ខេត្តព្រៃវែង ៖ ក្មេងស្រីពីរនាក់បងប្អូនបង្កើតនឹងគ្នាបានបាត់បង់ជីវិតដោយសារការលង់ទឹក ខណៈដែលតាមម្តាយទៅរាយមងនៅអូតាស៊ាង ដែលនៅចម្ងាយពីភូមិប្រមាណ១.៦០០ម៉ែត្រ ធ្វើឲ្យម្តាយ និងញាតិមិត្តបងប្អូនសោកស្តាយក្រៃលែង។ ករណីគួរឲ្យរន្ធត់នេះបានកើតឡើង នៅថ្ងៃចន្ទ ១៥រោច ខែពិសាខ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៤ ឧសភា ២០១៨ វេលាម៉ោង១២ និង១០នាទី ត្រង់ចំណុចអូតាស៊ាង ចម្ងាយពីភូមិ១.៦០០ម៉ែត្រ ស្ថិតនៅភូមិពន្លៃ ឃុំបាបោង ស្រុកពាមរក៍ ខេត្តព្រៃវែង ។
សមត្ថកិច្ចបានឱ្យដឹងថា ជនរងគ្រោះទី១.ឈ្មោះ ផន រតនា ភេទស្រី អាយុ១០ឆ្នាំ មុខរបរសិស្ស និងទី២.ឈ្មោះ ផន ថាវី ភេទស្រី អាយុ០៨ឆ្នាំ មុខរបរសិស្ស ដែលអ្នកទាំងពីរជាបងប្អូនបង្កើតនឹងគ្នា ដែលមានឪពុកឈ្មោះ ផេង ភា(ស្លាប់) និងម្តាយឈ្មោះ ម៉ែន យ៉ន អាយុ៤៦ឆ្នាំ មានទីលំនៅភូមិពន្លៃ ឃុំបាបោង ស្រុកពាមរក៍ ខេត្តព្រៃវែង។ ប្រភពបានបន្តថា នៅមុនពេលកើតហេតុក្មេងស្រីទាំងពីរនាក់ បានតាមម្តាយទៅរាយមងនៅក្នុងចំណុចអូតាស៊ាង ដែលមានចម្ងាយប្រហែល ១.៦០០ម៉ែត្រពីភូមិ។ នៅពេលទៅដល់អូតាស៊ាងម្តាយរបស់ក្មេងស្រីបានចុះទៅរាយមងតាមធម្មតា រីឯក្មេងស្រីទាំងពីរបាននាំគ្នា ចុះទៅលេងទឹក និងប្រលែងគ្នា ហើយក៏មានការតោងគ្នាលេងផងនោះ បានបណ្តាលឲ្យក្មេងស្រីទាំងពីរ លង់ទឹកតែម្តងទៅ។
រីឯម្តាយ នៅពេលឃើញកូនៗលង់ទឹកក៏បានរត់ទៅហៅ ក្រុមគ្រួសារព្រមទាំងអ្នកភូមិ ឲ្យនាំគ្នាចុះរាវរកឃើញរួចដឹកតាមគោយន្តមកផ្ទះ រហូតដល់ម៉ោង២ និង២០នាទី ទើបរាយការណ៍ជូន សមត្ថកិច្ច។ ក្រោយពីទទួលបានព័ត៌មាន សមត្ថកិច្ចបានចុះទៅពិនិត្យ និងធ្វើកោសល្យវិច្ច័យ រកឃើញថា ជនរងគ្រោះទាំងពីរពិតជាស្លាប់ដោយសារលង់ទឹកពិតប្រាកដមែន។ បច្ចុប្បន្នសមត្ថកិច្ចបានប្រគល់សាកសពទាំង២នាក់ ជូនក្រុមគ្រួសារដើម្បីយកទៅធ្វើបុណ្យតាមប្រពៃណីខ្មែរ៕
ចែករំលែកព័តមាននេះ