ត្រកួន ត្រប់ និងសាឡាត់ជាង១០រង ។ ប៉ុន្តែគួរឱ្យសោកស្តាយបន្លែសាឡាត់ទាំងអស់ត្រូវដកចោល ដើម្បីកាប់ចិញ្ច្រាំដីដាក់ដាំសារជាថ្មីឡើងវិញព្រោះការដាំរបស់គាត់កាលពីជាងកន្លះខែមុនទទួលរងការខូចខាតអស់ទាំងស្រុងទៅហើយ ។
គាត់បន្តថា បន្លែសាឡាត់មិនត្រូវទឹកភ្លៀងជោកជាំពេកនោះទេ បើពុំដូច្នោះប្រឈមនឹងការខូចខាតជាក់ជាមិនខាន ។ រហូតមកដល់ពេលនេះមិនត្រឹមតែបន្លែរបស់គាត់ខូចខាតប៉ុណ្ណោះទេ សូម្បីតែអ្នកដាំដទៃទៀត នៅក្នុងក្រុងប៉ៃលិនក៏ទទួលរងការខូចខាតគ្រប់ៗគ្នាផងដែរ ។ ដូច្នេះហើយទើបបន្លែសាឡាត់នៅឯផ្សារមានការឡើងថ្លៃជាងមុនដោយ១គីឡូក្រាមតម្លៃ៦០០០ទៅ៧០០០រៀលឯណោះ ដែលកាលពីមុន ១គីឡូក្រាមត្រឹមតែ២៥០០ទៅ៣០០០រៀលប៉ុណ្ណោះ ។
ទោះបីជាយ៉ាងណាក៏ដោយ គាត់មិនព្រមបោះបង់ចោលមុខរបរដាំបន្លែលក់នេះដែរព្រោះអាចជួយដោះស្រាយជីវភាពប្រចាំថ្ងៃរបស់គាត់សម្រាប់ក្រុមគ្រួសារផងដែរ ។ បើសិនជាយូរៗភ្លៀងម្តងនោះដំណាំរបស់គាត់លូតលាស់ល្អ ដកយកទៅលក់នៅទីផ្សារជាប្រចាំដោយមានម៉ូយចាំទទួលទិញយកទៅលក់បន្តមិនព្រួយបារម្ភភ័យខ្លាចលក់មិនដាច់នោះឡើយ ៕
ចែករំលែកព័តមាននេះ