ខេត្តបន្ទាយមានជ័យ ៖ តាមប្រភពព័ត៌មានបឋមបានឱ្យដឹងថា នៅព្រឹកថ្ងៃទី១៤ ឧសភា ២០១៨ មានស្ត្រីជាពលករម្នាក់ជួបគ្រោះថ្នាក់ធ្លាក់ពីលើរបងរបួសក្បាលធ្ងន់ធ្ងរ នៅចំណុចផ្សាររុងក្លឿ ខណៈលួចឆ្លងដែនខុសច្បាប់ឡើងតាមរបងចូលទៅទឹកដីថៃ ។
ជួបតាមទូរស័ព្ទសមត្ថកិច្ចម្នាក់សុំមិនបញ្ចេញឈ្មោះបានឱ្យដឹងថា ករណីខាងលើពេលទំនាក់ទំនងសួរទៅទាហានឈុតខ្មៅថៃបានប្រាប់ថា ពិតជាមានស្ត្រីពលករជួបគ្រោះថ្នាក់មែន គឺកើតឡើងនៅខាងជើងច្រកទ្វារអន្តរជាតិប៉ោយប៉ែត។
ប្រភពបន្តថា ក្រោយហេតុការណ៍នេះកើតឡើង ស្ត្រីរងគ្រោះត្រូវបានសមត្ថកិច្ចថៃបញ្ជូនទៅមន្ទីរពេទ្យក្នុងស្រុកអារញ្ញ ខេត្តស្រះកែវភ្លាមៗ។ ទោះជាបែបណា ស្ត្រីរងគ្រោះគេមិនទាន់ស្គាល់អត្តសញ្ញាណនៅឡើយទេ។
គួរបញ្ជាក់ថា កន្លងមកនេះ ពលករប្រុស-ស្រីឆ្លងដែនខុសច្បាប់ពីកម្ពុជាទៅថៃ ខ្លះឡើងរបងដែលមានបន្លាលួសពីខាងលើ និងខ្លះលូនតាមរូងដីដែលមេខ្យល់លួចជីកឲ្យ ប៉ុន្តែត្រូវទាហានឈុតខ្មៅថៃចាប់បានជាបន្តបន្ទាប់ផងដែរ
ព័ត៌មានលម្អិតនឹងមានផ្សាយលើទំព័រកាសែតកោះសន្តិភាព ៕
ចែករំលែកព័តមាននេះ