ខេត្តព្រៃវែង ៖ យុវជនបីនាក់បានបាត់បង់ជីវិតភ្លាមៗនៅនឹងកន្លែង ក្នុងករណីគ្រោះថ្នាក់ចរាចរណ៍មួយ នៅក្នុងស្រុកព្រះស្តេច រវាងម៉ូតូបុកជាមួយនឹងរថយន្ត ខណៈអ្នកបើកបររថយន្តបានរត់គេចខ្លួនបាត់ ស្រមោល ទាំងមិនទាន់ដឹងថាអ្នកណាខុសអ្នកណាត្រូវ បន្សល់ទុកតែសាកសពទាំងបី នៅលើចញ្ចើមផ្លូវ ។ ហេតុការណ៍ដ៏រន្ធត់នេះបានកើតឡើងនៅថ្ងៃអាទិត្យ ១៤រោច ខែពិសាខ ឆ្នាំច សំរឹទ្ធស័ក ព.ស ២៥៦២ ត្រូវនឹងថ្ងៃទី១៣ ខែឧសភា ឆ្នាំ២០១៨ វេលាម៉ោង៥ និង៣០នាទីព្រឹក នៅចំណុចភូមិបឹងស្នោ ឃុំល្វា ស្រុកព្រះស្តេច លើផ្លូវជាតិលេខ១ចន្លោះគីឡូម៉ែត្រលេខ៨០-៨១។
បើតាមរបាយរណ៍របស់សមត្ថកិច្ច បានឱ្យដឹងថា ជនរងគ្រោះដែលបានស្លាប់នៅក្នុងករណីគ្រោះថ្នាក់ចរាចរណ៍ខាងលើមានឈ្មោះ មុក សុលាប ភេទប្រុស អាយុ១៨ឆ្នាំ រស់នៅភូមិកន្សោមអក ឃុំកន្សោមអក ស្រុកកំពង់ត្របែក ខេត្តព្រៃវែង ជាអ្នកបើកបរម៉ូតួ និងមានអ្នករួមដំណើរពីរនាក់ទៀតដែលទី១/ឈ្មោះ មុក សំណាង ភេទប្រុស អាយុ ១៨ឆ្នាំ រស់នៅភូមិឃុំជាមួយគ្នា និងទី២.ឈ្មោះ វ៉ា រដ្ឋា ភេទប្រុស អាយុ១៩ឆ្នាំ រស់នៅភូមិបាលាំង ឃុំកន្សោមអក ស្រុកកំពង់ត្របែក ខេត្តព្រៃវែង។
ប្រភពបានបន្តថា នៅមុនពេលកើតហេតុ ជនរងគ្រោះទាំងបីបានជិះឌុបគ្នាដោយប្រើប្រាស់ម៉ូតូម៉ាក HONDA DRAEM C125 ពណ៌ខ្មៅ ពាក់ស្លាកលេខ ភ្នំពេញ 1CW-5490 បើកក្នុងទិសដៅពីកើតទៅលិចលុះមកដល់ចំណុចកើតហេតុខាងលើ ជនរគ្រោះបានជិះម៉ូតូមកបុកជាមួយរថយន្តម៉ាក HYUNDAI ពណ៌ស ស្លាកលេខ ភ្នំពេញ 3C- 7377 បើកដោយជនមិនស្គាល់អត្តសញ្ញាណ ដែលបើកបរបញ្ច្រាសទិសគ្នា បណ្តាលឲ្យជនរងគ្រោះដែល ជិះម៉ូតូទាំងបីនាក់បានបោកក្បាលនឹងថ្នល់ស្លាប់ភ្លាមនៅនឹងកន្លែង។ រីឯរថយន្ត HYUNDAI បានក្រឡាប់ផ្ញារជើង ក្រោយកើតហេតុភ្លាមអ្នកបើករថយន្តបានគេចខ្លួនបាត់ស្រមោល បន្សល់ទុកតែ រថយន្តនៅចញ្ចើមថ្នល់។ បច្ចុប្បន្នសមត្ថកិច្ចបានប្រគល់សពជូនក្រុមគ្រួសារយកទៅធ្វើបុណ្យ តាមប្រពៃណី រីឯរថយន្ត និងម៉ូតូនៅកន្លែងកើតហេតុរង់ចាំរថយន្តស្ទូចយកមករក្សាទុកនៅប៉ុស្តិ៍ល្វា៕
ចែករំលែកព័តមាននេះ