ខេត្តកំពង់ឆ្នាំង ៖ ស្ត្រីម្នាក់ខណៈឈឺពោះឆ្លងទន្លេ បានត្រូវប្ដីដឹកទៅមន្ទីរពេទ្យបង្អែកស្រុកបរិបូណ៌ ប៉ុន្តែនៅពេលទៅដល់ ក្រុមគ្រូពេទ្យប្រាប់ថា កូនក្នុងផ្ទៃអាចកើតមកលំបាក ដូច្នេះត្រូវតែបញ្ជូនទៅមន្ទីរពេទ្យបង្អែកខេត្ត ។ ប៉ុន្តែអ្វីដែលជាការកត់សម្គាល់នោះ គឺក្រុមគ្រូពេទ្យបង្ខំទារប្រាក់ចំនួន១០ម៉ឺនរៀល ទើបឱ្យរថយន្តរបស់មន្ទីរពេទ្យបង្អែកស្រុកបរិបូណ៌ ដឹកទៅមន្ទីរពេទ្យបង្អែកខេត្ត បើគ្មានប្រាក់ប៉ុណ្ណឹងទេ រករ៉ឺម៉កម៉ូតូជិះ
ទៅ ។
ហេតុការណ៍មិនប្រក្រតីនេះ បានកើតឡើងកាលពីវេលាម៉ោង៤រសៀលថ្ងៃទី១៤ ឧសភា ។ បុរសឈ្មោះ ម៉ក់ រាក់ អាយុ២៦ឆ្នាំ ជាប្តីស្ត្រីឈឺពោះឆ្លងទន្លេនិយាយថា គាត់មានទីលំនៅក្នុងភូមិកោះមនោ ឃុំឆ្នុកទ្រូ ស្រុកបរិបូណ៌ ។ ប្រពន្ធគាត់ឈ្មោះ ហឹម គិមឈី អាយុ២២ឆ្នាំ បានឈឺពោះឆ្លងទន្លេ គាត់ក៏ដឹកទៅសម្រាលកូន នៅមន្ទីរពេទ្យបង្អែកស្រុកបរិបូណ៌ ។ ប៉ុន្តែពេលទៅដល់គ្រូពេទ្យប្រាប់ថា ប្រពន្ធគាត់មានសភាពខុសប្រក្រតី ត្រូវតែទៅកើតនៅមន្ទីរពេទ្យបង្អែកខេត្ត តែត្រូវបង់សេវា១០ម៉ឺនរៀលសិន ទើបឱ្យរថយន្តដឹកទៅ បើគ្មានទេ ដឹកតាមរ៉ឺម៉កម៉ូតូទៅ ។
បុរសជាប្តីនិយាយទៀតថា ដោយគ្មានជម្រើស គាត់បានជួលរ៉ឺម៉កម៉ូតូក្នុងតម្លៃ៤ម៉ឺនរៀល ដឹកទៅមន្ទីរពេទ្យបង្អែកខេត្ត ប៉ុន្តែពេលដឹកដល់ស្ពានអង្កាម ដែលមានចម្ងាយជាង១០គីឡូម៉ែត្រ ពីមន្ទីរពេទ្យបង្អែកស្រុកបរិបូណ៌ ស្រាប់តែឃើញរថយន្តរបស់មន្ទីរពេទ្យនេះមកតាមក្រោយ រួចក៏ដឹកប្រពន្ធគាត់ទៅមន្ទីរពេទ្យបង្អែកខេត្ត ដើម្បីសម្រាលកូន ។
ពាក់ព័ន្ធនឹងបញ្ហានេះ លោក ឃួន សៅរុំ អភិបាលស្រុកបរិបូណ៌បានឱ្យដឹងថា លោកបានទទួលព័ត៌មានពីប្រជាពលរដ្ឋរាយការណ៍ថា មានស្ត្រីឈឺពោះឆ្លងទន្លេទៅសម្រាលកូននៅមន្ទីរពេទ្យបង្អែកស្រុក តែត្រូវក្រុមគ្រូពេទ្យទារ១០ម៉ឺនរៀល ថ្លៃសេវារថយន្តដឹកទៅមន្ទីរពេទ្យបង្អែកខេត្ត ។ ពេលនោះ លោកក៏បញ្ជាឱ្យក្រុមគ្រូពេទ្យនៅមន្ទីរពេទ្យបង្អែកស្រុកយករថយន្តទៅតាមដឹកស្ត្រី ដែលឈឺពោះឆ្លងទន្លេរូបនេះ ទៅកាន់មន្ទីរពេទ្យបង្អែកខេត្តជាបន្ទាន់ ។
លោក ឈុន ប៊ុនថា ប្រធានមន្ទីរពេទ្យបង្អែកស្រុកបរិបូណ៌ មិនអាចទាក់ទងសុំការបំភ្លឺបានទេជុំវិញករណីខាងលើនេះ ហើយលោក សរិន្ទី រ៉ាវុទ្ឍី ប្រធានមន្ទីរពេទ្យបង្អែកខេត្តក៏មិនអាចធ្វើទំនាក់ទំនងសុំការបំភ្លឺបានដែរ ។ ប៉ុន្តែទោះជាយ៉ាងនេះក្តី រឿងនេះជារឿងពិត ហើយការដែលប្រធានមន្ទីរពេទ្យបង្អែកស្រុកបរិបូណ៌សុខចិត្តយករថយន្តទៅដឹកស្ត្រីឈឺពោះឆ្លងទន្លេនៅពាក់កណ្ដាលផ្លូវនោះ បន្ទាប់ពីមានការស្ដីបន្ទោសពីអាជ្ញាធរស្រុកផងដែរ ។ សូមបញ្ជាក់ថា ស្ត្រីខាងលើបានសម្រាលកូនដោយសុវត្ថិភាពហើយ ក្រោមការយកចិត្តទុកដាក់ពីក្រុមគ្រូពេទ្យនៃមន្ទីរពេទ្យបង្អែកខេត្ត ។
ចែករំលែកព័តមាននេះ