ខេត្តកណ្ដាល ៖ កងរាជអាវុធហត្ថខេត្តកណ្តាល សហការជាមួយកងរាជអាវុធហត្ថលើផ្ទៃប្រទេស កងរាជអាវុធហត្ថរាជធានីភ្នំពេញ បំបែកសំណុំរឿងករណីលួចមានស្ថានទម្ងន់ទោស (គាស់ផ្ទះលួចយកទូរស័ព្ទ) ដ៏ធំមួយ។ បន្ទាប់ពីធ្វើការស៊ើបអង្កេត ស្រាវជ្រាវ អស់រយៈពេលបីថ្ងៃ អនុវត្តនូវភារកិច្ចស្នូលរបស់កងរាជអាវុធហត្ថ បង្ការបង្ក្រាប និងសង្គ្រោះ ពិសេសប្រសាសន៍ដឹកនាំ ព្រមទាំងការយកចិត្តទុកដាក់ដ៏ខ្ពង់ខ្ពស់ពីនាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការ កងរាជអាវុធហត្ថលើផ្ទៃប្រទេស និងឯកឧត្តមបណ្ឌិត ម៉ៅ ភិរុណ អភិបាលខេត្ត និងជាប្រធានគណៈបញ្ជាការឯកភាពខេត្តកណ្តាល ដែលលោកតែងតែយកចិត្តទុកដាក់ តាស់តឿនក្រើនរំលឹកដល់ មេបញ្ជាការគ្រប់កងឯកភាព ពង្រឹងការយកចិត្តទុកដាក់បញ្ហាសន្តិសុខ សណ្តាប់ធ្នាប់សង្គម បង្ក្រាបរាល់បទល្មើសគ្រប់ប្រភេទ ជាពិសេសបទល្មើសគ្រឿងញៀន បទល្មើសលួចឆក់ប្លន់ ឃាតកម្មជាដើម។ ជាក់ស្តែងករណីលួចមានស្ថានទម្ងន់ទោសមួយដែលកើតឡើង កាលពីវេលាម៉ោង៩ និង៣០នាទី ថ្ងៃព្រហស្បតិ៍១១រោច ខែពិសាខ ឆ្នាំចសំរិទ្ធស័ក ព.ស២៥៦២ ត្រូវនឹង ថ្ងៃទី១០ ខែឧសភា ឆ្នាំ២០១៨ មានករណីលួច (គាស់ផ្ទះលួចយកទូរស័ព្ទ) មួយកើតឡើងនៅចំណុចភូមិថ្មី សង្កាត់តាខ្មៅ ក្រុងតាខ្មៅ ខេត្តកណ្តាល។
បង្កដោយជនសង្ស័យមិនស្គាល់អត្តសញ្ញាណ បានធ្វើសកម្មភាពគាស់ និងកាត់សោផ្ទះ របស់ជនរងគ្រោះឈ្មោះ ចេប ចាន់រី ភេទប្រុស អាយុ៣១ឆ្នាំ មុខរបរលក់ទូរស័ព្ទ មានទីលំនៅផ្ទះកើតហេតុខាងលើ។ សម្ភារដែលបាត់បង់រួមមាន ៖ ១-ទូរសព្ទ័ដៃប្រហែល៩០គ្រឿង គិតជាទឹកប្រាក់ប្រហែល ១៣.០០០ដុល្លារ។ ២-បាត់បង់ប្រាក់រៀល ១.៥០០.០០០រៀល ប្រាក់ដុល្លារ ប្រហែល ៧០ដុល្លារ។ សរុបជាទឹកប្រាក់ប្រមាណ ១៣.៥០០ដុល្លា។ សមត្ថកិច្ចបានឲ្យដឹងថា នៅមុនពេលកើតហេតុ ជនរងគ្រោះបានចាក់សោផ្ទះចោល រួចនាំគ្នាទាំងគ្រួសារទៅចូលរួមមង្គលការ បងប្រុសរបស់ខ្លួននៅភូមិស្ទឹងជ្រៅ សង្កាត់ព្រែកឫស្សី ក្រុងតាខ្មៅ។ លុះដល់វេលាម៉ោងប្រហែល ១១ និង១០នាទីថ្ងៃដដែល ជនរងគ្រោះបានត្រឡប់មកផ្ទះវិញ ឃើញអីវ៉ាន់មានសភាពរាយប៉ាយក្នុងផ្ទះ ទើបដឹងថា មានចោរចូលលួចទ្រព្យសម្បត្តិក្នុងផ្ទះ ទើបគាត់រាយការណ៍មកសមត្ថកិច្ច កងរាជអាវុធហត្ថក្រុងតាខ្មៅតែម្តង។ ករណីនេះលោក សំ តុលា មេបញ្ជាការ កងរាជអាវុធហត្ថ ខេត្តកណ្តាល បានដឹកនាំបញ្ជាផ្ទាល់ ចុះអង្កេតស្រាវជ្រាវយ៉ាងយកចិត្តទុកដាក់បំផុត រហូតឈានដល់ការកំណត់មុខសញ្ញាជនសង្សយ័បានមួយចំនួន។
ក្រោមបញ្ជា និងការយកចិត្តទុកដាក់ខ្ពស់ពីលោកមេបញ្ជាការ កម្លាំងជំនាញកងរាជអាវុធហត្ថ ខេត្តកណ្តាល និងក្រុងតាខ្មៅ ដឹកនាំចុះប្រតិបត្តិការផ្ទាល់ដោយលោក ទូច អ៊ីណាន មេបញ្ជាការរង ទទួលការងារព្រហ្មទណ្ឌ បានពុះពារស្វែងរកមុខសញ្ញាជនសង្សយ័តាមបច្ចេកទេសជំនាញ រហូតដល់ថ្ងៃទី១២ ខែឧសភា ឆ្នាំ២០១៨ កំណត់មុខសញ្ញាបាន និងមានការសម្របសម្រួល កិច្ចនីតិវិធីពីតំណាងអយ្យការអមសាលាដំបូងខេត្តកណ្តាល រាជធានីភ្នំពេញ តាមដំណាក់កាលនីមួយៗ ដើម្បីពន្លាតសមត្ថកិច្ចដែនដី ដោយមានការសហការល្អ រវាងជំនាញកងរាជអាវុធហត្ថលើផ្ទៃប្រទេស រាជធានីភ្នំពេញ ក្នុងការស្រាវជ្រាវស្វែងរកចាប់ខ្លួនមុខសញ្ញាជនសង្ស័យ ទទួលបានលទ្ធផលដូចខាងក្រោម ៖ ថ្ងៃទី១៣ ខែឧសភា ឆ្នាំ២០១៨ កម្លាំងកងរាជអាវុធហត្ថ បានចាប់ជនសង្ស័យឈ្មោះ គី ប៊ុនអេង ភេទប្រុស នៅក្នុងភូមិសាស្ត្ររាជធានីភ្នំពេញ ដោយដឹងថា មានសមត្ថកិច្ចតាមចាប់ខ្លួនជនសង្ស័យក៏បើកម៉ូតូរត់គេចខ្លួនតែត្រូវកម្លាំងយើងឃាត់ខ្លួនជនសង្ស័យឈ្មោះ គី ប៊ុនអេង ភេទប្រុស អាយុ៣៣ឆ្នាំ (ស្នាក់នៅផ្ទះជួល ភូមិ១ សង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ) មុខរបរមិនពិតប្រាកដ នៅចំណុចស្ពានដែក ភូមិឫស្សី សង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ។
វត្ថុតាង និងសម្ភារជាប់ខ្លួនដែលសមត្ថកិច្ចដកហូតបានមាន ម៉ូតូម៉ាក Honda dream C125 ពណ៌ខ្មៅ ស៊េរី០១៤ ស្លាកលេខ ភ្នំពេញ 1CG-1272 និងទូរស័ព្ទចំនួន០៤គ្រឿង។ នៅចំពោះមុខសមត្ថកិច្ច កងរាជអាវុធហត្ថ ជនសង្សយ័បានឆ្លើយសារភាពថា៖ ឈ្មោះ ម៉ៅ វិទូ ភេទប្រុស អាយុ២៣ឆ្នាំ ស្នាក់នៅផ្ទះជួល ភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ មុខរបរមិនពិតប្រាកដ ជាអ្នកធ្វើសកម្មភាពចូលកាត់សោ និងគាស់ផ្ទះនៅចំណុចខាងលើ ចូលយកទូរសព្ទ័ប្រមាណជិត១០០គ្រឿង យកមកចែកគ្នា រួចនាំគ្នាគេចខ្លួនជាបន្ទាប់រហូត ត្រូវសមត្ថកិច្ចឃាត់ខ្លួន។ បន្តមកទៀតនៅថ្ងៃទី១៥ ខែឧសភា ឆ្នាំ២០១៨ កម្លាំងកងរាជអាវុធហត្ថ ខេត្តកណ្តាល រាជធានីភ្នំពេញ បានឃាត់ខ្លួនជនសង្សយ័ម្នាក់ទៀតឈ្មោះ ម៉ៅ វិទូ ភេទប្រុស អាយុ២៣ នៅចំណុចផ្លូវ៦០ម៉ែត្រ ភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។ ដកហូតវត្ថុតាង និងសម្ភារជាប់ខ្លួនមាន ទូរស័ព្ទដៃចំនួន០១គ្រឿង។
រួចបន្តចុះឆែកឆេរបន្ទប់ជួលរបស់ជនសង្ស័យឈ្មោះ គី ប៊ុនអេង ចំនួន០២បន្ទប់ នៅចំណុចភូមិលេខ១ សង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ រកឃើញ និងចាប់យកវត្ថុតាងរួមមាន៖
១.ទូរសព្ទ័ដៃចំនួន ៤៤ គ្រឿង ម៉ាក Iphone ចំនួន០២គ្រឿង,ម៉ាក Samsung ចំនួន០១គ្រឿង, ម៉ាក Huawei ចំនួន១៥គ្រឿង,ម៉ាក Hiya ចំនួន០៥គ្រឿង,ម៉ាក Moto ចំនួន០៣គ្រឿង,ម៉ាក Camfone ចំនួន ០៤គ្រឿង,ម៉ាក Nokia អ៊ិនចុចពិល ចំនួន០៦គ្រឿង និង Nokia ថាច់០២គ្រឿង,ម៉ាក Meizu ចំនួន០៥ គ្រឿង,ម៉ាក Telego ០១គ្រឿង។ នៅវេលាម៉ោង៨យប់ថ្ងៃទី១៥ ខែឧសភា ឆ្នាំ២០១៨ កម្លាំងជំនាញខេត្តកណ្តាល ស្រុកអង្គស្នួល និងអាជ្ញាធរដែនដី បានធ្វើការឃាត់ខ្លួនជនសង្ស័យពីរនាក់ បន្ថែមទៀត ១/ឈ្មោះ ស្រី ចាន់រ៉ា ភេទស្រី អាយុ៣៤ឆ្នាំ មុខរបរមេផ្ទះ (អតីតប្រពន្ធជនសង្ស័យ គី ប៊ុនអេង) ពីបទទទួលផលចោរកម្ម ២/ឈ្មោះ ចំរើន រតនា ភេទប្រុស អាយុ៣០ឆ្នាំ មុខរបរកម្មករ (ប្តីចុង) ករណីរក្សាទុក និងប្រើប្រាស់គ្រឿងញៀនជាក់ស្តែង នៅចំណុចផ្ទះជួល បន្ទប់លេខBO 04 ភូមិថ្នល់ទទឹង ឃុំដំណាក់អំពិល ស្រុកអង្គស្នួល ខេត្តកណ្តាល។
ការឃាត់ខ្លួននេះដោយដឹងថា ពីរនាក់ប្តីប្រពន្ធ ជាមុខសញ្ញាចែកចាយ ប្រើប្រាស់គ្រឿងញៀន និងទទួលផលចោរកម្ម (ករណីខាងលើ) កម្លាំងជំនាញបានសុំការអនុញ្ញាតពីសាមីខ្លួនជាម្ចាស់បន្ទប់ ដោយមានការចូលរួមពីម្ចាស់ផ្ទះជួល និងអាជ្ញាធរដែនដី។ ពិសេសដោយមានការយល់ព្រមពីតំណាងអយ្យការអមសាលាដំបូងខេត្តកណ្តាល ធ្វើការឆែកឆេរបន្ទប់ជួលជាក់ស្តែងឃើញជនសង្សយ័ឈ្មោះ ចំរើន រតនា កំពុងជក់គ្រឿងញៀន។ ជាលទ្ធផលយើង រកឃើញ និងចាប់យកវត្ថុតាងរួមមាន៖ ១/គ្រឿងញៀនប្រភេទម៉ាទឹកកកចំនួន០៤កញ្ចប់ និងសម្ភារប្រើប្រាស់គ្រឿងញៀន ២/ដាវសាម៉ូរ៉ៃចំនួន០១ដើម និងស្នាប់ដៃចំនួនមួយ។ ដោយឡែកទូរសព្ទ័០១គ្រឿង និងipad មីនី០១គ្រឿង ដែលប្តីដើម(គី ប៊ុនអេង)លួចពីជនរងគ្រោះ (ចេប ចាន់រី) យកមកឲ្យខ្លួននោះ គឺទូរសព្ទ័យកទៅលក់នៅផ្សារឃ្លាំងរំសេវ រាជធានីភ្នំពេញ បានប្រាក់៣០ដុល្លារ និងipad មីនី០១គ្រឿង ខ្លួនឲ្យទៅកូនប្រុសនៅរាជធានីភ្នំពេញទុកប្រើ។
នៅថ្ងៃទី១៦ ខែឧសភា ឆ្នាំ២០១៨ កម្លាំងជំនាញខេត្តកណ្តាល រាជធានីភ្នំពេញ សហការគ្នា នាំជនសង្សយ័ឈ្មោះ គី ប៊ុនអេង ទៅចង្អុលបង្ហាញម្ចាស់ទីតាំងទទួលផលចោរកម្ម(ទិញទូរសព្ទ័) នៅរាជធានីមួយចំនួន តែពុំបានសម្រេច។ ក្រោយពីធ្វើការស្រាវជ្រាវយ៉ាងយកចិត្តទុកដាក់ដោយភាពទទួលខុសត្រូវខ្ពស់ មិនគិតថ្ងៃ ឬយប់ ជាបន្តបន្ទាប់រួចមក កម្លាំងសមត្ថកិច្ចជំនាញ បានរកឃើញ និងចាប់យកវត្ថុតាង (ទូរសព្ទ័ដៃ) ជារបស់ជនរងគ្រោះបានចំនួន៤៤គ្រឿង និងបានការឯកភាពពីតំណាងអយ្យការអមសាលាដំបូងខេត្ត កណ្តាល ប្រគល់ជូនជនរងគ្រោះវិញទាំងអស់។ បច្ចុប្បន្ន ជនសង្ស័យ និងវត្ថុតាងសមត្ថកិច្ចជំនាញបានឃាត់ខ្លួន និងកំពុងបន្តនីតិវិធីដើម្បីចាត់ការតាមផ្លូវច្បាប់៕
ចែករំលែកព័តមាននេះ