ខេត្តកំពង់ឆ្នាំ ៖ មានស្ត្រីម្នាក់បានឈឺពោះឆ្លងទន្លេហើយត្រូវបានប្ដីដឹកទៅកាន់មណ្ឌលសុខភាពស្រុកបរិបូណ៌ ប៉ុន្តែត្រូវក្រុមគ្រូពេទ្យប្រាប់ថា កូនក្នុងផ្ទៃកើតមកដោយលំបាកត្រូវតែបញ្ជូនទៅសង្គ្រោះនៅឯមន្ទីរពេទ្យខេត្តកំពង់ឆ្នាំង ។ ប៉ុន្តែត្រូវបានក្រុមគ្រូពេទ្យបង្ខំទារប្រាក់ចំនួន១០ម៉ឺនរៀលទើបឱ្យរថយន្តរបស់មន្ទីរពេទ្យបង្អែកស្រុកបរិបូរណ៍ដឹកទៅមន្ទីរពេទ្យខេត្តកំពង់ឆ្នាំង ។ ហើយបើគ្មានប្រាក់ប៉ុណ្ណឹងទេរកម៉ូតូ ឬម៉ូតូកង់បី(តុតុ) ជិះទៅ ។ ហេតុការណ៍មិនប្រក្រតីនេះបានកើតនៅវេលាម៉ោង៤រសៀល ថ្ងៃទី១៤ ខែឧសភា ឆ្នាំ២០១៨ ។
បុរសឈ្មោះ ម៉ក់ រាក់ អាយុ២៦ឆ្នាំ ជាប្តីស្ត្រីឈឺពោះឆ្លងទន្លេបាននិយាយឱ្យដឹងថា គាត់មានទីលំនៅភូមិកោះមនោ ឃុំឆ្នុកទ្រូ ស្រុកបរិបូណ៌ ប្រពន្ឋគាត់ឈ្មោះ ហឹម គិមឈី អាយុ២២ឆ្នាំ បានឈឺពោះឆ្លងទន្លេ ហើយគាត់បានដឹកទៅសម្រាលកូននៅមន្ទីរពេទ្យបង្អែកស្រុកបរិបូណ៌ ។ ប៉ុន្តែពេលមកដល់គ្រូពេទ្យប្រាប់ថា កូនក្នុងផ្ទៃកើតមកខុសប្រក្រតី ត្រូវទៅកើតនៅមន្ទីរពេទ្យបង្អែកខេត្ត តែត្រូវបង់សេវា១០ម៉ឺនរៀលទើបឱ្យរថយន្តដឹកទៅ បើគ្មានទេដឹកតាមម៉ូតូ ឬតុតុទៅ ។
ដោយគ្មានជម្រើគាត់បានជួលម៉ូតូកង់បី(តុតុ)ក្នុងតម្លៃ៤ម៉ឺនរៀល ហើយក៏ដឹកទៅមន្ទីរពេទ្យ ប៉ុន្តែពេលដឹកមកដល់ចំណុចស្ពានអង្កាមដែលមានចម្ងាយជាង១០គីឡូម៉ែត្រពីមន្ទីរពេទ្យបង្អែកស្រុកបរិបូណ៌ ស្រាប់តែឃើញរថយន្តរបស់មន្ទីរពេទ្យស្រុកបរិបូណ៌មកតាមក្រោយរួចក៏បានដឹកប្រពន្ធខ្ញុំ ទៅមន្ទីរពេទ្យខេត្តដើម្បីសម្រាលកូន ។
ពាក់ព័ន្ធនឹងបញ្ហានេះលោក ឃួន សៅរុំ អភិបាលស្រុកបរិបូណ៌បាននិយាយឱ្យដឹងថា លោកបានទទួលព័ត៌មានពីប្រជាពលរដ្ឋរាយការណ៍ថា មានស្ត្រីឆ្លងទន្លេទៅសម្រាលកូននៅមណ្ឌលសុខភាពស្រុកបរិបូណ៌តែត្រូវបានក្រុមគ្រូពេទ្យស្រុកបរិបូរណ៍ទារប្រាក់១០ម៉ឺនរៀលទើបដឹកស្ត្រីរងគ្រោះទៅមន្ទីរពេទ្យបង្អែកខេត្ត បន្ទាប់មកលោកក៏បានបញ្ជាឲ្យក្រុមគ្រូពេទ្យ ស្រុកបរិបូណ៌យករថយន្តទៅតាមដឹកស្ត្រីត្រូវឆ្លងទន្លេរូបនោះ ទៅកាន់មន្ទីរពេទ្យខេត្តជាបន្ទាន់ ។
ពាក់ព័ន្ធនឹងបញ្ហានេះលោក ឈុន ប៊ុនថា ប្រធានមន្ទីរពេទ្យបង្អែកស្រុកបរិបូណ៌មិនអាចទំនាក់ទំនងបានទេ ជាមួយគ្នានេះលោក សរិន្ទី រ៉ាវុទ្ឍី ប្រធានមន្ទីរពេទ្យបង្អែកខេត្តកំពង់ឆ្នាំងក៏មិនអាចធ្វើការទំនាក់ទំនងបានដែរ ។ ប៉ុន្តែទោះជាយ៉ាងនេះក្តីរឿងនេះជារឿងពិតដែលមិនអាចប្រកែកបានហើយការដែលប្រធានមណ្ឌលសុខភាពស្រុកបរិបូណ៌សុខចិត្តយករថយន្តទៅដឹកជនរងគ្រោះដល់ពាក់កណ្ដាលផ្លូវឲ្យមានការស្ដីបន្ទោសពីអាជ្ញាធរស្រុកផងដែរ។
សូមបញ្ជាក់ថា ស្ត្រីសម្រាលកូនខាងលើបានសម្រាលកូនដោយសុវត្ថិភាព ហើយបន្ទាប់ពីមានការយកចិត្តទុកដាក់ពីក្រុមគ្រូពេទ្យនៃមន្ទីរពេទ្យខេត្តកំពង់ឆ្នាំង ៕
ចែករំលែកព័តមាននេះ