រាជធានីភ្នំពេញ ៖ លិខិតមួយច្បាប់របស់អតីតប្រធានគណបក្សអំណាចខ្មែរ លោក សួន សេរីរដ្ឋាដែលបានសរសេរគោរពជូនសម្តេចតេជោ ហ៊ុន សែន នាយករដ្ឋមន្ត្រីកម្ពុជា ដើម្បីស្នើសុំអន្តរាគមន៍ពីសម្តេចតេជោ…
រាជធានីភ្នំពេញ ៖ លិខិតមួយច្បាប់របស់អតីតប្រធានគណបក្សអំណាចខ្មែរ លោក សួន សេរីរដ្ឋាដែលបានសរសេរគោរពជូនសម្តេចតេជោ ហ៊ុន សែន នាយករដ្ឋមន្ត្រីកម្ពុជា ដើម្បីស្នើសុំអន្តរាគមន៍ពីសម្តេចតេជោ ស្នើលើកលែងទោសឲ្យរូបលោកជាលើកទី២នោះត្រូវបានគេចែកចាយយ៉ាងព្រោងព្រាត ខណៈដែលលិខិតនោះបានធ្វើឡើងតាំងពីថ្ងៃទី៣០ ខែមេសាមកម្លេះ។
យ៉ាងណាមិញក្នុងលិខិតនោះផងដែរលោក សួន សេរីរដ្ឋាក៏បានសរសេរបញ្ជាក់ថា លោកសូមអភ័យទោសសម្តេចតេជោ និងកងទ័ពទាំងអស់ «ដោយសុទ្ធចិត្ត» ដែលលោកបានប្រើពាក្យមិនគប្បីវាយប្រហារ និងរិះគន់យ៉ាងចាស់ដៃតាមបណ្តាញសង្គមហ្វេសប៊ុករបស់លោកផ្ទាល់ កាលពីខែសីហា ឆ្នាំ២០១៧ ។ ក្នុងលិខិត ដដែលនោះលោក សួន សេរីរដ្ឋាបានសម្តែងការសោកស្តាយដែលលោកបានសរសេរនូវសារនយោបាយផ្សាយលើទំព័រហ្វេសប៊ុករបស់ខ្លួនកន្លងមក ដោយមិនមានការពិចារណាឲ្យបានដិតដល់ដែលលោកថា បានធ្វើឲ្យប៉ះពាល់យ៉ាងធ្ងន់ធ្ងរដល់កិត្តិយសសម្តេចតេជោ នាយឧត្តមសេនីយ៍ផុតលេខផ្កាយមាស៥ និងនាយឧត្តមសេនីយ៍ ព្រមទាំងឧត្តមសេនីយ៍ ជាអគ្គបញ្ជាការកងទ័ពជាតិរបស់យើង ។
លោក សួន សេរីរដ្ឋា ក៏បានប្រកាសថា ៖ «ខ្ញុំបាទសូមសន្យាថា ចាប់ពីថ្ងៃនេះទៅ ខ្ញុំបាទមិនសរសេរមិននិយាយអ្វីដោយគ្មានការពិចារណាបែបនេះឡើយ ។ ខ្ញុំបាទគោរពច្បាប់រដ្ឋធម្មនុញ្ញ និងច្បាប់នានាព្រមទាំងចូលរួមការពារនូវសន្តិភាពដែលសម្តេចតេជោ ខិតខំសាងបានយ៉ាងលំបាកមួយនេះឲ្យគង់វង្សជានិច្ចនិរន្ត ដើម្បីអភិវឌ្ឍន៍ប្រទេស» ។ លោកសួន សេរីរដ្ឋាបានលើកឡើងបន្តថា ៖ «សូមសម្តេចតេជោ នាយឧត្តមសេនីយ៍ផុតលេខ មេត្តាជួយអន្តរាគមន៍ ស្នើលើកលែងទោសឲ្យខ្ញុំបានបានរួចផុតពីទោសមានសេរីភាព ដើម្បីវិលទៅជួបគ្រួសារ ថែរក្សាម្តាយចាស់ជរា ថែរក្សាកូនតូចៗ ធ្វើជាកូនល្អ ជាឪពុកល្អ និងជាស្វាមីល្អ ព្រមទាំងជាពលរដ្ឋល្អ ដោយក្តីអនុគ្រោះ»។
បើទោះបីជាលិខិតសួន សេរីរដ្ឋា បានចុះតាំងពីថ្ងៃទី៣០ មេសាក៏ដោយតែមកដល់រសៀលថ្ងៃទី១៥ ខែឧសភា ឆ្នាំ២០១៨ មិនទាន់ឃើញការឆ្លើយតបបែបណាពីសម្តេចតេជោនាយករដ្ឋមន្ត្រីនៅឡើយទេ ។
សូមរម្លឹកថា អតីតប្រធានគណបក្សអំណាចខ្មែរត្រូវបានចាប់ខ្លួនកាលពីថ្ងៃទី១១ ខែសីហា ឆ្នាំ២០១៧ ក្រោយពេលលោកបង្ហោះសារតាមហ្វេសប៊ុករិះគន់ប្រមាថលើកងទ័ពកម្ពុជា ពាក់ព័ន្ធនឹងជម្លោះព្រំដែន នៅតំបន់អូរអាឡៃ និងអូរតាង៉ាវ ក្នុងស្រុកសៀមប៉ាង ខេត្តស្ទឹងត្រែង ដែលកងទ័ពឡាវ បានចូលឈ្លានពាន ។
ព្រះរាជអាជ្ញារងនៃតុលាការសាលាដំបូងរាជធានីភ្នំពេញលោកសៀង សុខ នៅថ្ងៃទី១៣ ខែសីហា ឆ្នាំ២០១៧ចោទប្រកាន់លោកសួន សេរីរដ្ឋាចំនួន៣បទល្មើស ដែលមានដូចជា ៖ ទី១- គឺបទញុះញង់កុំឲ្យយោធិនស្តាប់បង្គាប់ តាមមាត្រា ៤៧១នៃក្រមព្រហ្មទណ្ឌកម្ពុជា ទី២-បទល្មើសធ្វើឲ្យខួចទឹកចិត្តកងទ័ព តាមមាត្រា៤៧២ និងទី៣- គឺបទញុះញង់ឲ្យប្រព្រឹត្តបទឧក្រិដ្ឋជាអាទិ៍ តាមមាត្រា ៤៩៤ និងមាត្រា៤៩៥នៃក្រមព្រហ្មទណ្ឌកម្ពុជា ។
ក្រោយមកលោកក៏ត្រូវបានកាត់ទោសឲ្យជាប់ពន្ធនាគាររយៈពេល៥ឆ្នាំ ៕
ចែករំលែកព័តមាននេះ