ខេត្តរតនគីរី៖ ប្រជាកសិករម្នាក់ឈ្មោះ កៅ គង់ មានវ័យជិត៤០ឆ្នាំ រស់នៅក្នុងស្រុកបកែវ បានរៀបរាប់ថា បន្ទាប់ពីពីដំណាំដំឡូងមីទទួលបានទិន្នផលខ្ពស់ និងតម្លៃក៏មានការកើនឡើងនាដើមឆ្នាំ២០១៨កន្លងទៅ រួមនឹងភ្លៀងដើមខែឧសភានេះ…
ខេត្តរតនគីរី៖ ប្រជាកសិករម្នាក់ឈ្មោះ កៅ គង់ មានវ័យជិត៤០ឆ្នាំ រស់នៅក្នុងស្រុកបកែវ បានរៀបរាប់ថា បន្ទាប់ពីពីដំណាំដំឡូងមីទទួលបានទិន្នផលខ្ពស់ និងតម្លៃក៏មានការកើនឡើងនាដើមឆ្នាំ២០១៨កន្លងទៅ រួមនឹងភ្លៀងដើមខែឧសភានេះ គាត់ចាប់ផ្តើមភ្ជួររាល់ដីទុកដីចោលមួយរយៈ ទើបចាប់ផ្ដើមបាចជី រួចភ្ជួរដីម្ដងទៀតដើម្បីអោយដីនិងជីល្បាយចូលគ្នា បន្ទាប់មកទើបចាប់ផ្ដើមដាំដើមដំឡូងមីដោយកាត់ជាកង់ៗប្រវែងមួយចង្អាមដោតទៅក្នុងដីដែលបានភ្ជួរនិងបាចជីបន្ថែមទៀត ហើយដើមដំឡូងមីដែលគាត់យកមកដាំនេះ គឺគាត់បានទិញមកពីស្រុកអូជុំ ក្នុងខេត្តរតនគិរីនេះតែម្ដង ។ គាត់បានបន្ដរទៀតថា ដោយសារផ្ទៃដីដាំដុះរបស់គាត់មិនសូវល្អ ទើបគាត់ប្រើប្រាស់ជី ហើយការប្រើប្រាស់ជីនេះធ្វើអោយទិន្ឋផលបានល្អជាងការមិនប្រើប្រាស់ជីទ្វេដង ។ ការដាំដុះដើមដំឡូងមីគឺចាប់ផ្ដើមពីខែមេសារហូតដល់ខែមិថុនា រហូតដល់ខែប្រមូលផលមានរយ:ពេលពីប្រាំមួយខែទៅប្រាំពីរខែ ដោយគាស់មើមសំឡូងមីយកមកចិតជាចំណិតៗហាលថ្ងៃរយ:ពេល១២ថ្ងៃ អោយស្ងួតក្រៀម ទើបច្រកបាវលក់នៅក្នុងស្រុក ឬដឹកយកទៅលក់នៅព្រំដែនតាមតំលៃជាក់ស្ដែង ។ 
ចំណែកប្រជាកសិករម្នាក់ឈ្នោះ លន់ វុន រស់នៅភូមិអូរមៀត សង្តាត់ឡាបានសៀក ក្រុងបានលុងបាន ប្រាប់ឲដឹងដែថា កាលពីឆ្នាំ២០១៧ ក្នុងខែឧសភា គាត់បានដាំដុះដំឡូងមីលើផ្ទៃដីចំនួន៣ហិកតា រហូតដល់ខែមករា ឆ្នាំ២០១៨ ទើបចាប់ផ្ដើមប្រមូលផល ។ ការប្រមូលរបស់គាត់ទទួលបានទិន្នផលខ្ពស់គួរសម រីឯតម្លៃដំឡូងមីក៏កើនឡើង ធ្វើអោយពួកគាត់មានការសប្បាយរីករាយក្នុងការទទួលបានប្រាក់ចំណេញល្អប្រសើរជាងឆ្នាំមុនៗ ។ ប្រជាកសិករដដែលបានបន្ដទៀតថា ផ្ទៃដីចំនួន៣ហិតាដែលលោកបានដាំដំឡូងមីក្នុងឆ្នាំ២០១៧កន្លងទៅគឺទទួលបានទិន្នផលចំនួនជិត១០០តោន ដែលតម្លៃកាលពីឆ្នាំ២០១៧បានត្រឹមតែ៤៧០០០០រៀលក្នុង១តោនតែប៉ុណ្ណោះ ។ សម្រាប់ដើមឆ្នាំ២០១៨នេះ ដំឡូងមីហាលស្ងួតក្នុង១តោន គាត់លក់ឱ្យឈ្មួញកណ្ដាលបានតម្លៃ៥៨០០០០រៀល គឺខ្ពស់ជាងឆ្នាំមុន ។
រីឯស្រី្ដម្នាក់ឈ្មោះ សាមាន ស្រីអីម អាយុ៣៨ឆ្នាំ រស់ នៅភូមិអូជុំ ឃុំអូជុំ ស្រុកអូជុំ ជាអ្នកប្រកបរបរលក់ដើមដំឡូងមី បានអោយដឹងដែរថា ដើមដំឡូងមីដែលលក់សព្វថ្ងៃនេះ គឺយកមកពីប្រទេសវៀតណាមតាមច្រកព្រំដែនដូងប្រាំពីដើម ក្នុងខេត្តត្បូងឃ្មុំ ។ ដោយលក់ចងបាច់ ក្នុង១បាច់មានដើមដំឡូងមី១៨ ទៅ២០ដើមតំលៃ៤០០០រៀល ។ ការលក់ក្នុងរយៈ១ខែចាប់ពីចុងខែមេសា រហូតដល់ដើមខែឧសភា ឆ្នាំ ២០១៨នេះបានចំនួនជាង១ម៉ឺនបាច់ មានការកើនឡើងជាងឆ្នាំ២០១៧ ក្នុងខែមេសារហូតដល់ខែឧសភា គាត់លក់បានប្រហែលជាជិត១ម៉ឺនបាច់តែប៉ុណ្ណោះ។
ប្រធានមន្ទីរកសិកម្ម រុក្ខាប្រម៉ាញ់ និងនេសាទខេត្ត លោក សយ សូណា បានឲ្យដឹងថា ដើមឆ្នាំ២០១៨នេះប្រជាកសិករទទួលបានទិន្នផលខ្ពស់ ដោយសារអាកាសធាតុអំណាយផលល្អសម្រាប់ដំណាំគ្រប់ប្រភេទ ចំណែកការទទួលបានទិន្នផលវិញ តាមរបាយការណ៏បឋម ប្រជាកសិករទូទាំងខេត្តអាចប្រមូលផលដំឡូងមីស្រស់បានចំនួនជាង២៤០ពាន់តោន រីឯតម្លៃវិញឆ្នាំនេះគឺតម្លៃដំឡូងមីស្រស់នៅឆ្នាំនេះមានតម្លៃរហូតដល់៣០០រៀលក្នុង១គីឡូក្រាម ។ លោកបានឱ្យដឹងទៀតថា ក្នុងចំណោមស្រុក-ក្រុងទាំង៩ក្នុងខេត្តរតនគិរីដែលប្រជាកសិកដាំដំឡូងមីទទួលបានទិន្នផលច្រើនជាងគេគឺស្រុកបរកែវ និងស្រុកអូយ៉ាដាវ ៕
ចែករំលែកព័តមាននេះ