ខេត្តព្រៃវែង ៖ ពូថ្លៃម្នាក់បានរំលោភក្មួយស្រីតាំងពីវ័យ១៣ឆ្នាំ រហូតដល់១៦ឆ្នាំ ទើបធ្លាយរឿង ដឹងដល់ឪពុកម្តាយក្មេងស្រី ខណៈក្មេងស្រីរងគ្រោះចេះតែមានការភ័យខ្លាចចំពោះពាក្យគំរាមរបស់ពូ ថាខ្លាចមានរឿងធំកើតឡើង បើសិនជាប្រាប់គេនោះ។ រឿងរ៉ាវគួរឲ្យស្អប់ខ្ពើមនេះត្រូវបានបែកធ្លាយនៅ ថ្ងៃអង្គារ ១កើត ខែជេស្ឋ ឆ្នាំច សំរឹទ្ធិសក័ ព.ស២៥៦២ ត្រូវនឹងថ្ងៃទី១៥ ខែឧសភា ឆ្នាំ២០១៨នេះ។ បើតាមមន្ត្រីប៉ុស្តិ៍រដ្ឋបាលភូមិពានាជួរ បានឱ្យដឹងថាសមត្ថកិច្ចបានទទួលបណ្តឹងផ្ទាល់មាត់ពីឈ្មោះ ខន ដា ភេទប្រុស អាយុ៣៧ឆ្នាំ នៅភូមិពានាជួរ ឃុំក្តឿងរាយ ស្រុកកញ្ជៀច ខេត្តព្រៃវែង ដែលត្រូវជាឪពុករបស់ក្មេងស្រីរងគ្រោះ ប្តឹងចោទឈ្មោះ វ៉េង វិណៃ ភេទប្រុស អាយុ៤០ឆ្នាំ ត្រូវជាប្អូនថ្លៃ រស់នៅផ្ទះក្បែរគ្នា និងភូមិ ឃុំជាមួយគ្នាថា បានប្រព្រឹត្តអំពើចាប់រំលោភកូនស្រីខ្លួនឈ្មោះ ដ.ណ.រ ភេទស្រី អាយុ១៦ឆ្នាំ ជាច្រើនលើកច្រើនសារ ប៉ុន្តែក្មេងរងគ្រោះភយ័ខ្លាចមិនហ៊ានប្រាប់ឪពុកម្តាយ ។
ប្រភពបានបន្តថា ដោយសារតែឪពុកម្តាយក្មេងស្រីរងគ្រោះ ចេះសង្កេតឃើញថាកូនស្រីរបស់ខ្លួន មួយរយៈពេលនេះ ចេះតែមានសុខភាពមិនសូវល្អ ចេះតែស្គមស្លេកស្លាំង និងមិនសូវញាំបាយ ពួកគាត់ក៏សួរនាំកូនស្រីថា តើកូនកើតជំងឺអ្វីមែនទេ បានជាមើលទៅសុខភាពមិនល្អបែបនេះ តែកូនស្រីបានកុហកថា មិនមានជំងឺអ្វីនោះទេ ដោយឮសម្តីកូនឆ្លើយប្រាប់បែបនេះ ពួកគាត់ក៏មិនបានសួរនាំអ្វីទៀតនោះទេ។ លុះមកដល់ថ្ងៃទី១២ ខែឧសភា ឆ្នាំ២០១៨ វេលាម៉ោងប្រមាណជា៦ល្ងាច ឪពុករបស់ក្មេងស្រីរងគ្រោះ បានឃើញជនសង្ស័យ នៅជាមួយកូនស្រីមុខបន្ទប់ទឹកក្រោយផ្ទះស្ងាត់ៗតែពីរនាក់ ក៏ដើរទៅមើល។ ពេលឃើញឪពុកក្មេងស្រីរងគ្រោះដើរសំដៅមក ជនសង្ស័យក៏រត់គេចចេញទៅ នៅសល់តែក្មេងស្រីរងគ្រោះ កំពុងលើកខោស្លៀកវិញ ឃើញបែបនោះ ដោយការសង្ស័យឪពុកក៏សួរនាំកូន តែកូនពុំប្រាប់ទៀត។
នៅថ្ងៃបន្ទាប់ ដោយមិនអស់ចិត្តឪពុកម្តាយ ក៏បន្តលួងលោមសួរនាំកូនរហូតទើបកូនប្រាប់ការពិតថា រូបខ្លួនត្រូវពូឈ្មោះ វិណៃ នេះចាប់រំលោភជាច្រើនលើកច្រើនសារមកហើយ ដែលលើកទី១តាំងពីក្មេងស្រីរងគ្រោះអាយុ១៣ឆ្នាំម្លេះ ដែលពូថ្លៃនោះតែងតែចាប់រំលោភនាងក្នុងពេលពុកម៉ែមិននៅ ឬពេលស្ងាត់គ្មានអ្មកណានៅផ្ទះ តែនាងមិនដែលហ៊ានប្រាប់គេទេ ព្រោះពូគំរាមថានឹងមានរឿងធំបើសិនជាប្រាប់គេ។ ហើយចំពោះរឿងថ្ងៃទី១២នោះគឺពុំទាន់បានរំលោភទេ គឺគ្រាន់តែអោបថើប នឹងសម្រាតខោក្មេងស្រីប៉ុណ្ណោះ ស្រាប់តែឪពុកទាន់ ពូថ្លៃចិត្តថោកក៏រត់ចេញបាត់ទៅ។ បច្ចុប្បន្នសមត្ថកិច្ចបានឃាត់ខ្លួនជនសង្ស័យឈ្មោះ វ៉េង វិណៃ ខណៈដែលជនសង្ស័យក៏បានសារភាពថា ខ្លួនពិតជាបានប្រព្រឹត្តអំពើបែបនោះពិតប្រាកដមែន៕
ចែករំលែកព័តមាននេះ