ខេត្តព្រៃវែង ៖ ហេតុការណ៍ផ្ទុះអាវុធមួយ បានកើតឡើង និងធ្វើឱ្យមន្ត្រីប៉ូលិសស្រុកបាភ្នំម្នាក់រងរបួសយ៉ាងធ្ងន់ធ្ងរ ហើយត្រូវបានគេដឹកយកទៅសង្គ្រោះបន្ទាន់នៅមន្ទីរពេទ្យឯរាជធានីភ្នំពេញទាំងយប់ ។ ហេតុការណ៍នេះ បានកើតឡើងកាលពីវេលាម៉ោង៧និង១៥នាទីយប់ ថ្ងៃទី១០…
ខេត្តព្រៃវែង ៖ ហេតុការណ៍ផ្ទុះអាវុធមួយ បានកើតឡើង និងធ្វើឱ្យមន្ត្រីប៉ូលិសស្រុកបាភ្នំម្នាក់រងរបួសយ៉ាងធ្ងន់ធ្ងរ ហើយត្រូវបានគេដឹកយកទៅសង្គ្រោះបន្ទាន់នៅមន្ទីរពេទ្យឯរាជធានីភ្នំពេញទាំងយប់ ។
ហេតុការណ៍នេះ បានកើតឡើងកាលពីវេលាម៉ោង៧និង១៥នាទីយប់ ថ្ងៃទី១០ ឧសភា នៅចំណុចផ្លូវក្រួសក្រហម ស្ថិតក្នុងភូមិត្រោក ឃុំរោងដំរី ស្រុកបាភ្នំ ខេត្តព្រៃវែង ចំណែកជនរងគ្រោះត្រូវបានគេស្គាល់ថា ឈ្មោះ ផេន ភារិត ភេទប្រុស អាយុ៣៧ឆ្នាំ ជាមន្ត្រីនគរបាលស្រុកបាភ្នំ មានទីលំនៅក្នុងភូមិស្ពឺខាងកើត ឃុំស្ពឺ(ក) ស្រុកបាភ្នំ ។
សមត្ថកិច្ចបានឱ្យដឹងថា ជុំវិញហេតុការណ៍ផ្ទុះអាវុធនេះ ពុំមាននរណាម្នាក់អាចបញ្ជាក់ឱ្យបានច្បាស់អំពីមូលហេតុនោះទេ ហើយក៏មិនដឹងថា ជនបង្កជានរណា និងមានគ្នាប៉ុន្មាននាក់នោះដែរ គេគ្រាន់តែដឹងថា មុនពេលកើតហេតុជនរងគ្រោះ បានជិះម៉ូតូទៅអង្គុយចុចទូរស័ព្ទលេងនៅកន្លែងកើតហេតុតែម្នាក់ឯង ហើយក្រោយមកក៏លឺស្នូរផ្ទុះអាវុធតែម្តង ។ នៅពេលដែលសមត្ថកិច្ចបុ៉ស្តិ៍រដ្ឋបាលឃុំរោងដំរីទៅដល់កន្លែងកើតហេតុ គឺជនបង្កបានរត់គេចខ្លួនបាត់ទៅហើយ នៅសល់តែជនរងគ្រោះដួលដេកលើដី ដោយនៅលើដងខ្លួនមានរបួស២កន្លែងគឺ ត្រង់ស្មាស្តាំ និងថ្គាមដែលបញ្ជាក់ថា ជនរងគ្រោះត្រូវគេបាញ់ចំស្មា ហើយគ្រាប់កាំភ្លើងបានបុកធ្លុះចេញពីស្មា ធ្លាយទៅថ្គាមបៀមគ្រាប់ ទើបនាំជនរងគ្រោះយកទៅព្យាបាលនៅមន្ទីរពេទ្យតែម្តង ។
មន្ត្រីនគរបាលខេត្តព្រៃវែងបានបញ្ជាក់ថា នៅវេលាម៉ោង៧ព្រឹក ថ្ងៃទី១១ ឧសភា គឺព្រឹកថ្ងៃបន្ទាប់ សមត្ថកិច្ចនគរបាលស្រុក និងខេត្តជាច្រើននាក់បានចុះទៅពិនិត្យទីតាំងកើតហេតុ និងបានរកឃើញសំបកគ្រាប់កាំភ្លើងប្រភេទ k54 ចំនួន១គ្រាប់នៅកន្លែងកើតហេតុ ហើយក្រៅពីនោះគឺពុំឃើញមានអ្វីដែលជាតម្រុយសោះឡើយ។ ហេតុនេះហើយទើបសមត្ថកិច្ចមិនអាចសន្និដ្ឋានបានភ្លាមៗថា ករណីផ្ទុះអាវុធនេះវាជារឿងគំនុំ ឬក៏ជាករណីអ្វីផ្សេងឱ្យប្រាកដនៅឡើយទេ ព្រោះពេលនេះជនរងគ្រោះកំពុងស្ថិតក្នុងការជួយសង្គ្រោះ មិនទាន់អាចផ្តល់ព័ត៌មានបែបណាបាននៅឡើយទេ ៕ សុំ ពៅពិសិដ្ឋ
ចែករំលែកព័តមាននេះ